OPO Jehova Kalunga e tu kwafele tu didilike mo Messias, okwa nwefwa mo ovaprofeti vahapu vopefimbo lOmbibeli va yandje ouyelele u na sha nokudalwa, oukalele nosho yo efyo lOmumangululi oo omuudanekwa. Omaxunganeko Ombibeli aeshe oo okwa wanifilwa Jesus Kristus. Itashi kumwifa tuu eshi e li paushili nookondadalunde! Oku shi yelifa, natu konakoneni omaxunganeko  manini oo a xunganeka oiningwanima oyo ya pamba okudalwa kwaMessias nosho yo okukala kwaye okaana.

Omuprofeti Jesaja okwa xunganeka kutya Messias ota ka kala oludalo lohamba David. (Jesaja 9:6) Jesus okwa li shili a dalwa mepata laDavid. — Mateus 1:1, 6-17.

Mika, omuprofeti umwe vali waKalunga, okwa xunganeka kutya okaana oko okwa li taka ka ninga omupangeli noka li taka ka dalelwa ‘muBetlehem Efrata.’ (Mika 5:1) Pefimbo lokudalwa kwaJesus,  opa li oilando ivali muIsrael oyo ya li hai ifanwa Betlehem. Shimwe osha li popepi naNasaret koshitukulwa shokolundume loshilongo, nashikwao osha li popepi naJerusalem muJuda. Betlehem osho sha li popepi naJerusalem osha li nale hashi ifanwa Efrata. Jesus omo kwa li a dalelwa moshilando osho, ngaashi naanaa exunganeko la li la xunganeka. — Mateus 2:1.

Exunganeko lOmbibeli likwao ola xunganeka kutya Omona waKalunga otaka ifanwa “mo muEgipti.” Okaana Jesus oka li ka twala kuEgipti. Oka li ka alulwa ko konima yefyo laHerodes, nokungaha osha wanifa exunganeko olo. — Hosea 11:1; Mateus 2:15.

Moshimhungu osho shi li pepandja 200, omishangwa odo di li koshi yokapalanyole “Exunganeko” odi na omauyelele e na sha naMessias. Di yelekanifa nomishangwa odo di li koshi yokapalanyole “Ewanifo.” Okuninga ngaho otaku ka pameka natango eitavelo loye moushili wEendjovo daKalunga.

Eshi to konakona omishangwa odo, dimbulukwa kutya omaxunganeko oo okwa li a shangwa pa pita omido omafele fimbo Jesus ina dalwa e li omunhu kombada yedu. Jesus okwa ti: “Aishe ei ya shangelwa nge momhango yaMoses nomovaprofeti nomomapsalme oi nokuwanifwa.” (Lukas 24:44) Ngaashi sha ulikwa mOmbibeli yoye, omaxunganeko oo okwa wanifwa shili kondadalunde.