ENYONGEZYO
Yesu Kristo—Masiya Oyuwalhaghanisibawa
ERITHUWATHIKYA eriminyerera Masiya, Nyamuhanga Yehova mwatheghekania abaminyereri bangi abe Biblia eriha emyatsi mingi eyihambire okw’ibuthwa, omubiiri, n’olhuholho olhw’Omulhamya oyuwalhaghanisibawa. Amaminyereri we Biblia awosi aya, mwabererera oku Yesu Kristo. Amaminyereri aya ahikire omwa nzira ey’eriswekya kandi akanibirweko buuli. Erikangania eki kya ndeke, thulebaye amaminyereri make awa lhaghulha emyatsi eyihambire okw’ibuthwa lya Masiya n’obulere biwe.
Omuminyereri Isaya mwalhaghulha athi Masiya angabere mwitsikulhu w’Omwami Dawudi. (Isaya 9:7) Kwenene Yesu mwabuthirwa omwa kihanda kya Dawudi.—Matayo 1:1, 6-17.
Mika, owundi muminyereri wa Nyamuhanga, mwalhaghulha athi omwana oyu angabere muthabali kandi athi angabuthirwe e “Betelehemu Efurata.” (Mika 5:2) Omwa buthuku Yesu abuthawa, habya miyi ibiri omu Israeli eyabya yikahulhwa mwa Betelehemu. Omughuma abya hakuhi ne Nazareti omwa kitsweka ky’endatha eky’erihanga eryo, n’owundi abya hakuhi ne Yerusalemu e Yuda. E Betelehemu eyabya hakuhi ne Yerusalemu, kera iyikahulhawa mwa Efurata. Yesu mwabuthirwa omwa muyi oyo, ngoku obuminyereri bwana lhaghulha!—Matayo 2:1.
Obundi buminyereri bwe Biblia mubwalhaghulha buthi, Mughulha wa Nyamuhanga anga birikirwe ‘erilhua e Misiri.’ Yesu mwathwalhwa e Misiri anyakine mwana. Mubamusubulya Herode abiriholha, neryo obuminyereri mubwa bererera.—Hosea 11:1; Matayo 2:15.
Omwa akasanduko “ Amaminyereri Awahambire Oku Masiya,”, amasako awathondekire ahisi sy’omuthwe “Obuminyereri” ali mw’emyatsi mingi eyihambire oku Masiya. Kisi sosekanaya amasako aya n’awali ahisi sy’omuthwe “Eribererera.” Erikolha eki kikendi ongera erighumya erikirirya lyawu omwa kwenene y’Ekinywa kya Nyamuhanga.
Wune muyitheghererya amasako aya, wibuke indi aw’obuminyereri asakawa ebikumi by’emyaka Yesu isyali abuthwa. Yesu mwakania athi: ‘Emyatsi yosi eyasakawa omwa mighambo ya Musa n’ebitabu by’Abaminyereri n’omwa Syonyimbo yabya yitholere iyabererera.’ (Luka 24:44) Ngoku wangana ghumya omwa Biblia yawu, kwenene mubya bererera—omu buli mwatsi wosi!
