KʼIANGA jchale ʼyáni je Mesías je xi kʼoasjentjai chjotasonʼnde, je Niná Jeobá nʼio tse xi tongini kʼoakitsole je chjota xi kiski Biblia tʼatsʼe josʼin jtsín, josʼin koakoyason kʼoa josʼin si̱kʼien. Ngayeje én jebi xi tongini kinokjoa ñaki kitjosonyejení xi kao Jesucristo, niʼijinlanatjín xi tsín kitjoson. Chótsenla kʼalee xi kui kinchja̱ni josʼin jtsín kʼoa jme xi koa̱n nga sʼa ʼndí kji.

Je Isaías tongini kʼoakitso nga ya kjuinroani ntje̱le David je Mesías (Isaías 9:7). Kʼoa kʼoakoan, Jesús ntje̱le rey David kinroani (Mateo 1:1, 6-17).

Miqueas xi kʼoati tʼatsʼe Niná kinchja̱ya, kʼoakitso nga ya “Belén Efrata” jtsín kʼoa nga je koatexoma nga kuichoka nichxin (Miqueas 5:2). Kʼianga kitsin Jesús, jao naxinandá tjín xi Belén ʼmi ya Israel. Jngo xi ya tíjnachrian Nazaret kʼoa xi ijngo yaa tíjnachrian Jerusalén, ya Judá. Je xi ya tíjnachrian Jerusalén, Efrata tsakʼin tsakai ngasʼa. Kʼoa yakjoán kitsin Jesús, kʼoasʼin kitjoson én xi kinokjoa (Mateo 2:1).

Ijngosa én kisʼetʼa ya Biblia xi kitso nga kuinchja̱le Niná je ʼNdíle nga katabitjoni “nangi Egipto”. Kʼoa kʼoakoan. Kʼianga sʼa ʼndí kji Jesús, yaa kikao xijchále ya Egipto, kʼoa xijekoan, kʼianga jekʼien Herodes, ijngokʼa kinroakaoni naxinandále. Kʼoasʼin kitjoson én jebi (Oseas 11:1; Mateo 2:15).

Ya jñani tso: “ Én xi tongini kinokjoa tʼatsʼe Mesías” jchaní jngo én xi tjítʼa xi tso: “Jñani kʼoatso”, kui bakó testole Biblia xi tongini kisʼetʼaxo̱n tʼatsʼe je Mesías. Tʼiain kjoanda tingósonkoai je testo xi tjío ngakixile ya jña tso: “Josʼin kitjoson”. Kʼoasʼin ngisa sʼe̱jngo tokuin nga ñaki kʼoatjín jotso je Énle Niná.

Kʼianga chótʼajin testo jebi ali chajinjinli nga siento nó tongini kisʼetʼaxo̱n, nga kje tsinjin Jesús. Jesoa Jesús xi i̱ kitso: “Machjénní nga kuitjoson ngayije kjoabe xi tjíotʼa xi tʼatsʼan ya kjoatéxomale Moisés, kʼoa ya xo̱nlibrole chjota xi kinchja̱ya tʼatsʼe Niná, kʼoa ya xo̱n xi Salmo ʼmi” (Lucas 24: 44). Tojosʼin tiʼyai ya Bibliali, kitjosonní kʼoa niʼijinlanatjín kichale.