JIOVA DIOS kinmatiltij tanauatianij akin kijkuilojkej Biblia, miak taman tein kipanoskia Mesías Temakixtijkej tein moijtojka ualaskia. Amo ouij tikmatiskej akoni yeskia, ta kijtojkej keniuj nemiskia, keniuj yeskia itanojnotsalis uan imikilis. Se kimoujkakaki kemej nochi mochiuak itech Jesucristo tein moijtojka. Maj tikitakan tein ijkuiliujtoya tein kipanoskia keman yoliskia uan keman yeskia okichpil, uan tikitaskej ke ijkon mochiuak.

Tanauatijkej Isaías achtook kijtojka ke Mesías ualeujtoskia itech ichankauan David (Isaías 9:7). Uan ijkon mochiuak: Jesús katka iuejkaujtat tekiuaj David (Mateo 1:1, 6-17).

Miqueas, okse itanauatijkauj Dios, kijtoj ke nemiskia “Belén Efrata” uan mochiuaskia tekiuaj (Miqueas 5:2). Uan ijkon panok, keman Jesús nemik nikan taltikpak, ne Israel moajsiaj ome altepemej tein motokaytiayaj Belén. Se moajsia ompakauin itech altepet Nazaret, uan okse moajsia Judá ompakauin itech altepet Jerusalén. Altepet tein moajsia ompakauin Jerusalén, achto motokaytiaya Efrata. Uan ompa yolik Jesús, ijkon kemej moijtojka (Mateo 2:1).

Uan no, Biblia achtook kijtojka ke Dios kinotsaskia iKonetsin maj kisani “Egipto”. Uan ijkon mochiuak. Konetsin Jesús  kiuikakaj Egipto, uan satepan, keman momikilij tekiuaj Herodes, kiuikakej itech iueyi altepet. Nejin kinextia ke ijkon mochiuak kemej moijtojka (Oseas 11:1; Mateo 2:15).

Itech tapoual 231 tikonitas tajkuilol “ Tein achtook moijtojka”. Ompa moajsij textos tein kipia Biblia kampa moijtojka miak taman tein kipanoskia Mesías. Timitsonyoleuaj xikonita nejon textos iuan tein ixnesij kampa kijtoua “Ijkon mochiuak”. Nejon okachi mitsonpaleuis xikonneltoka ke iTajtol Dios yejua tein melauak.

Keman tikonitas tein kijtoua textos, amo xikonelkaua ke moijkuilojkej tel miak xiujmej achtopa keman yoliskia Jesús. Yejua Jesús kijtoj: ‘Motamichiuak nochi in tajtolmej ten Nejuatsin notechkakopaka ijkuiliujtok tech in Tajtoltsin de Moisés. Uan ten kijkuilojkej in uejkaujtanauatianij de Dios uan no ten ijkuiliujtok tech in Salmos’ (Lucas 24:44). Kemej uelis tikonitas itech moBiblia, yekmelauj nochi mochiuak ijkon kemej moijtojka.