APÉNDICE
Jesucristo, Mesías akin yonoijtoka uajlaskia
TOTAJTSIN JEHOVÁ okimijli iteotlajtokauan miyek tlemach itech Mesías, Temakixtijketl akin yonoijtoka uajlaskia. Ueliskiaj kimatiskiaj akinon, pampa yokijtoka kanon tlakatiskia, kenon tenojnotsaskia niman kenon mikiskia. Melak tikmojkaitas kenon nochi onochiuj ipan Jesucristo tlen yonoijtoka yeuejkaui. Tikitaskej kenon melauak nochi onochiuj ijkuak titlajtoskej kanon otlakat niman tlen opanok ijkuak pitentsin katka.
Teotlajtoketl Isaías yokijtoka ika Mesías uajnemiskia itech ichanejkauan David (Isaías 9:7). Niman ijkon opanok: Jesús oualeuj itech yejuin tekiuaj (Mateo 1:1, 6-17).
Okse iteotlajtokauj toTajtsin, akin itoka Miqueas, okijto ika tlakatiskia ipan ueyikalpan “Belén Efrata” niman ika yejua tekiuajtiskia (Miqueas 5:2). Ijkuak Jesús ouajla ipan tlaltikpaktli, onkatka itech Israel ome uejueyimej kalpamej tlen intoka katka Belén. Se nokauaya ika tlakpak itech yejuin país, nisiu Nazaret, niman okse, nisiu Jerusalén. Ueyikalpan tlen nokauaya nisiu Jerusalén yokitokayotijkaj Efrata. Niman ipan yejuin ueyikalpan otlakatiko Jesús, ijkon onochiuj tlen yonoijtoka (Mateo 2:1).
Biblia noijki yokijtoka ika toTajtsin konotsaskia iKoneuj mauajkisa itech “Egipto”. Niman ijkon opanok, pampa konetsintli Jesús okuikakej Egipto, niman sakin, ijkuak omik Herodes, oksejpa okuikakej ipan ipaís. Ijkon onochiuj tlen yonoijtoka (Oseas 11:1; Mateo 2:15).
Ipan tabla tlen itoka “ Tlen yonoijtoka nochiuas itech Mesías” tikitas kampa kijtoua “Yonoijtoka”, ompa tikitas textos tlen tlajtouaj itech Mesías. Tiknekiskiaj xkimita yejuin textos imiuan tlen uajnestiuej kampa kijtoua “Nochiua”. Yejuin kichiuas xneltoka ika melauak tlen kijtoua iTlajtol toTajtsin.
Ijkuak tikpouas yejuin textos ipan Biblia, maka xkilkaua ika kampa kijtoua tlen nochiuaskia ika tlayekapan, onoijkuilo miyek xiuitl ijkuak xitlakatiya Jesús. Noijki Jesús okijto: “Ika onka tenkisas nochi on tlen noka tlajkuilolnestikaj ipan itlanauatil Moisés niman ipan intlajkuilol on oksekimej tiotlajtojkej niman on salmos” (Lucas 24:44). Ken tejua uelis tikitas ipan moBiblia, nochi yejuin onochiuj.
