JEHOVÁ DIOSMI paymanta willakuqninkunaman Librawaqninchik suyasqa Mesiasmanta willarqaña. Unaymantaraqmi willakamurqaku imayna nacenanmanta, Diospaq imayna llamkananmanta hinaspa imayna wañunanmantapas, chaykunawanmi sutilla yachakunman pim Mesias kananmanta. Admirakuypaqmi kay llapallan  willakuykunaqa Jesucristopi cumplikurqa, manam chullapas yanqaqa karqachu. Nacesqanmantawan warmacha kasqanmanta willakuyta qawarispam cheqappuni kasqanta yachasun.

Diosmanta willakuq Isaiasmi willarqaña Davidpa ayllunmanta Mesias nacenanmanta (Isaias 9:7). Willakamusqanman hinam Jesusqa Davidpa mirayninmanta karqa (Mateo 1:1, 6-17).

Diosmanta willakuq Miqueaspas willakamurqañam “Belen Efrata” sutichasqa llaqtachapi Mesias nacenanmanta hinaspa kamachikuq  kananmantapas (Miqueas 5:2). Kaypi piensarisun, Jesuspa nacesqan tiempopiqa Israel nacionpim iskay llaqtachakuna Belen sutiyoqkama karqa. Hukninmi norte lawpi karqa Nazaret llaqtapa hichpallanpi, hukninñataq Juda llaqtapi Jerusalen llaqtapa hichpallanpi. Jerusalenpa hichpanpi kaqtam ñawpaqtaqa Efrata nispa suticharqaku. Chaypipunim Jesusqa nacerqa, chaynatam cumplikurqa ñawpaqmantaraq Diospa willakusqanqa (Mateo 2:1).

Ñawpaqmantaraqmi huk willakuypipas willakurqaña Diospa Churin “Egipto nacionmanta” lloqsimunanpaq qayasqa kasqanmanta. Chaynapunim sucedekurqa, wawallaraq kachkaptinmi Jesustaqa aparqaku Egipto nacionman, kamachikuq Herodes wañuruptinñataqmi llaqtanman kutichirqaku. Chaynapim cumplikurqa Diospa chay willakusqanqa (Oseas 11:1; Mateo 2:15).

 200 kaq paginapim tarinki “Willakusqan” niqpa uranpi Mesias imakuna pasananmanta willakuq textokunata. Kallpanchaykikum chay textokunata “Cumplikuynin” niqpa uranpi rikurimuq textokunawan tupachinaykipaq. Chaynata ruraspaykim Diospa Palabran cheqappuni kasqanmanta aswan convencesqa kanki.

Kaykunamanta leespaykiqa yuyarinaykim imaynam pachak watakuna manaraq Jesus nacechkaptin chay willakuykuna qellqakusqanmanta. Kikin Jesuspunim nirqa: “Kaykunaqa sucedekun Moisespa qellqasqankuna, Diosmanta willakuqkunapa qellqasqankuna hinaspa Salmos Iibropi qellqasqa kaqkuna cumplikunanpaqmi”, nispa (Lucas 24:44). Bibliaykiwan tupachispaykim kay willakuykuna cheqappuni cumplikusqanta yachanki.