EI TAUTURU ia tatou i te akataka i te Mesia, kua akauru te Atua ko Iehova i te au peroveta Pipiria e manganui kia oronga i te au akakite anga no runga i te anau anga, te angaanga orometua, e te mate anga o teia Akaora taputouia. Kua akatupuia teia au totou Pipiria katoatoa ki roto ia Iesu Karaiti. E tika tikai e  te akakite meitakiia ra ratou ma te umere. Ei akatutu i teia, ka uriuri ana tatou i tetai au totou tokoiti tei akakite ra i te au tupu anga tei piri atu ki te anau anga e te tamarikianga o te Mesia.

Kua akakite te peroveta ko Isaia e e uanga aia no te ariki ko Davida. (Isaia 9:6) Kua anau tikaiia a Iesu na roto mai i to Davida papaanga​—Mataio 1:​1, 6-17.

 Kua akakite a Mika, tetai atu peroveta a te Atua, e i te openga ka riro mai teia tamaiti ei tutara e ka anauia aia i “Betelehema Epharata.” (Mika 5:2) I te taime o to Iesu anau anga, te vaira e rua nga taoni i Iseraela to raua ingoa ko Betelehema. Okotai tei te pae ia Nazareta i te ngai apa tokerau o te enua, e tetai, tei te pae ia Ierusalema i Iuda. Te Betelehema i te pae ia Ierusalema tona ingoa i mua ana ko Epharata. Kua anauia a Iesu ki roto i te reira taoni, mei ta te totou tikai i akakite mai!​—Mataio 2:1.

Kua akakite tetai atu totou Pipiria e ka kapikiia te Tamaiti a te Atua “i Aiphiti.” Kua apainaia te tamaiti ra a Iesu ki Aiphiti. Kua akaokiia mai aia i muri ake i te mate anga o Heroda, i reira te akatupuanga i te totou.​—Hosea 11:1; Mataio 2:15.

I roto i te “ Te au Totou no te Mesia,” te au irava i raro ake i te upoko tuatua “Totou” tei roto i reira te au akakite anga no runga i te Mesia. E akaaite atu i teia ine ki te au irava tei papaia i raro ake i te upoko tuatua “Akatupu Anga.” Na te raveanga i teia ka akaketaketa maata atu i toou akarongo ki roto i te tika anga tikai o te Tuatua a te Atua.

Ia koe e akara matatio ra i teia au irava, e akamanako ana i taua tu totou kua tataia e anere ua atu mataiti i mua ake i to Iesu anau anga. Kua akakite a Iesu: “E tupu rai noku nei te au tuatua i tataia ki roto i te ture a Mose ra, e te au peroveta ra, e i te Salamo ra.” (Luka 24:44) Mei taau i rauka i te akapapu i roto i taau uaorai Pipiria, kua akatupuia ratou​—i te au akakite anga ravarai!