ATU hatene loloos Mesias mak sé, Maromak Jeová fó sai informasaun barak liuhusi profeta sira atu fó-hatene nanis kona-ba oinsá mak Salvadór neʼe sei moris, halaʼo knaar, no mate. Bíblia nia profesia sira-neʼe hotu sai loos iha Jesus Kristu. Mai ita haree profesia balu neʼebé fó sai nanis kona-ba Jesus nia moris no kuandu nia sei kiʼik.

Profeta Isaías fó-hatene nanis katak Mesias mak Liurai David nia bei-oan. (Isaías [Yesaya] 9:7) Ikusmai, Jesus moris duni husi David nia umakain.—Mateus 1:1, 6-17.

Maromak nia profeta ida seluk naran Miquéias, fó-hatene nanis katak labarik neʼe sei moris iha “Belein Efrata”, no ikusmai sei sai ukun-naʼin. (Miquéias [Mikha] 5:2) Iha tempu neʼebé Jesus moris, iha sidade rua neʼebé naran Belein iha rai-Izraél. Ida iha parte norte besik Nazaré, no ida seluk, besik Jeruzalein iha rai-Judeia. Belein neʼebé besik Jeruzalein uluk iha naran Efrata. Jesus moris duni iha sidade neʼe hodi tuir liafuan neʼebé hakerek nanis ona!—Mateus 2:1.

Bíblia fó-hatene nanis katak Maromak sei bolu nia Oan-Mane hodi sai “husi Ejitu”. Kuandu Jesus sei kiʼik, nia inan-aman lori nia ba rai-Ejitu. Maibé bainhira Liurai Herodes mate tiha, sira lori Jesus sai husi Ejitu atu fila fali ba rai-Izraél, nuneʼe, liafuan neʼebé Bíblia fó-hatene nanis sai loos duni.—Oséias (Hosea) 11:1; Mateus 2:15.

Iha pájina 231 husi livru neʼe, iha lista kona-ba eskritura sira iha parte “ Profesia”. Eskritura sira-neʼe fó sai informasaun oioin kona-ba Mesias. Halo favór, kompara eskritura hirak-neʼe ho eskritura sira iha parte “Sai loos”. Hodi halo nuneʼe, Ita bele hametin liután Ita-nia fiar katak Maromak nia Liafuan mak loos.

Kuandu Ita lee didiʼak eskritura sira-neʼe, hanoin-hetan  katak liafuan hirak-neʼe hakerek tiha tinan atus ba atus antes Jesus moris. Jesus hatete: “Buat hotu neʼebé hakerek iha Ukun-Fuan Moisés nian no profeta sira no mós Salmu sira kona-ba haʼu tenke sai loos.” (Lucas 24:44) Bíblia hatudu ho klaru katak buat hotu-hotu neʼe sai loos duni!