INTOAGNE iaby ty raha nanoe i Jehovah Andrianagnahare hahafantarantikagne i Mesia. Nisy mpitoky maro nanoratse ty miomba ty hiterahagne o Mpandrombake nampitamaegne iohoe naho ty fanompoa’e sady ty hifateza’e. Niavy eo iaby ze raha  nitokie ty Baiboly miomba i Jesosy Kirisity. Mahalatsa fa maregne naho ahatreavagne raha maro o raha rehoe. Handineke raha tsy ampe nitokiegne miomba ty hiterahagne i Mesia naho ty naha anak’ajaja aze tikagne mba hahatreavagne izay.

Nirehake ty Isaia mpitoky fa ho boake amy ty tarana i Davida  Mpanjaka ty Mesia. (Isaia 9:6) Le ty tarana i Davida vata’e ty niboaha i Jesosy.—Matio 1:1, 6-17.

Nirehake ka ty Mika mpitokin’Andrianagnahare fa ho mpifehe o ajaja iohoe, sady haterake a “Betilehema Eoforata” agne. (Mika 5:2) Nisy tanàgne roe atao tihoe Betilehema ta Isiraely agne, tamy ty andro niterahagne i Jesosy. Ty raike tavaratse agnila i Nazareta agne. Ty raike marine i Jerosalema, a Joda agne. I Eoforata ty nifanognonagne ty Betilehema marine i Jerosalema tie taolo. Tao vata’e ty niterahagne i Jesosy, fa izay ty raha nitokiegne miomba aze!—Matio 2:1.

Nitokie ty Baiboly ka fa hotokavegne “hisintake boake Ejipita” agne i Anak’Andrianagnaharey. Nindesegne ta Ejipita agne ty Jesosy tamy tie mbe nikede. Nindesegne niheregne reke naho fa nimate ty Heroda. Izay ty magnamaregne fa niavy eo i raha nitokiegney.—Hosea 11:1; Matio 2:15.

Magnazava ty miomba i Mesia ty andalan-teny amy ty peje faha-200, ambane tihoe “ Raha Nitokiegne.” Ampirao amy ty andalan-teny ambane tihoey “Fiavia’e.” Hagnamafe ty finoa’o ty Saontsin’Andrianagnahare ty fanoagne izay.

Ko haligno naho fa mamaky o andalan-teny rehoe rehe, fa an-jato taogne taloha ty niterahagne i Jesosy ty nanoratagne ty raha nitokiegne ila’e. Hoe ty Jesosy: “Tsy mahaintsy ho avy eo ze raha sinoratse miomba ahy amy ty lily i Mosesy naho amy ty Mpitoky vaho amy ty Salamo.” (Lioka 24:44) Hamaregno soa agnate ty Baiboli’o ao fa niavy eo iaby vata’e zay!