KANU aingarakin oni ajenun Mesia, abu Edeke Yawe koinak inabin luka Ebaibuli aidwar akiro nuipu nuikamunitos aurio, aijanakin ka atwanare naka Ekalakunan kalo. Ngun kere nuadwarit Ebaibuli apotu kitodolikinos kane ajai Yesu Kristo. Eraasi nu nuijaikitai kaidules ido kibecokina koipone kalo  eumokina. Kanu aituput nu, kaanyutu ber oni adwareta adis nuikamunitos aurio kede apoloun naka Mesia.

Abu enabi Isaia kodwarite ebe, ebuni Mesia alomun kokek loka Ekabaka  Daudi. (Isaia 9:7) Aponi teni kourunai Yesu kokale loka Daudi.​—Matthew 1:1, 6-17.

Mika, enabi bobo ece loka Edeke adwarit ebe, ebuni ikoku  yen araun ekepugan ido ebunio aurikin ngesi “Bet-lekem Epurata.” (Mika 5:2) Kapaarasia nu auriere Yesu, ajaasi ibomaei iyaarei toma Isirael lu anyaritai Bet-lekem. Ediopet ajai engalakimak naka eboma loka Nasaret, ido ece edunyasi ka Yerusalem kotoma Yuda. Bet-lekem naedunyasi ka Yerusalem anyaritai sek Epurata. Aponi kourikinai Yesu oboma ngopengon kwape cut adwaritere!​—Matayo 2:1.

Adwarasit ace naka Ebaibuli enerit ebe, enyarauno Okoku loka Edeke “anyoun koMisiri.” Aponi koyangarai ikoku Yesu Misiri. Kinyakunai akaulo natwania Kerode, aitodolikin nuadwaritai.​—Kosea 11:1; Matayo 2:15.

Toma asaduka naejai apapulai 200, awadikaeta nuka Ebaibuli nuibwaikitai kwap naka akou, “Adwarasit” ejaatar nuipu kaidules nuikamunitos Mesia. Kilipitai do kitirian nu kede isulai nuijakitai kwap naka akou “Aitodolikinet.” Aswam kwangin, ebuni aiyatakin aitogogong aiyuun kon nejai abeit naka Akirot ke Edeke.

Neingicia ijo awadikaeta nu nuka Ebaibuli, kojen ebe ngun nuadwaritai kewadikatai sek ikaru akwat kakwat keringa euruna Yesu. Etetemit Yesu atiar: “Ibusakinit kitodolikinos akiro kere nuiwadikatai kokisila luka Musa, ka inabin, ka isabulin, nukabeito.” (Luka 24:44) Kwape ipedoria ijo aitigogong kotoma Obaibuli kon, apotu nu kitodolikinos​—kaidules cut!