KE FESOASOANI mai ke iloa tonu ne tatou te Mesia, ne fakamalosi aka ne Ieova te Atua a nisi pelofeta e tokouke ke tusi ki lalo i te Tusi Tapu a nisi fakamatalaga e uiga ki te fanaumaiga, te galuega, mo te mate o te Fakaola telā ne folafola mai. Ne fakataunu a  valoaga katoa konei i te Tusi Tapu ki a Iesu Keliso. E ‵tonu ‵kisi eiloa a fakamatalaga likiliki konā. Ke fakatalitonu aka te mea tenei, ke na mafau‵fau nei tatou ki mea kolā ne ‵valo mai e uiga ki te fanaumaiga o te Mesia mo te taimi koi foliki ei a ia.

Ne ‵valo mai ne te pelofeta ko Isaia me ka vau te Mesia i te gafa o te Tupu ko Tavita. (Isaia 9:7) Ne fanau mai eiloa Iesu i te gafa o Tavita.—Mataio 1:1, 6-17.

 Ne ‵valo mai ne te suā pelofeta a te Atua, ko Mika, me ka fai fakamuli te tamaliki tenei mo tupu kae ka fanau mai a ia i “Peteleema Efalata.” (Mika 5:2) I te taimi ne fanau ei a Iesu, e lua a fa‵kai i Isalaelu ne fakaigoa ki Peteleema. E tasi te fa‵kai e tu pili ki Nasaleta i te feitu ki mātū o te fenua, kae ko te suā fa‵kai, e tu pili ki Ielusalema, i Iuta. Ne fakaigoa muamua ki a Efalata a te Peteleema telā e tu pili ki Ielusalema. Ne fanau Iesu i te fa‵kai tenā, e pelā eiloa mo te mea ne folafola mai i te valoaga!—Mataio 2:1.

Ne folafola mai foki i te suā valoaga i te Tusi Tapu me ka ‘aumai keatea mai i Aikupito’ a te Tama a te Atua. Ne ave a Iesu ki Aikupito i te taimi koi foliki ei a ia. Mai tua o te mate o Helota, ne toe fakafoki atu ei a Iesu, telā ne fakataunu mai i ei te valoaga tenā.—Hosea 11:1; Mataio 2:15.

I te fakasologa o valoaga i te “ Valoaga e Uiga ki te Mesia,” a tusi siki kolā e fakasolo atu mai lalo o te ulutala ko “Valoaga” e aofia i ei a fakamatalaga likiliki e uiga ki te Mesia. Ke na fakatusatusa aka a tusi siki konei mo tusi siki mai lalo i te ulutala ko “Fakataunuga.” Kafai e fai penā, ka fakamalosi aka ei tou fakatuanaki ki te ‵tonu o te Muna a te Atua.

Kafai e fakatusatusa ne koe a tusi siki konei, masaua me ne tusi a valoaga konā i te fia selau tausaga a koi tuai o fanau mai a Iesu. Muna a Iesu: “Ke taunu katoa ki a au a mea kolā ne tusi i te Tulafono a Mose, mo tusi a pelofeta pelā foki mo te tusi o Salamo.” (Luka 24:44) E pelā eiloa mo te mea e mafai o fakamaoni aka ne koe i tau Tusi Tapu, ne fakataunu mai a valoaga katoa konā e ‵tusa eiloa mo fakamatalaga likiliki i ei!