NO TE tauturu ia tatou ia ite o vai te Mesia, ua faaurua te Atua ra o Iehova e rave rahi peropheta Bibilia no te horoa mai i te mau parau rii atoa no nia i te fanauraa, te taviniraa e te poheraa  o teie Faaora fafauhia. Ua tupu tera mau parau tohu Bibilia atoa i nia ia Iesu Mesia. E mea tano roa ino te reira e te mataratara maitai. Ei haapapuraa, e hi‘o mai tatou i te tahi mau parau tohu o tei faaite atea i te tahi mau tupuraa i taaihia i te fanauraa o te Mesia e to ’na tamarii-rii-raa.

 Ua tohu te peropheta Isaia e e na roto mai te Mesia i te arii Davida. (Isaia 9:7) Oia mau, ua fanauhia mai Iesu i roto i te opu fetii o Davida.—Mataio 1:1, 6-17.

Ua tohu Mika, te tahi atu peropheta a te Atua, e e riro tera tamarii ei arii e e fanauhia oia i “Bete-lehema Epherata.” (Mika 5:2) I te taime o to Iesu fanauraa, te vai ra e piti oire i Iseraela o Betelehema te i‘oa. Tei pihai iho te hoê ia Nazareta i te pae apatoerau o te tuhaa fenua, e tei pihai iho te tahi atu ia Ierusalema i Iuda. I parauhia na o Betelehema i pihai iho ia Ierusalema, o Epherata. Ua fanauhia Iesu i taua oire ra, mai ta te parau tohu i faaite atea!—Mataio 2:1.

Ua faaite atea te tahi atu parau tohu Bibilia e e “tii[hia]” te Tamaiti a te Atua “i Aiphiti.” I afaihia na Iesu i to ’na tamarii-rii-raa i Aiphiti. Ua faaho‘ihia mai oia i muri a‘e i te poheraa o Heroda, a tupu atu ai te parau tohu.—Hosea 11:1; Mataio 2:15.

I roto i te tapura “ Parau tohu no nia i te Mesia,” te vai ra te mau parau rii no nia i te Mesia i roto i te mau irava i raro a‘e i te upoo parau “Parau tohu.” A faaau atu na e te mau irava i raro a‘e i te upoo parau “Tupuraa.” Ia na reira outou, e puai atu â ïa to outou faaroo i te tanoraa o te Parau a te Atua.

A hi‘opoa ’i outou i teie mau irava, a haamana‘o e ua papaihia te mau irava parau tohu e mau hanere matahiti hou Iesu a fanauhia ’i. Ua parau Iesu e: “Ia hope te mau parau atoa no ’u i papaihia i roto i te ture a Mose, e te mau peropheta, e te salamo i te faatupuhia e tia ’i.” (Luka 24:44) Mai ta te Bibilia e faaite maitai ra, ua tupu mau â te reira—i roto i te mau tuhaa rii atoa!