BASI mabuligan kita nga makilala an Mesias, giniyahan ni Jehova nga Dios an damu nga mga propeta han Biblia ha paghatag hin mga detalye mahitungod han katawo, ministeryo, ngan kamatayon hini nga iginsaad nga Manluluwas han katawohan. Ini ngatanan nga mga tagna han Biblia natuman kan Jesu-Kristo. Urusahon an pagkahusto  ngan pagkadetalyado hito. Ha pag-ilustrar hini, aton paghisgotan an pipira nga mga tagna nga nagtagna han mga hitabo nga may kalabotan ha katawo ngan pagkabata han Mesias.

Hi propeta Isaias nagtagna nga an Mesias magtitikang ha tulin ni Hadi David. (Isaias 9:7) Hi Jesus natawo gud ha katulinan ni David.—Mateo 1:1, 6-17.

 Hi Mika, nga usa pa nga propeta han Dios, nagtagna nga ha kataposan ini nga bata magigin magmarando ngan matatawo hiya ha “Betlehem Eprata.” (Mika 5:2) Ha panahon han katawo ni Jesus, may-ada duha nga bungto ha Israel nga ginngaranan nga Betlehem. An usa nahimutang hirani ha Nasaret ha norte nga rehiyon han nasud, ngan an usa pa, hirani ha Jerusalem ha Juda. An Betlehem nga hirani ha Jerusalem tinawag hadto nga Eprata. Natawo hi Jesus didto hito nga bungto, sugad gud han igintagna!—Mateo 2:1.

An usa pa nga tagna han Biblia nagsiring nga an Anak han Dios tatawagon “tikang ha Ehipto.” An bata nga hi Jesus gindara ngadto ha Ehipto. Iginbalik hiya katapos nga namatay hi Herodes, salit natuman an tagna.—Hosea 11:1; Mateo 2:15.

Ha tsart ha pahina 200, an mga teksto nga iginlista ilarom han ulohan nga “Tagna” nagsasaysay hin mga detalye mahitungod han Mesias. Alayon itanding ini ha mga teksto nga iginlista ilarom han ulohan nga “Katumanan.” An pagbuhat hito mas magpaparig-on pa han imo pagtoo ha pagkatotoo han Pulong han Dios.

Samtang gin-uusisa mo ini nga mga teksto, hinumdumi nga adton mga tagna iginsurat ginatos ka tuig na antes pa matawo hi Jesus. Hi Jesus nagsiring: “Kinahanglan matuman an ngatanan nga mga bagay nga nahisurat mahitungod ha akon ha Kasugoanan ni Moises, ngan han mga Manaragna, ngan ha mga Salmos.” (Lukas 24:44) Sugad han matin-aw nga ipinapakita han Biblia, natuman gud ito—ha tagsa nga detalye!