MƆGƆ minnu dalen bɛ Ala-sabaya ko la, olu b’a fɔ ko Ala ye Fa, Denkɛ ani ni [hakili] senu lajɛlen ye. U b’a fɔ ko olu saba bɛɛ ye kelen ye, ko u bɛɛ ye se-bɛɛ-tigi ye ani ko daminɛ t’u la. Ka kɛɲɛ ni o kalansiraw ye, Fa ye Ala ye, Denkɛ ye Ala ye ani ni [hakili] senu fana ye Ala ye. Nka o bɛɛ n’a ta, Ala kelenpe dɔrɔn de bɛ yen.

 Mɔgɔ caman minnu dalen bɛ Ala-sabaya kalansira la, u tɛ se ka o kalansira ɲɛfɔ. A bɛ se ka kɛ k’u bɛ miiri ko o fɔlen bɛ Bibulu kɔnɔ. A nafa ka bon k’a dɔn ko “Ala-sabaya” daɲɛ tɛ Bibulu fan si kɔnɔ. Nka, yali Ala-sabaya hakilina bɛ sɔrɔ Bibulu kɔnɔ wa? Walisa ka o ɲininkali jaabi, mɔgɔ minnu dalen bɛ Ala-sabaya la, tuma caman na, o mɔgɔw bɛ Bibulu tɛmɛsira kelen min fɔ ka u ka kuma kɔkɔrɔdon, an ka o lajɛ.

Yuhana 1:1 b’a fo ko “Fɔlɔfɔlɔ, sani diɲɛ ka da, min bɛ wele Kuma, o tun bɛ yen. Kuma tun bɛ Ala da fɛ, o Kuma tu ye Ala de ye.” Kɔfɛ, o tilayɔrɔba kelen kɔnɔ, ciden Yuhana y’a jira k’a jɛya ko “Kuma” ye Yesu de ye. (Yuhana 1:14) Ikomi Kuma welela ko Ala, o bɛɛ n’a ta, dɔw b’a fɔ ko Denkɛ ni Fa ka kan ka kɛ Ala kelen fan dɔ ye.

I kana ɲinɛ ko nin Bibulu yɔrɔ sɛbɛnna fɔlɔ Gɛrɛkikan de la. Kɔfɛ, bayɛlɛmalikɛlaw ye Gɛrɛkikan sɛbɛnniw bayɛlɛma kan wɛrɛw la. O la sa, Bibulu bayɛlɛmalikɛla dɔw ma bara kɛ ni nin kumasen ye ko “Kuma tun ye Ala ye.” Mun na? Dɔnniya min tun bɛ u la Gɛrɛkikan ko la, u ye u sinsin o de kan. O de y’a to, u bɛnna a la ko o kumasen ka kan ka fɔ cogo wɛrɛ la. Cogo jumɛn na? Misali dɔw filɛ: “Lɔgɔs in [Kuma] tun bɔlen bɛ Ala fɛ.” (A New Translation of the Bible) “Kuma tun ye ala dɔ ye.” (The New Testament in an Improved Version) “Kuma tun ni Ala bɛ ɲɔgɔn fɛ ani Kuma tun bɛ i ko ale.” (The Translator’s New Testament.) Ka kɛɲɛ ni nin bayɛlɛmaliw ye, Kuma tɛ Ala yɛrɛ ye. * O la sa, ka kɛɲɛ ni jɔyɔrɔba ye min b’a bolo ka tɛmɛ Jehova ka danfɛn bɛɛ kan, Kuma bɛ wele ko “ala dɔ.” O yɔrɔ la, “ala” daɲɛ kɔrɔ ye ko “setigi.”

Mɔgɔ fanba tɛ Grɛkikan Bibulu dɔn. O la sa, i bɛ se k’a dɔn  cogo jumɛn na ciden Yuhana tun b’a fɛ ka min fɔ tigitigi? I hakili jakabɔ nin misali kan. Karamɔgɔ dɔ ye fɛn dɔ ɲɛfɔ a ka kalandenw ye. Kɔfɛ, kalandenw ma bɛn ɲɛfɔli faamuyali cogo kan. U bɛ se ka o ko ɲɛnabɔ cogo jumɛn na? U bɛ se k’a ɲini karamɔgɔ fɛ, a ka kunnafoni wɛrɛw di u ma o ko la. Siga t’a la ko ɲɛfɔli wɛrɛ min kɛra u ye, o bɛ se ka u dɛmɛ ka o ko faamuya kosɛbɛ. O cogo kelen na, walisa ka Yuhana 1:1 kɔrɔ faamu, i bɛ se ka kunnafoni caman wɛrɛw ɲini Yuhana ka kitabu kɔnɔ Yesu jɔyɔrɔ kan. N’i ye ɲinini caman kɛ o ko la, o bɛna i dɛmɛ ka kuma kuncɛli ɲuman sɔrɔ.

Misali la, a lajɛ Yuhana ye min sɛbɛn a ka kitabu tilayɔrɔba 1 la, tɛmɛsira 18 nan na: “Mɔgɔ si ma Ala [Se-bɛɛ-tigi] ye abada.” Nka hadamadenw ye Denkɛ Yesu ye, bawo Yuhana y’a fɔ ko: “O Kuma [Yesu] kɛra mɔgɔ ye ka sigi an cɛma. An y’a nɔɔrɔ lajɛ.” (Yuhana 1:14) O la sa, cogo jumɛn na Denkɛ bɛ se ka kɛ Ala Se-bɛɛ-tigi ye? Yuhana b’a fɔ fana ko Kuma tun bɛ “Ala da fɛ.” Nka cogo jumɛn na mɔgɔ dɔ bɛ se ka kɛ mɔgɔ dɔ da fɛ, ka kɛ o tigi ye o waati kelen na? Ka fara o kan, i ko Yuhana 17:3 b’a fɔ cogo min na, Yesu bɛ danfara jɛlen don ale ni a sankolola Fa cɛ. A b’a Fa wele ko “Ala sɛbɛ kelenpe.” Yuhana ka kitabu laban na, a b’a fɔ a ka kuma kuncɛli la ko: “Nin kow sɛbɛnna walisa aw ka da a la ko Yesu ye Krisita ye, Ala Denkɛ.” (Yuhana 20:31) I y’a kɔlɔsi ko Yesu ma wele Ala, nka Ala Denkɛ. Nin kunnafoni wɛrɛ min bɛ Yuhana ka kitabu kɔnɔ, o b’i dɛmɛ ka Yuhana 1:1 faamu. Yesu walima Kuma, o ye “ala dɔ ye”, n’o b’a jira ko jɔyɔrɔ kɔrɔtalen b’a bolo, nka Ala Se-bɛɛ-tigi tɛ.

An ka miiri tuguni karamɔgɔ ni a ka kalandenw ka misali la. A ka kɛ ko karamɔgɔ ye ɲɛfɔli jɛlen wɛrɛ minnu kɛ u ye, dɔw sigalen don hali sa o la. U bɛ se ka mun kɛ? U bɛ se ka karamɔgɔ wɛrɛ ɲininka o ko la. Ni karamɔgɔ filanan ye karamɔgɔ fɔlɔ ka ɲɛfɔli sɛmɛntiya, kalanden caman ka siga bɛ ban. O cogo kelen na, Yuhana ye min fɔ tigitigi Yesu ni Ala Se-bɛɛ-tigi cɛsira ko la, n’o sɛbɛnnen bɛ Bibulu kɔnɔ, n’i ma  da a la, i bɛ se ka kunnafoni wɛrɛw sɔrɔ Bibulu sɛbɛnnikɛla wɛrɛw fɛ. Misali la, Matiyu ye min sɛbɛn, an ka o lajɛ. Yesu ye kuma minnu fɔ diɲɛ sigicogo laban ko la, Matiyu bɛ olu fɔ, ko: “Nka mɔgɔ si tɛ o don ni o waati dɔn, hali sankolola mɛlɛkɛw t’a dɔn, Ala Denkɛ fana t’a dɔ, Fa Ala kelenpe de b’a dɔn.” (Matiyu 24:36) Nin kuma b’a sɛmɛntiya cogo jumɛn na ko Yesu tɛ Ala Se-bɛɛ-tigi ye?

Yesu ko Fa bɛ caman dɔn ka tɛmɛ Denkɛ kan. Ni Yesu tun ye Ala Se-bɛɛ-tigi fan dɔ ye, o cogo la, a Fa tun bɛ fɛn minnu dɔn, ale fana tun bɛ o fɛn kelenw dɔn. O la sa, Denkɛ ni Fa tɛ se ka kɛ kelen ye. Nka dɔw b’a fɔ ko: ‘Yesu tun ye mɔgɔ ni Ala ye. Nin tɛmɛsira la, a mɔgɔlama de bɛ kuma.’ Nka, a ka kɛ ko o cogo de don, an bɛ mun fɔ ni [hakili] senu ko la? Ni o ni Fa tun ye Ala kelen fan dɔ ye, mun na Yesu m’a fɔ ko a Fa bɛ min dɔn, k’o fana b’o dɔn?

N’i taara a fɛ ka i ka Bibulukalan kɛ, i bɛna Bibulu tɛmɛsira caman wɛrɛw dɔn o ko kan. Olu bɛ tiɲɛ sɛmɛntiya Fa, Denkɛ ani ni [hakili] senu ko la.—Zaburu 90:2; Kɛwalew 7:55; Kolosekaw 1:15.