ABAR iglesiamar soged, Bab warbaa maye: Baba, Massi, geb Bab Burba. We wagsig, Trinidadye bidamalad. Geb sogmarbalid na ber emarbimarye, bela emarbii gangumarye, geb dulemar wissurbarye bia danimala. Degsoggua Trinidadgi sunmagmaladi sogmalad, Baba Bab Dummadye, Bab Massi Babmoye, geb Bab Burba Babmoye, deginigwale, sogmarbalid Bab wargwenna maye.

 We igargi sunmagmaladi mag na iddomalad odurdadmalale wissurdamala igi nueggwa emarga sogoe. Auggi sun binsamalad Biblia we ibmargi sunmagnaye. Deginigwale, Bibliagi be daggosulid soglenai Trinidad. Auggi, ¿ar wis Biblia Trinidadgi sunmagnadibe? We ibmar wisguega, soggwen anmar daggoena dulemar Bibliagi Trinidad naye sogega ebudamalad.

Juan 1:1 gine sognaid: “Gebe nega sagla unni baddo Gaya burba gudiid. We Gaya burba, Bab Dummadba gudiid, degi, we Gaya burba, Bab Dummad gued”. We sorbali, versículo 14 gine, apóstol Juan sogsad “Gaya Burba” soglenaidi Jesúsgi sunmagnaye (Juan 1:14). Versículo 1 gine soglenasoggu Gaya Burba Bab Dummadye, abar Biblia absomalad wegi narmaggar nai daggedba, binsaardamalad, Bab Dummad, e Massibo emarye, wemar Bab Dummadir gebye.

Auggi ebinsao, Juan 1:1 gebe narmaglesgu griegoba narmaglesad geb sorba baigan sunmaggedba ogwaleded. Ar Juan 1:1 gine sogna inigwale “we Gaya burba, Bab Dummad gued”, bamalad gaggasiggi abar deyob sogsasurmalad. ¿Ibigala? Griegoba nainsoggu, griego wismaladi, mer noar imaggega daggarmalad, wis ibmar baid soglebalir gebe. Be daggena igi abar Bibliamargi nanai: “Dule Bab Dummad giidi Gaya Burbanad”, “Gaya Burba Bab Dummad giidinad” (Juan. Texto y Comentario, de J. Mateos y J. Barreto, lectura alternativa; Los escritos originales de la comunidad del discípulo “amigo” de Jesús, de Senén Vidal). Weyob sogsamaladbali mag dagleged Gaya Burbaye soglenaidi Bab Dummad sunnad obarnasuli. Gangued niggadba Bab Dummad giidye bilenamogad. *

Biblia griego gayaba narmaglessoggu emi ibagi dulemar aa gagga aggu iddomalad. Degsoggu igi anmar wisgusale, ¿nue Juan ibu obarisa? We ibmar mag iddogegala anmar wegi sogoena: Maestro ibmar soggwengi burwigan odurdaggwissid. Auggi burwigandi emarbi abin iddossurmalad. Burwigan wisgumalaga maestro ibu nue obargwissina, ¿ibu imagmalar gebe? Gannar maestrosega egismarbalir gebed. Maestrosega egisdemalale nueggwa mag iddomaloed ibu maestro nue emarga soggwissina. Degsoggu anmar nueggwa wisgubiele Juan 1:1 gi nue ibu obarnai, anmar gannar Juan garda narmasad dagbalir gebed. Wegine anmar durdaggoed bule Jesúsdega nue Bab Dummadi. We ibmar anmar wisgusale, anmar wisgunoniggoed, Juan nue ibu obarisa.

Emisgindina anmar daggoena, Juan capítulo 1, versículo 18 gine, igi Juan narmasbali: “Dule gwen Bab Dummad [yeer gangued] dagdisulid”. Auggine dulemar Bab Massidina dagsamalad, daggena Juan weyob narmasbalid, Juan weyob sogsad: “We Gaya burba [Jesús], anmaryobi sanale san nigga gunonimogad, degine, anmar abargi sanale gudi gusmogad. Anmar e gangued yeer dagleged dagsamalad” (Juan 1:14). Degsoggua ar sun Jesúsdega, Bab Dummad yeer ganguedga guosi. Juan sogsabalid, Gaya Burba “Bab Dummadba gudiinye”. Dule wargwen dule baidba gudiile, igi degiddega agga we duledega aa dule balode, ¿sun deyobosi? Juan 17:3 gine Jesús ise sogar imasad e Baba ebo aggarye, e Babgi sunmasgua sogsad we dina “Bab Dummad sunsogedye”. Berguedsiggi Juan weyob narmasad: “Ar wemar narmaglesaddi, bemar mer bengumalagalad: We Jesús, Bab Dummad dule wargwen barmidagoye sogsad dule sunnadye. We Jesús, Bab Dummad Massi sunnadye” (Juan 20:31). Nueggwa be we versículo daggena, soglenasulid Jesús, Bab Dummadye, sognaid, Jesús Bab Dummad Massiye. Bela we ibmarmar narmaglesad, anmar nueggwa mag  iddo guegala Juan 1:1 gine nue ibu obarnai. Degsoggu, Gaya Burbaye soglegedi Jesús obared, Bab Dummadyobi dule dummadmogad, auggi Bab Dummad yeer gangued sursunnad.

Anmar gannar maestrogine sunmagbaloena. Emisgindina anmar sogoena abar burwigan anba iddosursaarmalad, ¿ibu imasmarbalile? Nabbi wisguegala Maestro baidse sun egismalad. Emisgindina maestro baid, idualedyob emarga sogdemogale, emidi burwigan bar egi benguosurmalad, dagdamaloed we maestro nabir sogsana. Aayobmogad dule anba nue aggu iddogele ibu Juan obarisa, sun baidsiggi amibalid nue mag iddo guega. Anmar daggoena Mateo igi sogsamoga. Mateo weyob Jesús ibmar sogsad narmasad: “Ar an daniggoed ibadi, degi, aa wassidi dule gwen wissulid, angermar nibnegginmaladse baggar gwen wissurmalad, unnila an Bab Dummadbi wisid sana an daniggoe” (Mateo 24:36, Bab Dummad Jesucristoba Igar Mesisad Garda). ¿Wegine sognai be dagge Jesús Bab Dummad yeer ganguedye?

Jesús sogsad, e Bab ebali bur bule ibmar wisye. Jesús, Bab Dummad yeer ganguedina, Bab Dummad ibmar wisid wismogoenad. Degsoggu mag dagleged Jesús e Babbogwa aggalad. Sun dule sogdabalid: “Jesús nibneggi gudigu Bab Dummaddinye, geb nabbanegse nonigu dulega gusadba wissulinaddeye”. Degisundibe, ar Bab Dummad Burbadi, ¿igi gusdamosunna? Bab Burba Babmogale, ¿ibiga Jesús sogsasuli Bab Burba we iba wismoye? Jesús sogsad, unnila Bab Dummadbii we iba wisye.

Biblia durdagmaidbali nabbi be we igar durdagmaoed. Weyobi be durdagmaoed igi nue Bab Dummad igar mai, igi nue Bab Dummad Massi igar mamoga, geb Bab Dummad gangued nue ibumoga (Salmo 90:2; Gusmalad 7:55; Colosenses 1:15).