BAP, Put ani Povitr Otmo vo Povitr Xokti, he tinui ek mhunn trindad patietat te lok mhunnttat. Hea xikounne pormonnem, tankam te tigui ek-sarkech, tigui Sorpodvedar, ani tigankui survat na oxem dista. Te bapak dev, putak dev ani povitr xoktekui dev mantat. Tankam te, tin veg-veglle dev nhoi, punn tinui mellon ek Dev mhunnttat.

Trindad manpi khubxe lok, tanchean hi xikounn dusreank somzaunk zaina mhunn manun ghetat. Torui, hi xikounn Bible-antli oxem tankam dista. Khorem mhunnttlear Bible-ant, Trindad hem utor khoinch na. Punn tantunt, hea xikounne vixim tori kitem-i asa? Trindad manunk, choddso lok Bible-antlem ek vachop uzar kortat. Tacher niall kelear amkam hea prosnacho zobab mellttolo.

Juanv 1:1 mhunntta, “Orombak soglle rochnne adim, Sobd aslo, ani Sobd Deva sovem aslo ani Sobd Dev aslo.” Heach odheai-ant apostl Juanv, “Sobd” mhunnttlear Jezu mhunn dakhoun dita. (Juanv 1:14) Punn voilea vachpant Sobdak Dev mhunnttla dekhun, Bap ani Put ekuch Dev oxem thodde mhunnttat.

Bible-acho ho bhag Grik bhaxen boroilolo. Magir, to anik zaitea bhasamnim bhaxantor zalo. Khubxea bhaxantor kortoleamnim, “Sobd Dev aslo” him utram uzar korunk na. Kiteak? Bible-ant uzar kel’lea Grik bhaxechea somzonne pormonnem, tim utram dusrea toren bhaxantor korchi goroz asa mhunn tannim tharailem. Ami thoddim udharonnam polloum-ia. “Sobd ek dev aslo.” (The New Testament in an Improved Version) “Sobd Deva sovem aslo ani taka tachea sarkech gunn asle.” (The Translator’s New Testament) Tor hea bhaxantoram pormonnem, Sobduch Dev oxem mhunnonk na. Punn, Devachea her rochnnam modem taka vhodd podvi asa dekhun, Sobdak “ek dev” mhunnttla. Hanga “dev” mhunnche “podvedar” oso orth zata, “Sorpodvedar” nhoi.

Aiz zaitea lokank Grik bhas somzona. Toxem zalear, apostl Juanvan boroilam tacho sarko orth amkam koso kollttolo? Eka udharonna vixim chintat. Somza, ek xikxok bhurgeank ek vixoi xikoita. Punn bhurgim to veg-vegllea toren somzon ghetat. Toxem zalear, khoinchi somzonni sarki, hem koxem kollttolem? Tannim xikxoka koddchean anik mahiti ghetli zalear to vixoi bore toren somzonk tankam modot zatoli. Toxench Juanv 1:1 hea versacho sarko orth zannam zaunk, tumchean teach pustokant, Jezuchea podve vixim chodd mahiti polloum ieta. Oxem kel’lean, to vixoi sarke ritin somzonk tumkam modot mellttoli.

Udharonnak, odheai 1 ani vers 18-ant Juanv mhunntta, “Devak konnem kodinch polleunk na.” Punn Jezuk munxamnim polloila, ani takach lagon Juanv sangta, “Sobd monis zaun dixtti poddlo: ani oxem Tannem amche modem tthikann kelem. Tachi mhoima ami dekhlea.” (Juanv 1:14) Toxem zalear, put Sorpodvedar Devacho ek bhag mhunn koxem mhunno ieta? Juanvan, “Sobd Deva sovem aslo” mhunn sanglam. Toxem zalear, to ani Dev, ek koso asonk xokta? Juanv 17:3-ant, Bap ani put eka-meka pasun veglle mhunn Jezun sarkem dakhoun dilem. Thoinch, to aplea Bapak ‘ekloch khoro Dev’ mhunntta. Ani xevottak Juanv sangta, “Jezu khoreponnim Krist ani Devacho Put mhunn tumi bhavarth dhorche khatir heo vostu boroun dovorleat.” (Juanv 20:31) Hanga Jezuk Devacho put mhunnttla, Dev nhoi. Juanvachea pustokant dilolea hea odik mahiti voilean, Juanv 1:1-ant boroilam tem koxem somzochem tem amkam kollon ieta. Tantunt, Jezuk sobd vo “ek dev” mhunnttla karonn taka podvi asa. Punn to Deva sarko Sorpodvedar nhoi.

Xikxok ani bhurgeanchem udharonn porot ugddasak haddat. Somza, xikxoka koddchean anik mahiti ghetlea uprantui, tea bhurgeank dubhav asa. Hea vellar tannim kitem korunk zata? Tanchean dusrea xikxoka kodden, tea  vixoi-acher anik vicharunk zata. Ani dusrea xikxokan, poilea xikxoka sarkich somzonni dili zalear, bhurgeank tea vixoi-acher anik dubhav urchona. Toxench, Jezu ani Sorpodvedar Deva vixim, Juanv sangta tem sarkem somzonk na zalear, tumi dusro boroupi kitem mhunntta tem pollounk zata. Udharonnak, Matevan kitem boroilem tem polloum-ia. Kallachea xevotta vixim Jezuchim utram ugddas korun to mhunntta, “Ekleach Bapak kaddun anink konnakuch, sorginchea dutank vo Putak legun, tea disachi ani te ghoddiechi khobor na.” (Matev 24:36) Tor him utram, Jezu Sorpodvedar Dev nhoi mhunn koxim dakhoun ditat?

Hea utram voilean, Puta poros chodd Bap zannam mhunn Jezu sangta. Sorpodvedar Devacho, Jezu ek bhag zalear, Bapak khobor asa tem soglem putui zannam astolo aslo nhoi! Tor, Put ani Bap ek, oxem amchean mhunnonk zaina. Torui, thoddo lok mhunnot, ‘Jezuk don rupam aslim, ani hea zagear to munxachea rupan uloita.’ Punn hem khorem mhunn manun ghetlear pasun, povitr xokte vixim kitem? Ti-ui Devachoch bhag zalear, Bap zannam tem Povitr xokti zannam oxem Jezun kiteak mhunnonk na?

Zoxim tumi Bible-a vixim xikot ravtolim, tantuntlea her pustokamnim hea vixoi-acher kitem boroilolem asa, tem tumkam kollon ietolem. Tim vachpam, Bap, Put ani povitr xokte vixim sot zannam zaunk tumkam modot kortolim.—Stotr 90:2; Itihas 7:55; Koloskarank 1:15.