EESHII eeka nanoujain sünain apünüinshin sümaa waneeshiain Maleiwa. Naashin, wanaawashi Jeʼwaa nümaa Jesuu otta tü Nütchinkat Maleiwa, pülashii sümaa eetüjüliin naya namaiwa. Na apünüinshiikana nia neʼe Maleiwa naashin.

Na anoujakana sünain tia isasü nachiki naküjüin jamüin apünüinka Maleiwa sümaa waneeshiain nia. Shikirajala shia tü Wiwüliakat naashin. Akatsaʼa, nnojoluin süküjüin tü Wiwüliakat tia. ¿Eesüche suluʼu tü Wiwüliakat wanee pütchi eeʼiyatünaka apünüinshin sümaa waneeshiain Maleiwa? Süpüla wasouktüin shiʼipajee, wekirajaa sünain wanee pütchi eeʼiyateeka tia.

Müsü Juan 1:1: ‹Jesukürisüto, kanüliashi «Pütchi» münüin. Eetüjüʼiya nia nnojolüiwaʼaya kasain eein sooʼopünaa tü mmakat. Nümaatüjüʼiya Maleiwa sünain wanaawain nia nümaa›. Wünaapünaa sünain kapiitulokat tüü, nüküjüin Juan niain Jesuu chi «Pütchi» münakai (Juan 1:14). Sutuma tia, nia neʼe Maleiwa Jesuu saashin wayuu.

Soto waaʼin ashajuushin süka griego saʼata tü Wiwüliakat otta sülatiruushin süka wainma anüikii. Mayaapejeʼe süshajünüin suluʼu waneeirua Wiwülia niain ‹Maleiwa chi pütchi münakai›, eeshii eeka naatain sukuwaʼipa natuma. ¿Jamüsü naainjaka tia? Shia sutuma nekirajaain maʼin sünain tü griego ashajünakalü aka tü Wiwüliakat, nayaawatüitpa aaʼu naatainjatüin sülatiria tü pütchikat süpüla wanaawainjatüin shia sümaa tü ashajünakat sümaiwa. Wekirajaa sünain süpüshi tia: «Pütchi münüshi wanee maleiwa», «chi Pütchi münakai maleiwa nia» otta «maleiwa chi Pütchikai» (Juan. Texto y Comentario, de J. Mateos y J. Barreto, lectura alternativa; Los escritos originales de la comunidad del discípulo “amigo” de Jesuu, de Senén Vidal; Cuarto Evangelio. Cartas de Juan, de J. J. Bartolomé). Saashin tia Wiwüliakalüirua, nnojoishi niain Maleiwa chi Pütchi münakai. * Tü süküjakat tia wetsiikulokot shia Laülaain Jesuu napüleerua na nukumajalakana Jeʼwaa, makalaka «maleiwa» nümünüin. Ashajünüsü tü pütchikat Maleiwa süka minuuskula suluʼu Juan 1:1 sükajee naashajaanüin achiki «wanee pülashi».

Nnojotsü natüjaain aaʼu tü griego ashajünakalü aka tü Wiwüliakat noʼutku na wayuukana. Sünainjee tia, ¿jamüsü süpüla watüjaain saaʼu tü nüküjakat Juan? Weʼitaa wanee shiyaawase. Eeshi wanee ekirajüi, ekirajüshi nia. Mapa naatawaiyaa müsü nanüiki na nikirajüinkana süchiki tü nikirajakalü  anain. ¿Kasa naainjainjatka na nikirajüinkana süpüla natüjaain saaʼu tü nikirajakalü anain naya? Achuntajana nümüin chi ekirajüikai nekirajüin naya sooʼomüin. Sükajee tia, natüjaajeerü aaʼu tü nümakat namüin. Müshiʼiya waya, süpüla watüjaain saaʼu tü süküjakat Juan 1:1, wekirajaainjatü anain tü karaloukta nüshajalakat Juan. Yala wachajaajeerü sooʼomüin tü aküjünakat nüchiki Jesuu. Watüjaapa saaʼu wayaawateerü aaʼu jamaluʼuluin tia pütchikat.

Wekirajaa sünain tü nüshajakat Juan suluʼu kapiitulo 1, wetsiikulo 18: «Nnojotsü wayuu eekai shiʼrüichin Maleiwa [chi Pülashikai maʼin]». Akaisaʼa Jesuu, chi Nüchonkai Maleiwa shiʼrüin nia wayuu. Müshi Juan: ‹Cristo, chi kanüliakai Pütchi, wayuulaa müshi süpüla kepiainjachin waʼaka› (Juan 1:14). Sünainjee tia pütchikat, nnojoishi wanaawain Jesuu nümaa chi Maleiwa pülashikai maʼin. Naashin Juan, chi kanüliakai «Pütchi» «nümaajachi Maleiwa». ¿Jamüshi süpüla nümaajachi nümünüinjachin wanee wayuu sümaa niainya neʼe nia? Suluʼu Juan 17:3 nüküjüin Jesuu naatain nia nuulia chi Nüshikai, müshi nia: ‹Waneeshia pia sünain Maleiwain›. Sajaʼttiamüin tü nüshajalakat Juan, müshi nia: ‹Tü tashajakat jümüin, tashajüin süpüla junoujain sünain niain Jesuu chi Nüchonkai Maleiwa› (Juan 20:31). Suluʼu wetsiikulokot tüü nnojotsü aküjünüin niain Jesuu Maleiwa, aküjünüsü Nüchoin nia. Süpüshuaʼa tü eʼitaanakat suluʼu tü nüshajalakat Juan shiiʼiyatüin wamüin jamaluʼuluin tü sümakat Juan 1:1. Jesuu, chi kanüliakai Pütchi, «maleiwa» nia sükajee Laülaain nia, akaisaʼa nia nnojoishi niain chi Maleiwa Pülashikai maʼin.

Soto waaʼin chi ekirajüikai. ¿Kaseerü naainjaka na wayuukana ayatüle nnojoluin natüjaain saaʼu tü nümakat? Eeshii süpüla nachajaain wanee ekirajüi süpüla napansaajirüin tü pütchikat. Wanaawale tü nümakat chi palajaikai ekirajüi sümaa tü nümakat chi wanee, natüjaajeerü aaʼu tia pütchikat. Meerü shia watuma nnojorüle watüjaain saaʼu tü nüküjakat Juan nüchiki Jesuu otta chi Maleiwakai. Eesü süpüla wachajaain sooʼomüin tü pütchikat sükajee tü nümakat Mateo  süchiki nünüiki Jesuu: «Nnojotsü sütüjaain aaʼu wayuu joujaleerüin sülatüin tü taküjaitpakat achiki jümüin, [sajaʼttajatüin tü kasa mojusükat]. Jaʼitakaje na aapiee chakana iipünaa, nnojotsü natüjaain aaʼu. Nia neʼe chi Tashikai Maleiwa atüjaaka saaʼu nümüiwa» (Mateo 24:36). Sutuma tia, ¿jamüshi nnojoika niain Jesuu chi Maleiwa Pülashikai maʼin?

Naashin Jesuu wainma tü nütüjaakalü aaʼu Jeʼwaa nuulia. Niale Jesuu chi Maleiwa pülashikai maʼin nütüjaainjee saaʼu tü nütüjaakalü aaʼu Maleiwa. Sutuma tia, nnojoishi wanaawain Jesuu nümaa chi Nüshikai. Eejeena eeka namüin: «Piamasü nukuwaʼipa Jesuu: meʼrujusai nia otta wayuu nia, aashajaashi nia yaaya maʼaka naaʼin wanee wayuu». Shiimainre tia, ¿jama tü nütchinkat Maleiwa? Shiimainre wanaawain nümaa Maleiwa, ¿jamüsü nnojotka nüküjüin Jesuu sütüjaain saaʼu tü nütüjaakalü aaʼu Maleiwa? Chi atüjaakai saaʼu tia naashin Jesuu nia neʼe Jeʼwaa.

Pikirajaapa maʼin sünain tü Wiwüliakat, pütüjaajeerü aaʼu wainma wetsiikulo aküjaka tü shiimainkat nüchiki Jeʼwaa, Jesuu otta tü nütchinkat Maleiwa (Alateetkat Mapeena 1:8; Aluwataaushikana 7:55; Colosas 1:15).