OVANDU mbe kambura momahongero wOutatumumwe, ve tja Mukuru u zikama movandu vetatu, Ihe, Omuna, nOmbepo Ondjapuke. Auhe wovandu vetatu mba ku za u ṱa pu imbo varwe, auhe omunamasaaehe, nu auhe ke nombutiro. Okutja otja komahongero wOutatumumwe, Ihe oMukuru, Omuna wina oMukuru,  nOmbepo Ondjapuke wina oMukuru, posi yokutja ngundee kuna Mukuru umwe uriri.

Ovandu ovengi mbe kambura mOutatumumwe ve itavera kutja kave yenene okukahururira varwe omahongero nga. Nowo ngundee mape ya ve kambura kutja omahongero ngo ye hongwa mOmbeibela. Posi yokutja tji wa tara mOmbeibela ka mu nembo ndi “Outatumumwe.” Nu hapo Ombeibela i nopoṋa pu i tamuna aayo Mukuru Outatumumwe? Okuzira epuriro ndo, rutenga ngatu tare kezeva rimwe ovayandjaruvara kOutatumumwe ndi ve ungurisa mokuvanga okuryamisa omahongero ngo komurungu.

Johanes 1:1, mari tja: “Ouye ngunda au hiya memwa, indi Embo tjandje opu ri ri; Embo ndi ra kara pu Ndjambi, nEmbo ondi ri Ndjambi.” Kombunda mekondwa tjingero, omuapostele Johanes wa raisa oukahu kutja “Embo” oJesus. (Johanes 1:14) Mena rokutja Embo ri isanewa Mukuru, ovandu tjiva ve muna kutja Omuna na Ihe mave sokurira Mukuru umwe uriri.

Tjiwa kutja orupa rwOmbeibela ndwi rutengatenga rwa tjangerwe mOtjigrike. Okuzambo ovatoroke ave tanaura omatjangwa wOtjigrike momaraka warwe. Posi yokutja, ovatoroke ovengi vOmbeibela kave ungurisire omambo nga ‘Embo ondi ri Ndjambi.’ Omena ratjike tji ve he ye ungurisire? Mena rondjiviro yawo yeraka rOtjigrike, Ombeibela mu ya tjangerwe, owo ve ya konḓuvasaneno yokutja omambo nga ‘Embo ondi ri Ndjambi’ maye sokutorokwa omuano warwe. Maye sokutorokwa vi? Tara kovihorera tjiva mbi: “Logos [Embo] ra sanene ku Mukuru.” (A New Translation of the Bible) “Embo ra ri puna Mukuru nu ra sanene ku ye.” (The Translator’s New Testament) Otja komatorokero nga, Embo ka Mukuru omuini. * Nungwari mena rotjihako tjaro tjokombanda moviutwa vyaJehova avihe, Embo ra ri otja Mukuru.

Ovandu ovengi kave tjiwa Otjigrike tji tja ungurisiwa okutjanga Ombeibela. Nu hapo, mo yenene vi okutjiwa kutja omuapostele Johanes tjiri aa hee tjike? Ripurira kotjihorera hi: Indu omiṱiri  tji ya kahurura epu rorive kovahongwa. Nu omuano ovahongwa mbu va zuu epu ndo tji wa panguka ku imbwi owomiṱiri, ovahongwa mbo otjiṋa hi mave tji zengurura vi? Mape ya ave pura omiṱiri kutja i ve kahururire komurungu. Owo tji va munu omakahururiro wokomurungu, matji ve vatere okuzuva epu ndo nawa. Momuano tjingewo, tji mo vanga okuzuva nawa kutja omambo nge ri mu Johanes 1:1 maye hee tjike, okutja mo yenene okutara mEvangeli raJohanes kokutja u mune ondjiviro yokomurungu ohunga nokutja Jesus oMukuru poo indee. Tji wa tara kouatjiri wokomurungu ohunga nepu ndi, matji ku vatere okuzuva epu ndi nawa.

Otjihorera tjarwe, tara ku imbi Johanes mbya tjanga komurungu mekondwa 1, ezeva 18: “Kape nomundu ngwa rorere okumuna Ndjambi [Omunamasaaehe].” Nungwari ovandu va muna Jesus, Omuna waMukuru, orondu Johanes ma tja: ‘Nu indi Embo [Jesus] ra rira omundu nari tura mokati ketu. Eṱe twa muna ongeṋangeṋeno ye.’ (Johanes 1:14) Nu hapo Omuna ma sokurira vi Mukuru Omunamasaaehe? Johanes wina ma tja Embo ra kara “pu Ndjambi.” Nu, mape ya vi omundu ma kare pu nomundu worive nu poruveze tjingero a rire omundu ngo? Nu kombanda yanao, otja ku Johanes 17:3, Jesus wa raisa oukahu ombangu ndji ri pokati ke na Ihe womeyuru. Eye wa tja Ihe ‘ongu ri Ndjambi watjiri.’ Nu komaandero wEvangeli re, Johanes wa yarukira po epu ndi indu tja tjere: “Ovihimise mbi vya tjangerwa kutja eṋe mu kambure kutja Jesus ongu ri Kristus, Omuna waNdjambi.” (Johanes 20:31) Wa munu kutja Jesus kena ku isanewa Mukuru, nungwari ma isanewa Omuna waMukuru? Ondjiviro yokomurungu ndji, ndji ri mEvangeli raJohanes mai raisa omuano mbu matu sokuzuva omambo waJohanes 1:1. Jesus, Embo, ka Mukuru Omunamasaaehe.

Ripurira rukwao kotjisanekero tjomiṱiri novahongwa. Ngatu tje tjiva ngundee kave ya zuva nawa eziriro romiṱiri nandarire kutja ya roro okuvekahururira komurungu. Owo mave yenene okutjita vi? Mape ya ave kapura komiṱiri yarwe ohunga nepu ndo. Indu omiṱiri oitjavari tji ya raisa kutja omakahururiro womiṱiri indji ondenga ouatjiri, okutja ovahongwa mba mbu va ri amave keyakeya mape ya ave zuu epu ndi nawa. Momuano tjingewo, indu tji u hi nakutjiwa nawa kutja omutjange wOmbeibela Johanes tjiri aa heye tjike ohunga noupanga mbu ri pokati kaJesus na Mukuru  Omunamasaaehe, ove mo yenene okukapaha ondjiviro yokomurungu komutjange warwe wOmbeibela. Okutara kotjihorera, ripurira ku imbi mbya tjangwa i Mateus. Ohunga nomaandero wouye mbwi, Jesus wa tja: “Kape nomundu ngu ma tjiwa eyuva ndo na indji oiri, nangarire ovaengeli meyuru, nangarire ingwi Omuna posi yaTate omuini porwe.” (Mateus 24:36) Omambo nga maye ṋunisa vi kutja Jesus kaMukuru Omunamasaaehe?

Jesus ma tja Ihe u tjiwa ovingi okukapita Omuna. Nungwari andaku Jesus na Mukuru Omunamasaaehe omundu umwe, eye atja tjiwa oviṋa avihe Ihe mbi ma tjiwa. Pu mape hee kutja Omuna na Ihe kamaave sokuṱeka pamwe. Posi yokutja ovandu tjiva ngundee ve tja: ‘Jesus u noundu uvari. Imba ma hungire otjomundu.’ Nu andaku pe ri nao, pe ri vi ohunga nombepo ondjapuke? Ndoovazu oyo oMukuru otja Tate tje ri Mukuru, ongwaye Jesus tje hi nakutja oyo i tjiwa imbi Ihe mbye tjiwa?

Otja tji mo kayenda komurungu nomakonḓononeno wOmbeibela, ove mo utu okutjiwa omazeva omengi wOmbeibela nge ṱuna kepu ndi. Oyo ye ṋunisa ouatjiri ohunga na Ihe, nOmuna, nombepo ondjapuke.—Epsalme 90:2; Oviungura 7:55; Ovakolose 1:15.