KAGIAN na totolay nga mangurug ta Trinidad nga nakkatallu nga persona i Dios​—Ama, Ana, anna Espiritu Santo. Kagiadda nga awan tu mas atannang nira nga tallu, para-parehu ira nga makapangngua-ta-ngamin, anna awan tu namegafuanadda. Segun ta doktrina nga Trinidad, i Ama ay Dios, i Ana ay Dios, anna i Espiritu Santo ay Dios, ngem egga laman kanu tattadday nga Dios.

 Alawatan na aru nga mangurug ta Trinidad nga ariadda mepakanawag yaw nga tuddu. Maski nu kunnatun, kurugadda nga ituttuddu yatun na Biblia. Ngem ta kakuruganna, awan pulus tu termino nga “Trinidad” ta Biblia. Ngem mabibbig kari tatun i ideya nga Trinidad? Tape matabbag yatun nga pakkiavu, innattam i teksto ira nga maruddu nga usan danuri mangurug ta Trinidad.

Ta Juan 1:1, mabibbig tam: “Ta gafa-gafu ay egga ngana i Uvovug, anna i Uvovug ay kavulu na Dios, anna i Uvovug ay Dios.” (King James Version) Tatun gabbalaman nga kapitulo, manawag nga pinakurug ni apostol Juan nga si Jesus “i Uvovug.” (Juan 1:14) Megafu ta nagalan tu Dios i Uvovug, pagabbo na karuan nga i Ana anna i Ama ay parte na tattadday nga Dios.

Daddammammu nga netura ta Griego yaw nga parte na Biblia. Tapus, nebalittag i Griego nga teksto ta tanakuan nga lengguahe. Ngem ari nga neyusa na aru nga nangibalittag ta Biblia i termino nga “i Uvovug ay Dios.” Ngatta? Megafu ta pakannammuda ta Griego, mawag kanu nga tanakuan i kebalittag na yatun nga termino. Kunnasi? Yaw ira i angngarigan: “I Uvovug ay tadday nga dios.” (The New Testament in an Improved Version) “I Uvovug ay kavulu na Dios anna parehu i kasissinnadda.” (The Translator’s New Testament) Segun taw ira nga bersion na Biblia, i Uvovug ay ari tu yaya i mismu nga Dios. * Ngem nagalan i Uvovug tu “dios” megafu ta mas atannang i posisionna anne ta karuan paga ira nga pinaratu ni Jehova. I termino taw nga “dios,” kebalinanna, “tadday nga makapangngua.”

Aru nga totolay i ari makalippawa tu Griego. Kunnasi tam gafu mammuan i kebalinan na kinagi ni apostol Juan? Nonopammu yaw nga angngarigan: Maddaggun mattuddu i mestru. Ngem nadduruma i pakalippawa na estudiante ta ituttudduna. Anni i  mawag nga kuadda? Awayyada makkiavu ta mestru tu mas aru paga nga informasion. Siguradu nga makoffun yatun tape mas malippawada i ituttuddu na mestru. Tape mas malippawa tam gapa i kebalinan na Juan 1:1, bibbigattam i Ebanghelio ni Juan para ta aru paga nga informasion meyannung ta sinaddag ni Jesus. Makoffun i paggigiammu tu aru paga nga informasion tape fustu i pakalippawa tam.

Angngariganna, netura ni Juan ta kapitulo 1, bersikulo 18 nga “awan vuluvuga tu nakasingan ta Dios.” Ari tu kagitta na ana na Dios nga si Jesus nga nasingan na totolay. Nekagi ni Juan: “Nabbalin tu tolay i Uvovug [Jesus], anna nakipaddian nittam, anna nemammatattam i gloriana.” (Juan 1:14, KJ) Kunnasi gafu nga mabbalin i Ana tu parte na Makapangngua-ta-ngamin nga Dios? Nakagi paga ni Juan nga i Uvovug ay “kavulu na Dios.” Ngem kunnasi nga makagi nga kavulu na Uvovug i Dios nu yaya gabbalaman i Dios? Ta Juan 17:3 gapa, manawag nga nepasingan ni Jesus nga tanakuan yaya ta nelangitan nga Yamana. Inagalanna i Yamana tu “tattadday nga kurug nga Dios.” Tapus kinagi paga ni Juan ta ultimo na Ebangheliona: “Netura danaw tapenu mangurug kamu tu si Jesus i Cristo, nga Ana na Dios.” (Juan 20:31) Manawag nga si Jesus ay Ana na Dios, ari tu Dios. Makoffun yaw nga informasion tape fustu i pakalippawa tam ta Juan 1:1. Nagalan tu “dios” si Jesus megafu ta atannang i posisionna ngem ari tu kagitta na Makapangngua-ta-ngamin nga Dios.

Nonopammu uli i angngarigan meyannung ta mestru anna ta estudiante ira. Kunnasi nu madduda pagalaman i estudiante ira maski nu naginnada ngana i pakanawag na mestru? Anni paga i kuadda? Awayyada makkiavu ta tanakuan nga mestru. Nu parehas i kagian na mekadua nga mestru ta ollu nga mestru, malsa i padduda na estudiante ira. Kunnatun gapa i nekegittanna nu ariattam masiguradu nu anni nga talaga i kaya kagian ni Juan meyannung kani Jesus anna ta Makapangngua-ta-ngamin nga Dios. Awayyam bibbigan i netura na tanakuan paga ira nga nattura tu Biblia para ta aru paga nga informasion. Angngariganna,  i netura ni Mateo. Meyannung ta pangultimuan na sistema na gannagannug, neturana i kinagi ni Jesus: “Awan vuluvuga tu makannammu ta idadattal natun nga aggaw onu oras, maski i anghel ira ta langi onu i Ana; i Yama laman i makannammu.” (Mateo 24:36) Kunnasi nga mapakurug taw nga ari tu si Jesus i Makapangngua-ta-ngamin nga Dios?

Kinagi ni Jesus nga mas aru i ammu na Yama anne ta Ana. Nu Makapangngua-ta-ngamin gapa nga Dios si Jesus, ari kari tu ammuna nakuan i ammu na Yamana? Ari gafu nga parehas i Ana anna i Ama. Ngem kagian na karuan: ‘Tolay gare si Jesus turi ta nekagina yaw. Tanakuan turi ta egga yaya ta langi.’ Ngem maski nu kurug yatun, kunnasi gapa i masanto nga espiritu? Nu parte yaw na Dios kagitta na Ama, ngatta gafu ta ari kinagi ni Jesus nga ammu na masanto nga espiritu i ammu na Ama?

Durante nga maggigiammu ka tu Biblia, mabbalikka tu familiar ta aru paga nga teksto ta Biblia nga egga koneksionna taw. Yatun ira nga teksto, pakuruganna i kinakurug meyannung ta Ama, ta Ana, anna ta masanto nga espiritu.​—Salmo 90:2; Kingngua 7:55; Colosas 1:15.