O ATHU a xikina ku milongi ia Tilindade, amba kuma Nzambi uala mu kitatu kia athu—o Tata, o Mona, ni Nzumbi Ikôla. Athu atatu enhá, ene mu ku a amba kuma a sokela, ala ni kutena, kala ni dimatekenu. Kienhiki, kála kiamba o milongi ia Tilindade, o Tata, Nzambi, o Mona, Nzambi, o Nzumbi Ikôla, Nzambi ué, né kiki, kuala ngó Nzambi imoxi.

 Athu a vulu a xikina mu Tilindade, ejiia kuma ene ka tena ku jimbulula o milongi íii. Né kiki, ene nange a xikina kuma o milongi íii iala mu Bibidia. Tua tokala kuijiia kuma o kizuelu “Tilindade,” ki ki moneka mu Bibidia. O kuila o milongi ia Tilindade iala mu Bibidia? Phala ku tambuijila o kibhuidisu kiki, ndoko tu tale o kibatulu kiene mu tanga o athu a xikina mu Tilindade.

O divulu dia Nzuá 1:1 diamba: “Ku dimatekenu kioso mundu kiluua a u bhanga, ku kala o Diambu; o Diambu anga di kala kua Nzambi; o Diambu muène Nzambi.” Mu ku bhita kithangana, o poxolo Nzuá uedikisa mu kibatulu kiki, kuila “o Diambu” Jezú. (Nzuá 1:14) Mukonda o Diambu a di xana Nzambi, saí athu a banza kuila o Mona ni Tata, Nzambi imoxi ngó.

Ijiia-nakiu kuila o kibatulu kiki kia Bibidia, a dianga ku ki soneka mu dízui dia Ngeleku. Mu ku bhita kithangana, o atongoluelu a soneka o kibatulu kiki kia Ngeleku, mu mazui engi. Maji saí atongoluelu a soneka o Bibidia, ka soneka kuila, “o Diambu muène Nzambi.” Mukonda diahi? Mukonda dia kuijiia o dízui dia Ngeleku, o atongoluelu iâ a xinganeka kuila o Diambu muene Nzambi, a tokalele ku disoneka kiéngi. Eji disoneka kiebhi-phe? Tala o ifika bhabha: “O Logos [Diambu] uexile ngana.” (A New Translation of the Bible) “O Diambu diexile nzambi.” (The New Testament in an Improved Version) “O Diambu anga di kala kua Nzambi, ene exile umoxi ngó.” (The Translator’s New Testament) Kála kizuela o ji Bibidia jiji, o Diambu ki muene Nzambi. * Mukonda dia ku kala o anju ia dikota mu kaxaxi ka ji-anju ja Jihova, o Diambu a mu ixana “nzambi” bhabha, o kizuelu “nzambi” kilombolola “muteni” kana o Muteni-a-Ioso.

Athu a vulu kejiia o dízui dia Bibidia mu Ngeleku iokulu. Kienhiki, kiebhi ki u tena kuijiia se ihi ia mesenene kuzuela poxolo Nzuá? Xinganeka o phangu íii: O mesene ia xikola u longa o maka ku maxibulu mê. Kia zubha, kala dixibulu u tendela mu  ukexilu uê. Kiebhi o maxibulu kieji batula o maka enhá? Ene eji bhinga dingi ilombuelelu ku mesene. Sé phata, o ilombuelelu ia mukuá, ieji ku a kuatekesa ku tendela dingi kiambote o maka enhá. Kiene kimoxi ué, phala kuijiia se ihi ia mesenene kuzuela o divulu dia Nzuá 1:1, eie u tena ku sanga mu Njimbu ia Nzuá, o ilombuelelu ia vulu, ia lungu ni kididi kia Jezú. Ku di longa dingi ia lungu ni maka enhá, ia-nda ku kuatekesa kuijiia o kidi.

Mu kifika, xinganeka ia soneka Nzuá mu divulu didi mu kibatulu 1 mu velusu 18: “Kiluua kukala muthu u mona [Muteni-a-Ioso] Nzambi.” Maji athu a monene kiá Jezú, o Mona, kienhiki, Nzuá ua bandekesa dingi: “O Diambu anga u di bhanga xitu, anga u tunga mu’axaxe ketu, uezala ni kidi. Etu anga tu mona o unène uê.” (Nzuá 1:14, KJ) Kiebhi-phe o Mona kieji kala kála Nzambi o Muteni-a-Ioso? Nzuá uambe ué kuila o Diambu anga di kala “kua Nzambi.” Maji kiebhi o muthu uala ni mukuá kumoxi, mu kithangana kieniókio u tena ku kala muéne? (Nzuá 1:34) Kála kia ki soneka mu divulu dia Nzuá 17:3, Jezú uedikisa kiambote kuma muéne ni Tat’ê ia diulu, ka sokela. Muéne uambe kuila Tat’ê, “Nzambi ia kidi imoxi-èlele.” Mu disukilu dia Njimbu iê, Nzuá uambe: “Maji im’iíi-phe iòsoneke, phala enu ni mu xikane, kuma Jezú muène Kristu, Mon’a Nzambi.” (Nzuá 20:31) Tonginina kuma Jezú ka mu ixana Nzambi, maji Mona Nzambi. O ilombuelelu íii ia mukuá ia tu bhana o Njimbu ia Nzuá, ilondekesa kiebhi kia tokala ku tendela o divulu dia Nzuá 1:1. Jezú o Diambu, a mu ixana “nzambi,” mukonda dia kididi kiê kia ukota, maji ki kiene kimoxi o ku kala Nzambi Muteni-a-Ioso.

Xinganeka dingi mu phangu ia mesene ia xikola, ni mu maxibulu mê. Xinganeka kuila o maxibulu a mukuá ala hanji ni phata, né muene ni ilombuelelu ia a bhana dingi o mesene. Ene eji bhanga ihi? Ene, eji sota mesene iéngi phala ku a lomboluela dingi o maka. Se o mesene ia kaiiadi u lombolola kála kia lombolola o mesene ia dianga, o phata ia maxibulu ieji bhua. Kiene kimoxi ué, se uala ni phata ia lungu ni iambe Nzuá, o musoneki ua Bibidia, ia lungu ni kiebhi kiene Jezú, ni Nzambi Muteni-a-Ioso, ueji sota o musoneki ua mukuá ua Bibidia phala kuijiia dingi. Mu kifika, tanga ia soneka Matesu, ia lungu ni  dizubhilu dia mundu, muéne ua bhitulula o kizuelu kia Jezú, kioso kiambe: “Kizuu’okio-phe ni kithangana kiê, kana [muthu] ua k’ijiia, né ji-anju mu diulu, né o Mona, ki kale Tata muène ngó.” (Matesu 24:36) Kiebhi o kizuelu kiki kilondekesa kuma Jezú ki muéne o Nzambi Muteni-a-Ioso?

Jezú uambe kuila o Tata ua beta kuijiia dingi, o Mona, ndenge. Se Jezú uexile mbandu ia Nzambi o Muteni-a-Ioso, muéne ueji kuijiia ué ioso iejiia Tat’ê. Mu kiki-phe, o Mona ni Tata ka sokela. Né kiki, saí athu eji zuela: ‘Jezú ua kexile ni maukexilu aiiadi a muenhu. Bhabha muéne ua zuela kála muthu mu xitu.’ Maji né muene kiexile kála ki zuela athu, ihi i tuamba ia lungu ni nzumbi ikôla? Se o nzumbi ikôla ni Tata, Nzambi imoxi ngó, mukonda diahi Jezú ka zuela kuila o nzumbi ikôla uejiia ioso iejiia o Tata?

Se u suluka ku di longa o Bibidia, ua-nda kuijiia ibatulu ia vulu ia Bibidia, i tanga o maka iá. Iene i tanga o kidi kia lungu ni Tata, ni Mona, ni nzumbi ikôla.—Jisálamu 90:2; Ikalakalu 7:55; Kolose 1:15.