တၢ်ပိာ်ထွဲ
တၢ်မ့ၢ်တၢ်တီလၢ ဘၣ်ဃးဒီး ပၢ်, ဖိခွါ, ဒီးသးစီဆှံ
ပှၤလၢအနာ် သၢဂၤတဂၤဃီ အတၢ်သိၣ်တၢ်သီတဖၣ်န့ၣ် စံးဝဲလၢ ယွၤန့ၣ်ပာ်ဃုာ်ဒီး ကစၢ်သၢဂၤ—ပၢ်, ဖိခွါ, သးစီဆှံ—လီၤ. ကစၢ်သၢဂၤအံၤန့ၣ် လီၤဂာ်လိာ်သးလၢ တၢ်အဂုၤအဂၤ, စိဒိၣ်တုာ်ကမီၤဒိၣ်တုာ်, အခီၣ်ထံးတအိၣ်ဘၣ်လီၤ. လၢတၢ်န့ၣ်အဃိ, ဒ်ယွၤသၢဂၤတဂၤဃီ အတၢ်နာ်အသိးန့ၣ် မ့ၢ်ပၢ်ကစၢ်, ဖိကစၢ်, သးစီဆှံကစၢ်န့ၣ်လီၤ, ဘၣ်ဆၣ် ယွၤမ့ၢ်ထဲဒၣ် တဂၤဧိၤလီၤ.
ပှၤအါဂၤလၢ အနာ်ယွၤသၢဂၤတဂၤဃီန့ၣ် အၢၣ်လီၤဝဲလၢ အဝဲသ့ၣ်တဲနၢ်ပၢၢ်ပှၤလၢ တၢ်သိၣ်တၢ်သီအံၤ တသ့ဘၣ်. ဘၣ်ဆၣ် အဝဲသ့ၣ်နာ်ဝဲလၢ တၢ်အံၤမ့ၢ် လံာ်စီဆှံ အတၢ်သိၣ်လိန့ၣ်လီၤ. ဘၣ်ဆၣ် တၢ်လၢပကဘၣ်တိၢ်နီၣ်န့ၣ် တၢ်ကတိၤလၢ “သၢဂၤတဂၤဃီ” န့ၣ် ပတထံၣ်ဘၣ်လၢ လံာ်စီဆှံပူၤ နီတတီၤဘၣ်. ဘၣ်ဆၣ် တၢ်နာ်လၢ သၢဂၤတဂၤဃီစ့ၢ်ကီး ပထံၣ်ဘၣ်ဧါ. ကစံးဆၢတၢ်သံကွၢ်အံၤအဂီၢ်, ပကကွၢ်သကိး ပှၤလၢအနာ် သၢဂၤတဂၤဃီတဖၣ် ညီနုၢ်ယၢၤထီၣ်ဝဲ လံာ်စီဆှံအဆၢ တဆၢန့ၣ်တက့ၢ်.
“တၢ်ကလုၢ်န့ၣ် မ့ၢ်ယွၤလီၤ”
ယိၤဟၣ် ၁:၁ န့ၣ်ပာ်ဖျါဝဲ ဒ်အံၤလီၤ– “လၢထံးလၢသီန့ၣ် တၢ်ကလုၢ်အိၣ်ဝဲ, ဒီးတၢ်ကလုၢ်န့ၣ်အိၣ်ဝဲဒီးယွၤ, ဒီးတၢ်ကလုၢ်န့ၣ်မ့ၢ်ယွၤလီၤ.” တၢ်မၢဖိယိၤဟၣ်လၢ အကွဲးတၢ်ကတိၤတဖၣ်အံၤန့ၣ် ပာ်ဖျါဝဲတြၢၤကလာ်လၢ “တၢ်ကလုၢ်” န့ၣ်မ့ၢ်ယ့ၣ်ၡူးလီၤ. (ယိၤဟၣ် ၁:၁၄) ဘၣ်ဆၣ်တၢ်ကလုၢ်န့ၣ် ဘၣ်တၢ်ကိးအီၤလၢ ယွၤအဃိ ပှၤတနီၤစံၣ်ညီၣ်တဲာ်ဝဲလၢ ဖိခွါဒီးပၢ်န့ၣ် ကဘၣ်မ့ၢ်ဝဲ ယွၤတဂၤဧိၤ အကူာ်အခီန့ၣ်လီၤ.
တိၢ်နီၢ်လၢ လံာ်စီဆှံအဆၢအံၤ လၢအခီၣ်ထံးန့ၣ် ပှၤကွဲးလၢ ကရံး(စ်)အကျိာ်န့ၣ်တက့ၢ်. လၢခံန့ၣ်, ပှၤကွဲးကျိးတၢ်တဖၣ် ကွဲးကျိးဝဲလၢ ကရံး(စ်)ကျိာ်ဆူ ကျိာ်အဂၤန့ၣ်လီၤ. ဘၣ်ဆၣ် ပှၤကွဲးကျိးလံာ်စီဆှံအါဂၤ တသူဝဲလၢ “တၢ်ကလုၢ်န့ၣ် မ့ၢ်ယွၤ” ဘၣ်. လၢမနုၤအဃိလဲၣ်. ဘၣ်ဃးဒီးလံာ်စီဆှံသူ ကရံးစ်ကျိာ်န့ၣ် ပှၤကွဲးကျိးတၢ်တဖၣ် သန့ၤထီၣ်ဝဲလၢ အဝဲသ့ၣ်အတၢ်သ့ၣ်ညါအဖီခိၣ်ဒီး စံၣ်ညီၣ်တဲာ်ဝဲလၢ တၢ်ကတိၤလၢအမ့ၢ် “တၢ်ကလုၢ်န့ၣ် မ့ၢ်ယွၤလီၤ”, န့ၣ်ကြၢးပှၤကွဲးကျိးအီၤလၢ အဂၤတမံၤန့ၣ်လီၤ. ကွဲးကျိးဝဲဒ်လဲၣ်. တၢ်သ့ၣ်တဖၣ်အံၤ မ့ၢ်တၢ်အဒိတနီၤန့ၣ်လီၤ– “လိကီးစ် [တၢ်ကလုၢ်] န့ၣ်စီဆှံဝဲလီၤ.” (လံာ်စီဆှံ လံာ်ကွဲးကျိးအသီ) “တၢ်ကလုၢ် မ့ၢ်ယွၤတဂၤလီၤ.” (လံာ်တၢ်အၢၣ်လီၤ အီလီၤအသီလၢ တၢ်မၤဂ့ၤထီၣ်က့ၤ) “တၢ်ကလုၢ်န့ၣ် အိၣ်ဒီးယွၤဒီး အိၣ်ဒီးတၢ်အလုၢ်အလၢ် ဒ်သိးကစၢ်န့ၣ်လီၤ.” (ပှၤကွဲးကျိးတၢ်အ လံာ်တၢ်အၢၣ်လီၤအီလီၤအသီ) ဒ်လံာ်ကွဲးကျိးတဖၣ်အသိး တၢ်ကလုၢ်န့ၣ် တမ့ၢ် သ့တၢ်လၢာ်ကစၢ်ယွၤ အနီၢ်ကစၢ်ဒၣ်ဝဲဘၣ်. * တၢ်န့ၣ်အလီၢ် မ့ၢ်လၢတၢ်ကလုၢ်အံၤ အလီၢ်အလၤဖးဒိၣ်လၢ ယဟိဝၤ အတၢ်ဘၣ်တ့ခဲလၢာ် အကျါအဃိ ဘၣ်တၢ်ယၢၤထီၣ်အီၤဒ် ‘ယွၤတဂၤ’ အသိးန့ၣ်လီၤ. တၢ်ကတိၤလၢ အမ့ၢ် “ယွၤ” န့ၣ်အဲၣ်ဒိးစံးဝဲ “ပှၤစိကမီၤဒိၣ်” လီၤ, တမ့ၢ်သ့တၢ်လၢာ် ကစၢ်ဘၣ်.
ဃုအါထီၣ်ကဒီး တၢ်ဂ့ၢ်တၢ်ပီၢ်တက့ၢ်
ပှၤအါဂၤတသ့ၣ်ညါ ကရံးစ်ကျိာ် လၢလံာ်စီဆှံသူအံၤဘၣ်. လၢတၢ်န့ၣ်အဃိ တၢ်မၢဖိယိၤဟၣ် အဲၣ်ဒိးစံးဝဲတၢ်မနုၤ နီၢ်နီၢ်လဲၣ်န့ၣ် ပကသ့ၣ်ညါလီၤတံၢ်ဒ်လဲၣ်. ဆိကမိၣ်ကွၢ် တၢ်အဒိအံၤတက့ၢ်– ကၠိသရၣ်တဂၤ တဲနၢ်ပၢၢ်ဝဲ အပျဲၢ်တဖၣ်လၢ တၢ်ဂ့ၢ်တမံၤန့ၣ်လီၤ. ကၠိဖိတဖၣ်နၢ်ပၢၢ်ဝဲ တၢ်အံၤတဂၤတမံၤ တဂၤတမၠိလီၤ. ကၠိဖိတဖၣ် သုးကျဲၤဝဲ တၢ်ဂ့ၢ်အံၤကသ့ဒ်လဲၣ်. ဃ့ကညးသရၣ်သ့ ဒ်သိးကတဲနၢ်ပၢၢ် အါထီၣ်တၢ်ဂ့ၢ်တၢ်ပီၢ်န့ၣ်လီၤ. ဖဲသ့ၣ်ညါအါထီၣ်ဝဲ တၢ်ဂ့ၢ်တၢ်ပီၢ်အခါ လီၤတံၢ်လၢ ကကဲထီၣ်တၢ်မၤစၢၤလၢ အဝဲသ့ၣ်ကနၢ်ပၢၢ်အါထီၣ် တၢ်အံၤန့ၣ်လီၤ. ဒ်န့ၣ်အသိးလီၤ, ယိၤဟၣ် ၁:၁ အဲၣ်ဒိးစံးတၢ်န့ၣ် နကနၢ်ပၢၢ်အဂီၢ် တၢ်ဂ့ၢ်တၢ်ပီၢ်အါထီၣ်လၢ ဘၣ်ဃးတၢ်အိၣ်သးဒီးယ့ၣ်ၡူးန့ၣ် နဃုထံၣ်န့ၢ်သ့လၢ လံာ်ယိၤဟၣ်အပူၤလီၤ. တၢ်သ့ၣ်ညါ တၢ်ဂ့ၢ်တၢ်ပီၢ်အါထီၣ်လၢ ဘၣ်ဃးဒီးတၢ်အံၤန့ၣ် လီၤတံၢ်လၢကမၤစၢၤပှၤ ဒ်သိးပကစံၣ်ညီၣ်တဲာ်တၢ်လၢ အမ့ၢ်အတီအဂီၢ်န့ၣ်လီၤ.
အဒိ, ဆိကမိၣ်ကွၢ် ယိၤဟၣ်အဆၢဒိၣ် ၁, အဆၢဖိ ၁၈ အပူၤ တၢ်ဂ့ၢ်လၢခံတမံၤတက့ၢ်– “ပှၤတထံၣ်ဘၣ် [သ့တၢ်လၢာ်ကစၢ်] ယွၤနီတခီၣ် နီတဂၤဘၣ်.” ဘၣ်ဆၣ် ဖိခွါလၢအမ့ၢ် ယ့ၣ်ၡူးန့ၣ် ပှၤထံၣ်ဘၣ်အီၤလီၤ, ယိၤဟၣ်စံးဝဲဒ်အံၤလီၤ– ‘တၢ်ကလုၢ် [ယ့ၣ်ၡူး] ကဲထီၣ်တၢ်ညၣ်, . . . ဒီးအိၣ်ဆိးဝဲလၢပကျါ, ဒီးပထံၣ်ဘၣ် အလၤကပီၤ လီၤဂာ်လၢ ပၢ်အဖိခွါတဂၤဃီ အလၤအကပီၤလီၤ.’ (ယိၤဟၣ် ၁:၁၄) မ့မ့ၢ်ဒ်န့ၣ်ဒီး ဖိခွါန့ၣ် မ့ၢ်သ့တၢ်လၢာ် ကစၢ်ယွၤအကူာ်အခီ ကသ့ဒ်လဲၣ်. ယိၤဟၣ်ပာ်ဖျါထီၣ်ဝဲလၢ တၢ်ကလုၢ်န့ၣ် “အိၣ်ဒီးယွၤ” လီၤ. ဘၣ်ဆၣ် ပှၤတဂၤန့ၣ် အိၣ်ဝဲတပူၤဃီဒီး ပှၤတဂၤဂၤဒီး တဘျီဃီန့ၣ် မ့ၢ်ပှၤဝဲန့ၣ်ကသ့ဒ်လဲၣ်. လၢန့ၣ်အမဲာ်ညါ ဒ်တၢ်ကွဲးနီၣ်လၢ ယိၤဟၣ် ၁၇:၃ အသိး ပာ်ဖျါဝဲတြၢၤကလာ်လၢ ယ့ၣ်ၡူးန့ၣ် လီၤဆီဒီး ပၢ်အိၣ်လၢမူခိၣ်လီၤ. ကစၢ်ကိးဝဲ ပၢ်အိၣ်လၢမူခိၣ်လၢ “ယွၤနီၢ်နီၢ်တဂၤဧိၤ” လီၤ. ယိၤဟၣ်အလံာ် တၢ်သးခုကစီၣ် ဘုးအကတၢၢ်န့ၣ် ပာ်ဖျါဝဲဖုၣ်ကိာ်ဒ်အံၤလီၤ– “ဘၣ်ဆၣ်ဒီး ဒ်သိးသုကနာ်လၢ ယ့ၣ်ၡူးမ့ၢ်ခရံာ်, ယွၤအဖိခွါ, . . . တၢ်အံၤတဖၣ် ဘၣ်ကွဲးအသးလီၤ.” (ယိၤဟၣ် ၂၀:၃၁) ပာ်သူၣ်ပာ်သးလၢ တၢ်တကိးယ့ၣ်ၡူးလၢ ယွၤဘၣ်, ကိးဝဲလၢယွၤအဖိခွါလီၤ. တၢ်ဂ့ၢ်တၢ်ပီၢ် အါထီၣ်လၢ လံာ်ယိၤဟၣ် တၢ်သးခုကစီၣ်အပူၤန့ၣ် ပာ်ဖျါဝဲလၢ ကြၢးပနၢ်ပၢၢ် ယိၤဟၣ် ၁:၁ ဒ်လဲၣ်န့ၣ်လီၤ. မ့ၢ်ဒၣ်အဲၣ်ဒိးစံးဝဲလၢ တၢ်ကလုၢ်ယ့ၣ်ၡူးန့ၣ် အိၣ်ဒီးအလီၢ်အလၤထီအဃိမ့ၢ် “ယွၤတဂၤ” လီၤ, တလီၤဂာ်လၢ သ့တၢ်လၢာ်ကစၢ်ယွၤဘၣ်.
တၢ်ပာ်ဂၢၢ်ပာ်ကျၢၤ တၢ်ဂ့ၢ်တၢ်ပီၢ်တဖၣ်
ဆိကမိၣ်ကွၢ်ကဒီး တၢ်အဒိလၢ ကၠိသရၣ်ဒီး ကၠိဖိတဖၣ်န့ၣ်တက့ၢ်. ပစံးဒၣ်ကလိၣ် ဒိကနၢ်ဝဲ သရၣ်အတၢ်တဲနၢ်ပၢၢ်အါထီၣ် ဝံၤအလီၤခံဒၣ်လဲာ် ကၠိဖိတနီၤန့ၣ် သးဒ့ဒီအဖၢလီၤ. အဝဲသ့ၣ်မၤဝဲ တၢ်မနုၤသ့လဲၣ်. တၢ်ဂ့ၢ်တၢ်ပီၢ်အါထီၣ်လၢ ဘၣ်ဃးဒီးတၢ်အံၤအဂီၢ် လဲၤဝဲဆူ သရၣ်အသီတဂၤ အအိၣ်သ့န့ၣ်လီၤ. သရၣ်ခံဂၤတဂၤ မ့ၢ်ပာ်ဂၢၢ်ပာ်ကျၢၤ သရၣ်လၢညါတဂၤ အတၢ်တဲနၢ်ပၢၢ်ဒီး ကၠိဖိအါဂၤ အတၢ်သးဒ့ဒီ ကဟါမၣ်ကွံာ်ဝဲလီၤ. ဒ်န့ၣ်သိးလီၤ, ပှၤကွဲးလံာ်ယိၤဟၣ် အတၢ်ပာ်ဖျါလၢ ဘၣ်ဃးဒီး ယ့ၣ်ၡူးဒီး သ့တၢ်လၢာ်ကစၢ် အတၢ်ဘၣ်ထွဲလိာ်သးန့ၣ် မ့ၢ်တလီၤတံၢ်ဘၣ်ဒီး နကဒိးန့ၢ်ဘၣ် တၢ်ဂ့ၢ်တၢ်ပီၢ်အါထီၣ်အဂီၢ် နဃၣ်ကဒါနသးဆူ ပှၤကွဲးလံာ်စီဆှံ အသီတဂၤအအိၣ်သ့လီၤ. အဒိ, ဆိကမိၣ်ကွၢ် လံာ်မးသဲတက့ၢ်. ယ့ၣ်ၡူးကတိၤတၢ်လၢ ဘၣ်ဃးဒီး တၢ်ရဲၣ်တၢ်ကျဲၤအံၤ အကတၢၢ်န့ၣ် အဝဲကတိၤဒိးက့ၤဝဲ ဒ်အံၤလီၤ– “မုၢ်နံၤဒီးနၣ်ရံၣ်အဝဲန့ၣ် ကတုၤအခါဖဲလဲၣ်န့ၣ်, ပှၤတသ့ၣ်ညါနီတဂၤဘၣ်. ကလူးလၢမူခိၣ်တဖၣ်မ့ၢ်ဂ့ၤ, ဖိခွါမ့ၢ်ဂ့ၤ တသ့ၣ်ညါနီတဂၤဘၣ်. ပှၤသ့ၣ်ညါတၢ်အံၤမ့ၢ်ထဲ ပၢ်တဂၤဧိၤလီၤ.” (မးသဲ ၂၄:၃၆, ခစ) ယ့ၣ်ၡူးတမ့ၢ် သ့တၢ်လၢာ်ကစၢ်ယွၤန့ၣ် တၢ်ကတိၤတဖၣ်အံၤ ပာ်ဂၢၢ်ပာ်ကျၢၤဝဲဒ်လဲၣ်.
မ့ၢ်ဒၣ်ယ့ၣ်ၡူးစံးဝဲလၢ ပၢ်န့ၣ်သ့ၣ်ညါတၢ် အါန့ၢ်ဒံးဖိခွါလီၤ. ဘၣ်ဆၣ် ယ့ၣ်ၡူးမ့မ့ၢ် သ့တၢ်လၢာ်ကစၢ်ယွၤ အကူာ်အခီန့ၣ် တၢ်ဂ့ၢ်လၢ ပၢ်သ့ၣ်ညါန့ၣ် ကစၢ်ကသ့ၣ်ညါဝဲလီၤ. လၢတၢ်န့ၣ်အဃိ ဖိခွါဒီးပၢ် မ့ၢ်ဒ်သိးသိး တသ့ဘၣ်. ဘၣ်ဆၣ် ပှၤတနီၤကစံးဝဲလၢ ‘ယ့ၣ်ၡူးအိၣ်ဒီး န့ဆၢၣ်ခံမံၤလီၤ. တၢ်ကတိၤအံၤ စံးဝဲဒ်ပှၤကညီတဂၤ အသိးလီၤ.’ မ့မ့ၢ်ဒ်န့ၣ်ဒၣ်လဲာ် ဘၣ်ဃးဒီးသးစီဆှံန့ၣ် ပကစံးဒ်လဲၣ်. သးစီဆှံန့ၣ် မ့မ့ၢ်ယွၤတဂၤဧိၤ အကူာ်အခီဒ်သိးဒီးပၢ်န့ၣ် ဘၣ်မနုၤအဃိ ယ့ၣ်ၡူးတစံးဝဲလၢ ပၢ်သ့ၣ်ညါတၢ်န့ၣ် သးစီဆှံသ့ၣ်ညါဝဲလဲၣ်.
ဒ်နမၤလိကဒီး လံာ်စီဆှံအသိး, တၢ်ဂ့ၢ်တၢ်ပီၢ်အါမးလၢ ဘၣ်ဃးဒီးတၢ်အံၤန့ၣ် နကသ့ၣ်ညါထီၣ် ဂ့ၤဂ့ၤဘၣ်ဘၣ်လီၤ. လံာ်စီဆှံအဆၢတဖၣ်အံၤန့ၣ် ကဒုးနာ်လီၤတံၢ်နၤ တၢ်မ့ၢ်တၢ်တီလၢ ဘၣ်ဃးဒီး ပၢ်, ဖိခွါ, ဒီးသးစီဆှံလီၤ.—စံးထီၣ်ပတြၢၤ ၉၀:၂; မၤတၢ် ၇:၅၅; ကလီးစဲ ၁:၁၅.
^ လံာ်အဆၢ. 3 တၢ်ကတိၤသကိးအါထီၣ်လၢ ဘၣ်ဃးဒီး ယိၤဟၣ် ၁:၁ န့ၣ်ကွၢ် ယဟိဝၤအပှၤအုၣ်အသးတဖၣ် ထုးထီၣ်ဝဲ ပျိာ်ထီခီးတၢ်, နိၣ်ဝ့ဘၢၣ် ၁, ၂၀၀၈, လံာ်ကဘျံးပၤ ၂၄-၂၅ [ပံၤယီၤကျိာ်] န့ၣ်တက့ၢ်.
