AWANA bekwikilanga elongi dia Nzambi Muntatu bevovanga vo wantu atatu bena muna Nzambi—Se, Mwana yo Mwand’avelela. Dilonganga vo yau atatu mpungu-ngolo, ke bena ye lubantiku ko, ke vena oyu osundidi ko. Muna kuma kiaki, elongi dia Nzambi Muntatu dilonganga vo o Se Nzambi, o Mwana  Nzambi, Mwand’avelela Nzambi, kansi yau atatu Nzambi mosi kaka.

Wantu ayingi bekwikilanga elongi dia Nzambi Muntatu bevovanga vo ke dilendi sasilwa ko elongi diadi. Bevovanga vo mu Nkand’a Nzambi diatuka. Kansi, o mvovo wau “Nzambi Muntatu” ke una ko muna Nkand’a Nzambi. Nga tulenda solola e sono kikwikanisanga elongi diadi muna Nkand’a Nzambi? Muna vutula e kiuvu kiaki, yambula twafimpa sono kimosi kiyikwanga vo i kilonganga elongi dia Nzambi Muntatu.

Muna Yoane 1:1 tutanganga vo: “Muna lubantiku mwakal’e Diambu, e Diambu diakala yo Nzambi e Diambu i Nzambi.” I bosi muna kapu kiaki, Yoane wa ntumwa watoma dio kiesesa vo Yesu i “Diambu.” (Yoane 1:14) Wau vo Diambu diyikilwanga vo Nzambi, akaka bevovanga vo o Se yo Mwana, Nzambi mosi kwandi.

Sungamena vo kuna lubantiku e sono kiaki kia Nkand’a Nzambi mu Kingerekia kiasonamena. Oku sentu, asekodi basekola e sono ya Kingerekia mu ndinga zakaka. Asekodi ayingi a Nkand’a Nzambi kebasadila mvovo wau ko “Diambu diakala yo Nzambi.” Ekuma? Muna zayi bakala wau wa ndinga ya Kingerekia yasonekenwa Nkand’a Nzambi, asekodi awaya bavova vo e mvovo wau “Diambu diakala yo Nzambi” mu mpila yakaka ufwete sekolwelwa. Mu nkia mpila? Tala nona yakaka ya mpila ina basekolwela wo: “E Diambu i nzambi.” (A New Translation of the Bible) “E Diambu diakala se nzambi.” (The New Testament in an Improved Version) “E Diambu diakala yo Nzambi, bakala ye kiwuntu kimosi.” (The Translator’s New Testament) Muna nsekola zazi, ke yandi kibeni Nzambi ko wakala nze Diambu. * Kansi, mu kuma kia fulu kiandi kia tunda vana vena vangwa ya Yave, e Diambu diayikilwa nze “nzambi.” Muna sono kiaki, o mvovo wau “nzambi” usonganga vo “nkwa wisa.”

Wantu ayingi ke bazeye ndinga Kingerekia ko yasonekenw’o Nkand’a Nzambi. Muna kuma kiaki, aweyi olenda zayila nsasa mvovo mia ntumwa Yoane? Yindula nona kiaki:  Nlongi mosi osasilanga diambu kwa wan’andi a sikola. Akaka ke babakwidi diambu diadi ko. Aweyi bevanga? Bafwete lomba kwa nlongi katoma kubasasila e diambu diadi. Ozaya mambu makaka dikubasadisa mu toma bakula e diambu. Diau adimosi mpe, muna zaya nsas’a mvovo mina muna Yoane 1:1 ofwete fimpa mambu makaka mu kuma kia Yesu muna Nsangu za Yoane. Ofimpa mambu makaka mu kuma kiaki dikusadisa mu zaya e ludi kia diambu diadi.

Tala mambu makaka kasoneka Yaone muna kapu kia 1 tini kia  18: ‘O Nzambi, [Mpungu-ngolo] ke vena nkutu ona wamona ko.’ Kansi, o wantu bamon’o Mwana, Yoane wavova vo: ‘E Diambu [Yesu] diakituk’e nitu, diakala yo yeto, twamona nkembo andi.’ (Yoane 1:14) O Mwana aweyi kalenda kadila se Nzambi a Mpungu-ngolo? Yoane wavova mpe vo e Diambu diakala “yo Nzambi.” Kansi o muntu aweyi kalenda kadila yo nkw’andi ye vana vau kakituka mpe se muntu ndioyo? Nze una wasonama muna Yoane 17:3, Yesu watoma dio kiesesa vo yandi waswaswana kikilu yo S’andi ezulu. Wayikila o S’andi vo “Nzambi aludi.” Yoane watoma kiesesa mpe diambu diadi, vava kavova vo: ‘O mama masonamene, kimana nwakwikila vo Yesu i Kristu, wa Mwan’a Nzambi.’ (Yoane 20:31) Tala Yesu oyikilwanga vo Mwan’a Nzambi, kansi ke Nzambi ko. Mambu makaka masonama muna Nsangu za Yoane mesonganga mpila tulenda bakulwila Yoane 1:1. Yesu yovo Diambu, oyikilwanga vo “nzambi” mu kuma kia fulu kiandi kia tunda, kansi kafwanana ko yo Nzambi a Mpungu-ngolo.

Yindula diaka nona kia nlongi yo wan’a sikola. Yindula vo alongoki akaka bakwamanene fila e mpaka kana una vo nlongi au tomene kubasasila e diambu yo kubavana ziku yakaka. Adieyi bafwete vanga? Bafwete vava nlongi wakaka muna kubasasila diambu diadi. Kele vo nlongi ndioyo w’ezole osasidi  diambu diadi nze una kasasila dio nlongi antete, mpaka z’alongoki zimanisa. Diau adimosi mpe, avo kubakwidi ko mana kavova Yoane mu kuma kia nswaswani yina vana vena Yesu yo Nzambi a Mpungu-ngolo, olenda vava mana bavova asoneki akak’a Nkand’a Nzambi. Tala mana kasoneka Matai. Mu kuma kia mbaninu a tandu kiaki, wayika mvovo mia Yesu oku vo: “Owu wa lumbu kiakina ye ola, ke ven’on’ozeye wo ko, kana mbasi ezulu, yovo Mwana, nangu Se kaka.” (Matai 24:36) E mvovo miami aweyi misongelanga vo Yesu ke Nzambi ampungu-ngolo ko?

Yesu wavova vo o Se mambu mayingi kazeye mana o Mwana kazeye ko. Kele vo Yesu kakala Nzambi ampungu-ngolo nga wazaya mambu mawonso mazeye S’andi. Muna kuma kiaki, o Se yo Mwana ke bena bafwanana ko. Kansi, akaka balenda vova vo: ‘Yesu vava kavova omama muntu kakala.’ Kana una vo i wau, adieyi tuvova mu kuma kia mwand’avelela? Avo mwand’avelela i Nzambi, ekuma ulembi zayila mana kazeye o Nzambi?

Avo kwamanene longoka Nkand’a Nzambi, otoma zaya sono yayingi ya Nkand’a Nzambi yikiesesanga e ludi mu kuma kia Se, Mwana yo mwand’avelela.—Nkunga 90:2; Mavangu 7:55; Kolosai 1:15.