JE CHJOTA xi Trinidad makjainle kʼoatso nga tijeni je Nʼai, je ʼNdí kʼoa kao Espíritu Santo. Kʼoa kʼoatso nga mangóson nga jan, nga male kʼoasʼín tojmeni kʼoa nga tsín kitsʼia kjoabijnachonle. Xi Trinidad tsoya kʼoatso nga Ninání je Nʼai, je ʼNdí kʼoa kao Espíritu Santo kʼoa nga tojngo mani nga jan.

Me ngatsʼi chjota xi kui kjoamakjain tjínle xi kʼoatso nga tsín koa̱nle kuitsoya jokjoantjínni xi tʼatsʼe Trinidad. Ninga kʼoalani, tsakui nichxin kʼoasʼin makjainle nga ya nroatʼa Énle Niná. Tonga ya Biblia nijngokʼajinla nroatʼa je én xi Trinidad tso. Kʼoa a tíjna jngo bersíkulole Biblia xi kʼoasʼin majinná nga tíjna je xi Trinidad ʼmi. Kʼianga jchaa jebi, jngola bersíkulo chótʼayá xi kui bʼangini je chjota kʼianga kʼoatso nga ya Biblia bakóya jebi.

Juan 1:1 itso: “Kʼianga totsʼinle kjoa tokʼoa tíjna je én. Je én tíjnatʼa Niná. Je én ñaki Ninání”. Ya bersíkulo xi fisani, xi tikuini kapítulo jebi, je pastro Juan kʼoatsokixi nga je xi “én” ʼmi jéní Jesús (Juan 1:14). Kʼoa nga kʼoatso ya bersíkulo 1 nga ñaki Niná je én, tjínkʼa xi kʼoasʼin majinle nga tijeni je ʼNdí kʼoa kao je Nʼai.

Je xi nʼio sʼiaan kuenta kuinga én griego títjon kichji én jebi kʼoa skan kinikʼatoya xi kjaʼaí én. Tjínkʼa chjota xi likui i̱sʼin kisikʼatoya: “je én ñaki Ninání”. Ánni. Kuinga nda kiskotʼayason én griego xi kichjini Biblia kʼoa tsabení nga tjínnele kjaʼaí sʼin sʼe̱ én jebi. Tobʼelañá, isʼin kisikʼatoya kʼa: “kʼoati jngo niná je Én”, “je Én jngoní niná”, “ninání je Én” (Juan. Texto y Comentario, de J. Mateos y J. Barreto, lectura  alternativa; Los escritos originales de la comunidad del discípulo “amigo” de Jesús, de Senén Vidal; Cuarto Evangelio. Cartas de Juan, de J. J. Bartolomé). Tojosʼin jaʼatoya Biblia xokjoan, je Én ali tsa tijejinni Niná. * Je bersíkulo jebi tokui xi bakó nga ngisa ngʼa tíjna je Én tikʼoajinni ngatsʼi xi kisinda Jeobá, kʼoa kuinga kʼoati niná ʼminile. Je én xi “niná” tso ibi kui tsoyanile jngo xi “tjínle nganʼio”.

Me ngatsʼi chjota nga tsín be je én griego xi kichjini Biblia. Kʼoa jósʼin jchañá jmekjoanni xi kitso je pastro Juan. Kuila si̱ngósonkoaa jmeni xi tsoyale xtiskuelale jngo maestro. Kʼoa xi maskanni, je xtiskuela kjaʼaí kjaʼaísʼin majinle jmeni xi kaʼmiyale. Jósʼin skoe̱ni jokjoantjínni. Kʼiaa tsa kʼoakuitsole je maestro nga katabakóyasale, kʼoasʼin nga ngisa nda koa̱njinle jmeni xi katsoyale je maestro. Tikʼoasʼinni, kʼianga nda koa̱njinná jotso Juan 1:1, ngisa nda nga ya chótʼajiaan je libro xi kiski Juan. Yaa koa̱nsjaisaná nga tsín mangóson je Jesús kao je Niná. Kʼianga jekoa̱nsjainá ngisa ngotjo koa̱njinniná josʼin tínchja̱ni Juan 1:1.

Chótʼala jmeni xi kiski je Juan ya kapítulo 1 bersíkulo 18, itso: “Nitoʼyajin [...] [xi sa] tsabe Niná”. Tonga Jesús, je ʼNdíle Niná, tsabe kʼa chjota, nga̱ Juan i kitso: “Je én [xi tsonile je Jesús] chjota koan. I̱ tsakʼejnajinná. (Tsaʼyaníjin kjoajeyale)” (Juan 1:14). Kʼoa jósʼin nga tije koa̱nni je ʼNdí kao je Niná xi ngisasa tse nganʼio tjínle. Xi ijngosani, je Juan kʼoakitso nga je én yaa “tíjnatʼa[le] Niná”. Tsa tijelani jókoa̱nnile nga tiya kʼoéjnatʼanile Niná. Xi ijngosani, Jesús i kitso ya Juan 17:3 “xi tojngo ji Niná xi ñaki kjoakixi” kʼoa kʼoasʼin tsakakó nga tsín mangóson kao je Nʼaile xi tíjna ngʼajmi. Kʼoa je pastro Juan itso xi kiski ya jñani jeme fetʼa librole: “Tonga je én xi kʼuisʼin tjíotʼa, jméni nga koa̱nkjainsínino nga Jesús, je xi Cristo, je ʼndíle Niná” (Juan 20:31). Je bersíkulo jebi likui  kʼoatso tsa Niná je Jesús, kui xi tso nga ʼNdíle Niná ma. Ngayeje jebi xi bakóyasa je libro xi kiski Juan kui sichoyandaná josʼin tsoyanile Juan 1:1. Je Én, xi Jesús tínchja̱ni, jngoní “niná”, xi tsonile nga ngʼa tíjna, tonga tsín mangóson kao je Niná xi ngisasa nʼio tse nganʼio tjínle.

Tikuila si̱ngósonkaongáñá je maestro. Cha̱niyalai jkui tsa tojo tsín majin kʼale xtiskuela ninga tijekatsoyandangánile je maestrole. Jmésani xi sʼin je xti. Koaan kjaʼaí maestro koaikonle kʼoa kʼoakuitsole nga katatsoyasale. Tsa kʼoati kuitsole maestro jebi jokatsole je maestro xi títjon, nkjínjin xi tsín tijao sʼe̱nile. Kʼoakjoánti tjínni xi kao ñá, kʼiatsa jao tjínná jmeni xi kitso je pastro Juan xi tʼatsʼe josʼin tíjna Jesús kao je Niná, koaan kjaʼaí libro xi tsʼe Biblia kjoásjaijiaan. Kuila chótʼaa jme xi kiski Marcos xi tʼatsʼe Jesús, kitso: “Tonga xi kjuichoka je nichxinbe, kʼoa je orabe nga kʼoakoa̱n, liʼya xi be, nijejin ánkje xi tsʼe ngʼajmi, nijejin ʼndíle Niná, tojngo je Nʼainá xi be” (Marcos 13:32). Jósʼin bakó én jebi nga tsín tsa jejin Jesús je Niná xi ngisasa tse nganʼio tjínle.

Je Jesús kʼoakitso nga ngisa tse jmeni xi be je Nʼai tikʼoajinni je ʼNdí. Tonga tsa tijelani Jesús kao Nʼaile, kʼoajinti be jmeni xi be Nʼaile. Kui xi bakóná jebi nga tsín mangóson je ʼNdí kao je Nʼai. Ninga kʼoalani, tsakui nichxin tjín xi i̱ kuitso: “Kuinga jao kjoabijnachon kisʼele Jesús, jngo xi ya ngʼajmi kʼoa jngo xi i̱ tʼanangi, kʼoa kʼiaa kʼoakitso jebi nga tsakʼejna i̱ tʼanangi”. Kʼiatsa kʼoalani tjín jebi, ánni nga tsín tjínjinsínile je espíritu santo kʼiatsa tijelani Niná, kʼoa ánni nga tsín kʼoakitsosíni Jesús nga kʼoati tjínjinle je espíritu santo. Je Jesús kʼoakitso nga tojekjoan je Nʼaile xi tjínjinle.

Kʼianga tosi tonda chótʼayai Biblia, nkjínsa testo jchai xi kui nchja̱ni tʼatsʼe jebi kʼoa kui bakóya jokjoantjínni xi tʼatsʼe je Nʼai, je ʼNdí kʼoa kao je espíritu santo (Salmo 90:2; Hechos 7:55; Colosenses 1:15).