NEB nins sẽn tẽed Tãablmã yetame tɩ Wẽnnaam yaa neb a tãab sẽn yaa Ba wã, Biigã la vʋʋsem sõngã sẽn naag taaba. B yetame tɩ b tãabã zema taaba, tɩ b tõeyã bũmb fãa, la tɩ b fãa pa tall sɩngr ye. Rẽnd sã n yaa ne Tãablmã zãmsgo, Ba wã yaa Wẽnnaam, Biriblã yaa Wẽnnaam, tɩ vʋʋsem sõngã me yaa Wẽnnaam, la yaool n yaa Wẽnnaam yɛng bala.

 Neb wʋsg sẽn tẽed Tãablmã sak n deegame tɩ b pa tõe n wilg a võor ye. La tõe tɩ b ket n tẽedame tɩ zãms-kãngã yita Biiblã pʋgẽ. Yaa d bãng tɩ “Tãablmã” yaa gom-biig sẽn pa tol n be Biiblã pʋgẽ ye. La rẽ yĩnga bũmb bee Biiblã pʋgẽ n tõe n kɩt tɩ d tags Tãablmã yell bɩ? Sẽn na yɩl n leok sok-kãngã, bɩ d ges neb nins sẽn tẽed Tãablmã sẽn nong n karemd verse ning sẽn na yɩl n kõ b mens bʋʋmã.

Zã 1:1 yetame: “Hal sɩngre Gomda ra beeme, la Gomda ra bee ne Wẽnnaam, la Gomda yaa Wẽnnaam.” (Zã 1:1) Taoore, tʋm-tʋmd a Zã gʋlsame n wilg vẽeneg tɩ “Gomda” yaa a Zezi. (Zã 1:14) La b sẽn boond Gomdã tɩ Wẽnnaamã yĩnga, kẽer yetame tɩ Biriblã ne Ba wã segd n bee Wẽnnaam a ye pʋgẽ.

Ning-y y yamẽ tɩ sɩngrẽ wã b gʋlsa Biiblã bab-kãngã ne gɛrk goama. Kaoosg poore, lɛbgdbã lebg-a-la ne buud-goam a taaba. La Biiblã lɛbgdb wʋsg pa lebg gomd ning sẽn yaa ‘Gomdã yaa Wẽnnaamã’ woto ye. Bõe yĩnga? B tika gɛrk goamã bãngr zugu, gɛrk ning pʋgẽ b sẽn gʋls Biiblã. B yãame tɩ b ra pa segd n lebg gomd ning sẽn yaa “Gomdã ra yaa Wẽnnaama” woto ye. B ningame tɩ bõe? Ad makr a wãna: “Logosã [Gomdã] ra yaa wẽnnaam buudu.” (A New Translation of the Bible) “Gomdã ra yaa wẽnde.” (The New Testament in an Improved Version) “Gomdã ra bee ne Wẽnnaam n da tar a halhaalã.” (The Translator’s New Testament) Sã n yaa ne Biibl kãensã, Gomdã pa Wẽnnaam mengã ye. * La Gomdã sẽn tar naam kãseng a Zeova bõn-naandsã sʋkã yĩnga, b yetame t’a ra yaa “wẽnde.” Ka wã “wẽndã” rat n yeelame tɩ “pãng soaba.”

Neb wʋsg pa mi gɛrk ning b sẽn tall n gʋls Biiblã ye. Rẽnd wãn to la y tõe n bãng tʋm-tʋmd a Zã sẽn da rat n yeelã? Tags-y mak-kãngã yelle: Wala karen-saamb sẽn na n zãms a karen-biis bũmbu, tɩ karen-biisã tagsa yaool n yaa toɛy-toɛy zãmsgã  võor zugu. Wãn to la karen-biisã tõe n welg yellã? B tõe n soka karen-saambã n bãng n paase. Sãmbg sẽn ka be, b sã n wa paam vẽenem n paase, tõe n sõng-b lame tɩ b wʋm zãmsgã võor n paase. Woto me, sẽn na yɩl n wʋm Zã 1:1 võore, y tõe n gesa a Zã Evãnzillã pʋgẽ, n paam vẽenem a Zezi yasrã zug n paase. Y sã n wa paam kaset a taab yel-kãngã zugu, na n sõng-y lame tɩ y wa wʋm a võorã la y sak n deeg tɩ yaa woto.

Wala makre, ges-y bũmb ning a Zã sẽn leb n gʋls sak a 1 verse 18 wã pʋgẽ wã: “Ned nan ka yã Wẽnnaam [sẽn tõe fãa wã] abada ye.” La ninsaalbã yaool n yãa a Zezi sẽn yaa Biriblã, bala a Zã yeelame: “B kɩtame tɩ Gomda [a Zezi] rɩk yĩnga n zĩnd tõnd sʋka . . . La tõnd yãa bãmb ziiri.” (Zã 1:14) Woto wã, wãn to masã la Biriblã tõe n yɩ Wẽnnaam sẽn tõe fãa wã babg a yembre? A Zã leb n yeelame tɩ Gomdã ra ‘bee ne Wẽnnaam.’ La wãn to la ned tõe n be ne ned la a leb n yaa nin-kãng yɛsa? Sẽn paase, wala b sẽn gʋls Zã 17:3 pʋgẽ wã, a Zezi wilgda vẽeneg tɩ yẽ ne a saasẽ Ba wã yaa neb toɛy-toɛya. A boola a Ba wã tɩ “sɩd Wẽnnaam sẽn ka to.” Sẽn paase, a Zã Evãnzillã baasg sẽnese, a kʋmsa yellã n yeele: “Bõn-kãens gʋlsame tɩ yãmb tõe n tẽ t’a Zezi yaa Kirist Wẽnnaam Biiga.” (Zã 20:31) Yãmb nee ka tɩ b pa yeel t’a Zezi yaa Wẽnnaam ye, b yeelame t’a yaa Wẽnnaam Biiga. Vẽneg-kãngã b sẽn paas a Zã Evãnzillẽ wã wilgda d sẽn segd n wʋm Zã 1:1 wã võor to-to. A Zezi sẽn yaa Gomdã yaa “wẽnde,” sẽn dat n yeel t’a tara naam wʋsgo, la a pa yembr ne Wẽnnaam sẽn tõe fãa wã ye.

Leb-y n tags-y karen-saambã ne karen-biisã makr yelle. Kẽer sã n ket n tar sãmbse, baa ne karen-saambã sẽn wilg-b yellã võor n paasã fãa, bõe la b tõe n maane? B tõe n tɩ soka karen-saamb a to n bãng n paas yellã zugu. Karen-saamb a yiib-n-soabã sã n wilg tɩ pipi soabã zãmsg yaa sɩda, tõe n kɩtame tɩ karen-biis wʋsg pa leb n maan sãmb-sãmb ye. Woto me, yãmb sã n ket n pa wʋm a Zã sẽn yeel bũmb ningã võor sõma, n tar sãmbs ne a Zezi sẽn sɩd yaa a soab takɩ Wẽnnaam sẽn tõe fãa wã taoore, y tõe n gesa Biibl gʋlsd a to sẽn wilgd bũmb ning yellã zugã. Wala makre, ges-y a Matɩe sẽn gʋls bũmb ningã. A  wilgame t’a Zezi goma zãmaan-wẽng kãngã saabã yelle n yeel tɩ: “Ned ba a yembr ka mi daar kãnga la wakat kãng ye, baa malɛk rãmba sẽn be arzãna, baa Wẽnnaam Biiga meng ka mi ye, yaa Ba bala.” (Matɩe 24:36) Wãn to la gom-kãensã wilgd t’a Zezi pa Wẽnnaam sẽn tõe fãa wã?

A Zezi yeela vẽeneg tɩ Ba wã bãngr yɩɩda Biigã. La a Zezi sã n da yaa yembr ne Wẽnnaam sẽn tõe fãa wã, a ra na n bãnga a Ba wã sẽn mi yɛl ninsã fãa. Rẽnd Biigã ne Ba wã pa tõe n zeng taab ye. Ne rẽ fãa, kẽer na n yeelame: ‘La a Zezi ra yaa wẽnd la a ra leb n yaa ninsaala. Ka wã, yaa a sẽn da yaa ninsaalã yĩng la a sẽn gom woto wã.’ Baa sã n yaa woto, yaa wãn to yẽ ne vʋʋsem sõngã? A sã n da fãooga Ba wã n be Wẽnnaam a yembr pʋgẽ, bõe yĩng t’a Zezi pa yeel tɩ vʋʋsem sõngã mii bũmb nins Ba wã sẽn mi wã?

Y sã n ket n zãmsd Biiblã, y na n bãnga Biiblã verse rãmb a taab wʋsg sẽn gomd yel-kãngã yelle. Verse kãens wilgda sɩdã vẽeneg Ba wã, Biriblã la vʋʋsem sõngã zugu.—Yɩɩl Sõamyã 90:2; Tʋʋma 7:55; Kolos rãmbã 1:15.