VANTU va tsiliela mu Vanjambi Vatatu ve ku handeka nguavo Njambi ua pua vatatu​—Tata, Muana na Sipilitu Santu. Nguavo ava vanjambi vaco vose va hiana ngolo kaha naua va pua hamo lika, cikuavo naua ka va kele na vuputukilo. Ku liya na vilongesa via vaze va tsiliela mu Vanjambi Vatatu nguavo, Tata ua pua Njambi, Muana neni Njambi, kaha na Sipilitu Santu ua pua Njambi, vunoni kasi nguavo Njambi ua pua umo.

Cingi ca vantu va tsiliela mu Vanjambi Vatatu ve ku litavela nguavo ka va hasa ku lombolola vuino cilongesa caco. Vutuhu ngoco, ve ku singanieka ngecize eci cilongesa ca tunda mu Mbimbiliya. Vunoni tua pande ku tantekeya mpundu ngecize eli lizi “Vanjambi Vatatu” ka lia kele mu Mbimbiliya. Vuno cilongesa ca Vanjambi Vatatu ca kala mu Mbimbiliya ni? Linga tu kumbulule eci cihula, tu hilulenu ha cisoneka ci ve ku pangesa mu ku sambeya eci cilongesa ca Vanjambi Vatatu.

Yoano 1:1 nguayo: “Ha katete ha kele Lizi, kaha Lizi lia kele hamo na Njambi, kaha Lizi likelio Njambi.” (Mbimbiliya ya Luchazi 1963) Mu kapitulu aka vene, kapostolo Yoano ua muesele ha toma ngecize “Lizi” likelio Yesu. (Yoano 1:14) Vunoni muomu Lizi va litumbula nguavo Njambi, vamo va tsiliela nguavo Muana na Ise va pua Njambi umo lika.

Ou mutamba ua Mbimbiliya va u sonekele ha katete mu ciNgelengu. Kaha vakua ku langulula va sonekele mezi a ciNgelengu ku tuala mu malimi avo. Vunoni vakua ku langulula Mbimbiliya va vengi, ka va pangesele mezi “Lizi likelio Njambi.” Omo lia vika? Ku liya na vize vi va tantekeyele ku ciNgelengu ca mu Mbimbiliya, vaze vakua ku langulula va nonguenene ngecize aa mezi “Lizi likelio Njambi,” va na pande ku a languluila mu njila yeka. Mu njila ika? Aci talenu evi vimueso: Logos “[Lizi] lia kele na vifua via vunjambi.” (A New Translation of the Bible) “Lizi lia puile njambi.” (The New Testament in an Improved Version) “Lizi lia kele hamo na Njambi  kaha lia lifuile neni.” (The Translator’s New Testament) Ku liya nevi Vimbimbiliya, Lizi ka lia puile ivene Njambi. * Vunoni ou Lizi va mu tumbula ku pua “njambi” muomu ua kala na cihela ca kama ha kati ka viuma viose via tanga Yehova. Lizi “njambi” li va tumbula ha cinanga eci lia lomboloka “mukua ngolo.”

Cingi ca vantu ka va tantekeya ciNgelengu ca mu Mbimbiliya. Kaha vati mu hasa ku tantekeya via tondele mpundu ku handeka kapostolo Yoano ha cinanga eci? Aci singaniekenu ha cimueso eci: Mulongisi ua sikola a lombolola cimo cimpande ku vana va sikola. Kaha vakevo vevuisisa eci cimpande mua ku liseza-seza. Vati vana va sikola va hasa ku manusula vimpata ha kati kavo? Va hasa ku hula mulongesi linga a va leke vintsina vikuavo ha cimpande caco. Mua vusunga, ku va leka mizimbu ikuavo ci ka va kuasa ku-ivuisisa vuino. Na vuno vene, linga mu ivuisise Yoano 1:1, mu hasa ku uana vintsina vikuavo mu Muzimbu ua Cili ua Yoano, ku tuala ha cihela ca kala naco Yesu. Ku tantekeya mizimbu ikuavo, ci ka mi kuasa ku ivuisisa mua cili eci cimpande.

Talenu via sonekele Yoano mu kapitulu 1, cinimbu 18: “Ku miaka yose na umo uahi na mono Njambi.” Vunoni vantu va muene Muaneni Yesu, muomu Yoano ngueni: “Kaha Lizi [Yesu] lize lia himpukile ntsitu, kaha ua kele ha kati ketu, netu tua muene vumpahu vueni.” (Yoano 1:14) Vatico Muana a pua mutamba ua Njambi Mukua ngolo yose? Yoano ua handekele naua ngueni Lizi lia “kele hamo na Njambi.” Kaha vati muntu a hasa ku kala hamo na mukuavo, vunoni ha ntsimbu oyo vene ku pua naua ikeye? Cikuavo naua, ku Yoano 17:3, Yesu ua muesele ha toma ku litepa ca kala ha kati keni na Ise ua muilu. Ua tumbuile Ise ngueni “Njambi umo lika ua vusunga.” Kaha naua mu ku manusula Muzimbu ueni ua cili, Yoano ua vatula mpundu ngueni: “Vunoni evi tua vi soneka, linga mu ka tsiliele ngecize Yesu ikeye Kilistu, Muana Njambi.” (Yoano 20:31)  Ngue mu tua limuena, Yesu va na mu tumbula nguavo Muana Njambi, ka puile Njambi houe. Eyi mizimbu ikuavo ili mu Muzimbu ua Cili ua Yoano ya muesa vati tua pande ku ivuisisa Yoano 1:1. Lizi ni nguetu Yesu va mu tumbula “njambi” muomu ua kala na cihela ca kama, vunoni ka puile hamo na Njambi Mukua ngolo yose.

Aci singaniekenu naua ha cimueso ca mulongisi na vana va sikola. Nga vutuhu mulongisi na va lomboluela mizimbu ikuavo, vunoni vamo kasi va li na vimpata. Vati va linga? Va hasa ku ya kuli mulongisi ueka linga a va leke mizimbu ikuavo ha cilongesa caco. Nga ou mulongisi ua mu civali, a lombolola vene ngue mua lingile mulongisi ua katete, vana va sikola va vengi vimpata vi va hua. Na vuno vene, Nga ka muesi na vusunga ku tuala ha viuma via lomboluele mukua ku soneka Mbimbiliya Yoano, ku tuala hali Yesu na Njambi Mukua ngolo yose, mu hasa ku tonda mukua ku soneka Mbimbiliya mukuavo, linga neni a lombololeho. Aci talenu via sonekele Mateo. Ku tuala ha ku-hua ca mavu ano, Mateo ua sonekele via handekele Yesu ngueni: “Vunoni litangua lize, cipue ola ize, na umo uahi a li tantekeya, cipue tungelo va muilu, cipue Muana, vunoni Ise lika.” (Mateo 24:36) Vati aa mezi a muesa ngecize Yesu ka puile Njambi Mukua ngolo yose?

Yesu ua handekele ngueni Ise a tantekeya via vingi ku tuvakana Muana. Nga Yesu ua puile mutamba ua Njambi Mukua ngolo yose, nga neni ua tantekeyele viose via tantekeyele Ise. Nkuma mukemuo, Muana na Ise ka va puile hamo. Vunoni vamo va hasa ku handeka nguavo: ‘Yesu ua kele na visemua vivali. Aha ua kele na ku handeka tele ali mu cifua ca vuntu.’ Vutuhu ngoco, Ambaco sipilitu santu? Nga sipilitu santu ya pua mutamba ua Njambi Tata, omo lia vika Yesu ka handekele ngueni nayo ya tantekeya viuma via tantekeya Ise?

Omo mu tualelelaho ku lilongesa Mbimbiliya, mu ka tantekeya vinimbu vikuavo via mu Mbimbiliya via handeka ha cimpande eci. Vinimbu viaco via muesa vusunga ku tuala hali Ise na Muana na sipilitu santu.​—Visamo 90:2; Vilinga 7:55; Kolose 1:15.