VANDHU vanotenda jijiso yo Utatu vanonanga kuti Mwari, vandhu vatatu—Baba, Mwana pomwe no Mujimu Mucena. Umwe nga umwe wavo, anonangwa kuva wakaezana no vamweni, vano masimba ese, zve avazivi kuva no matangiro. Ngo kudaro, mukuzwirana no jijiso yo Utatu, Baba ndi Mwari, Mwana ndi Mwari, zve Mujimu Mucena ndi Mwari zve pikija zvakadaro ivona vese i Mwari umwe basi.

 Vazinji vanotenda Utatu, vanodavira kuti ivona avakwanisi kusanangura jijiso iyi. Pikija zvakadaro, ivona vangavona kuti jijiso iyi ngo yo Bhaibheri. Zvinoshamaisa ngo zvokuti gama ro kuti “Utatu” arimbowaniki mu Bhaibheri. Asi, murangariro hao wo kuti “Utatu” unowanika mu Bhaibheri here? Kuitira kupingura mubvunjo uwu, imanyi tivone matahwa anoshandiswa kazinji ngo vandhu vanodavira Utatu.

Johani 1:1 inoti: “Pakutanga raingepo Izwi. Izwi rainga mwa Mwari, Izwi rainga Mwari.” Pacipauko cimweco, mupostori Johani wakakhombija zvakajeka kuti “Izwi” ndi Jesu. (Johani 1:14) Zvecivoneka kuti Izwi rinodanijwavo kuti Mwari, vamweni vanoguma pa mbhejiso yo kuti Mwana na Baba vanodikana kuva divi ra Mwari umweo.

Zivanyi kuti divi iri ro Bhaibheri, pakutanga rakatahwa mu ciGiriki. Pa kufamba ko nguva, vasanduji vakasanduja zvaitahwaya ngo ciGiriki kuendesa ku ndumi jimweni. Ngo kudaro, civerengo cakatikuti co vasanduji, avazivi kushandisa gama ro kuti “Izwi rainga Mwari.” Ngenyi? Vakacijikira mu uzivi hwavo hwo ciGiriki co mu Bhaibheri, vasanduji vondhovo vakaguma pa mbhejiso yo kuti magama okuti “Izwi rainga Mwari waidikana kusandujwa mu maitiro akasiana. Kuitisa kudini? Muezaniso mushoma nga iji: “Logos [Izwi] rainga umwari.” (A New Translation of the Bible) “Izwi rainga mwari.” (The New Testament in an Improved Version) “Izwi rainga na Mwari zve rainga no magariro ake.” (The Translator’s New Testament) Mukuzwirana no vasanduji ava, Izwi asipi Mwari kamare. * Mukusiana, Izwi rainangihwa kuva inga “mwari” ngo ndava yo kuva kwaro no cigaro cakakhwirira pakati po zvisikwa zimweni zva Jehovha. Apa gama rokuti “mwari” rinoda kunanga kuti “ano simba.”

Vandhu vazinji avazivi ciGiriki co mu Bhaibheri. Ngo kudaro mungazvizivisa kudini zvaida kunanga mupostori Johani? Rangariranyi ngo pamusoro po muezaniso uwu: Mujijisi wo cikora wosanangura ngo pamusoro po shwiro iri yese kuno vajiji vake. Pasure  pazvo, vajiji vova no kuzwisisa kwakasiana ngo pamusoropomasanangurireomujijisi.Vajijivangaitenyikutivatonge shwiro iyi? Ivona vangabvunjisa mujijisi kuitira masoko mazinji. Atikaniji kuti pavaizojijira zvimweni, zvaizovabesera ushoni kuzwisisa ngo pamusoro po shwiro iyi. Mukufananavo, kuti muzwisise zvinoda kureva Johani 1:1, imwimwi mungadikana kusotesesa Vhangeri ra Johani kuitira masoko mazinji ngo pamusoro po cigaro ca Jesu. Kujijira masoko amweni ngo pamusoro po shwiro iyi, zvicazomubesera kuguma pa mbhejiso yakarungama.

Inga muezaniso, vonanyi zvimweni zvakatara Johani mu cipauko 1, vhesi 18: “Apana mundhu wakavona Mwari [Wo Masimba-ese].” Asi, vandhu vakavona Jesu, Mwana, ngo kuti Johani anoti: “Izwi [Jesu] rakajiita mundhu anomuviri rogara pakati pedu. Itisu takavona goja raro.” (Johani 1:14) Waro, Mwana waizoitisa kudini kuti ave divi ra Mwari wo Masimba ese? Johani wakanangazve kuti Izwi rainga “na Mwari.” Waro zvingaitisa kudini kuti mundhu ave no umweni, pa nguva yondhoyo wovazve wondhowo waanae waro? Kunja ka izvi, inga zvatakazwa pana Johani 17:3, Jesu wakajekesa kuti pano musiano kuna iyena na Baba wake vo mugore. Iyena wakadanija Baba wake vo mugore “Mwari umwe ega wokadi-kadi.” Phedo no kumaperero ko Vhangeri rake, Johani waihwirijira shwiro iyi eciti: “Iyi yakatahwa kuti mutende kuti Jesu ndi Kristu, Mwana wa Mwari.” (Johani 20:31) Vonanyi kuti jesu anodanijwa, Mwana wa Mwari, haiwa Mwari. Masoko o kuengejera aya ari pana Johani anokhombija kuti Johani 1:1 inodikana kuzikisa kudini. Jesu, Izwi, ndi “mwari” mu njira yokuti iyena ano cigaro cakakhwirira, asi acizivi kuezana no cigaro ca Mwari wo Masimba ese.

Rangariranyizve ngo pamusoro po muezaniso wo mujijisi no vajiji. Rangariranyi kuti vamweni vavo vari kundokana-kana, pikija no masoko okuengejera apekeja mujijisi. Zvicinyi zvavaizoita? Ivona vaidikana kupsaka mujijisi umweni kuitira masoko mazinji ngo pamusoro po shwiro yondhoyo. Kudari mujijisi wo cipiri akananga kuti zvananga mujijisi wo kutanga ngo zvokadi, atikaniji kuti vajiji vazinji vaizogarisika. Mukuezanavo, kudari imwimwi mucina gwinyiso ngo zvaida kunanga Johani, mutari wo Bhaibheri, ngo pamusoro po kuzwirana ka Jesu na Mwari wo Masimba ese, mungasikira ku mutari umweni wo Bhaibheri, kuitira masoko  mazinji. Inga muezaniso, vonanyi zvakatara Mateu. Ngo pamusoro po kupera ko mugariro uno wo zviro, iyena wakatarira masoko a Jesu eciti: “Njiku no nguva apana anobziziva, nokuti ngirozi jo mugore. Anobziziva ndi Baba.” (Mateu 24:36) Masoko aya anopa kudini gwinyiso ro kuti Jesu asipi Mwari wo Masimba ese?

Jesu wakananga kuti Baba vanoziva zvizinji kupinda zvinoziva Mwana. Ngo kudaro, kudari Jesu wainga Mwari wo Masimba ese, iyena waizoziva zviro zvondhozvo zvinoziva Baba wake. Ngo kudaro, Mwana na Baba avabviri kuva vakaezana. Asi, vamweni vanozonanga kuti: ‘Jesu wainga no mugariro muviri. Apa, iyena waivereketa inga mundhu.’ Asi pikija kudari zvainga izvona, taizotivo kudini ngo mujimu mucena? Kudari iwona wainga divi ra Mwari umwewo na Baba, ngenyi Jesu aazivi kunanga kuti mujimu mucena unoziva zvinoziva Baba?

Pamunonga mecienderera mberi no jijo yenyu yo Bhaibheri, munozoguma pakunasa kuziva ushoni mativi mazinji o mu Bhaibheri anobhuya ngo pamusoro po shwiro iyi. Iwona anopa gwinyiso ngo pamusoro pa Baba, Mwana, pomwe no mujimu mucena.—Nduyo 90:2; Maitiro o Vapostori 7:55; VaKolosi 1:15.