BATHO bao ba dumelago thutong ya Boraro botee ba bolela gore Modimo o dirwa ke batho ba bararo—Tate, Morwa le Moya o Mokgethwa. Yo mongwe le yo mongwe wa batho ba ba bararo go bolelwa gore o lekana le ba bangwe, ke yo matla ohle e bile ga a na  mathomo. Ka baka leo, go ya ka thuto ya Boraro botee, Tate ke Modimo, Morwa ke Modimo le Moya o Mokgethwa ke Modimo, eupša go na le Modimo o tee feela.

Ba bantši bao ba dumelago go Boraro botee ba dumela gore ga ba kgone go hlalosa thuto ye. Lega go le bjalo, ba ka nagana gore e rutwa ka Beibeleng. Ke gabohlokwa go tseba gore lentšu “Boraro botee” ga le tšwelele le gatee ka Beibeleng. Eupša na kgopolo ya Boraro botee e a hwetšagala moo? Go araba potšišo ye, anke re lebeleleng lengwalo leo bathekgi ba kgopolo ye gantši ba le tsopolago e le go thekga Boraro botee.

Johane 1:1 (Beibele ya Sepedi) e re: “Mathomong E A bexo a le xôna ké Yêna LENTŠU. Xomme Yêna LENTŠU ó be a le xo Modimo. Xomme Yêna LENTŠU e be e le Modimo.” Ka morago kgaolong yona yeo, moapostola Johane o bontšha gabotse gore “LENTŠU” ke Jesu. (Johane 1:14, Beibele ya Sepedi) Lega go le bjalo, ka ge Lentšu le bitšwa Modimo, ba bangwe ba phetha ka gore Morwa le Tate e swanetše go ba e le karolo ya Modimo o tee.

Gopola gore karolo ye ya Beibele mathomong e be e ngwadilwe ka Segerika. Ka morago, bafetoledi ba ile ba fetolela mongwalo wa Segerika malemeng a mangwe. Lega go le bjalo, bafetoledi ba bantši ba Beibele ga se ba ka ba diriša polelwana e rego “LENTŠU e be e le Modimo.” Ka baka la’ng? Ba ithekgile ka tsebo ya bona ya Segerika sa Beibele, bafetoledi bao ba ile ba phetha ka gore polelwana e rego “LENTŠU e be e le Modimo” e swanetše go fetolelwa ka tsela e fapanego. Bjang? E mengwe ya mehlala e sego kae ke e latelago: “Logos [Lentšu] e be e le modimo.” (A New Translation of the Bible) “Lentšu e be e le modimo.” (The New Testament in an Improved Version) “Lentšu le be le e-na le Modimo gomme le swana le yena.” (The Translator’s New Testament) Go ya ka diphetolelo tše, Lentšu ga se Modimo ka boyena. * Go e na le moo, ka baka la boemo bja gagwe bjo bo phagamego gare ga dibopiwa tša Jehofa, Lentšu le bolelwa e le “modimo.” Mo leina “modimo” le bolela gore “yo matla.”

Batho ba bantši ga ba tsebe Segerika sa Beibele. Ka gona o ka  tseba bjang seo moapostola Johane a bego a tloga a se bolela? Nagana ka seswantšho se: Morutiši wa sekolo o hlalosetša barutwana ba gagwe taba e itšego. Ka morago, barutwana ba ba le dikgopolo tše di fapanego ge e le mabapi le go kwešiša tlhaloso. Barutwana ba ka rarolla bjang taba ye? Ba ka kgopela tsebišo e oketšegilego go morutiši. Ga go pelaelo gore go ithuta ditherešo tše oketšegilego go tla ba thuša gore ba kwešiše taba yeo gakaone. Ka mo go swanago, gore o kwešiše seo se bolelwago ke Johane 1:1, o ka lebelela ka Ebangeding ya Johane bakeng sa go hwetša tsebišo e oketšegilego mabapi le boemo bja Jesu. Go ithuta ditherešo tše oketšegilego ka taba ye go tla go thuša go fihlelela phetho e nepagetšego.

Ka mohlala, ela hloko seo Johane a se ngwalago ka mo go oketšegilego go kgaolo 1, temana 18: “Ga go motho yo a kilego a bona Modimo [yo Matla ohle] ka nako le ge e le efe.” Lega go le bjalo, batho ba ile ba bona Jesu, yena Morwa, ka gobane Johane o re: “’Me Yêna LENTŠU [Jesu] a ba nama, a tla a axa le rena; ra boxêla letaxô la xaxwe.” (Johane 1:14, Beibele ya Sepedi) Ka gona, go kgonega bjang gore Morwa e be karolo ya Modimo yo Matla ohle? Johane gape o bolela gore Lentšu le be le “e-na le Modimo.” Eupša go kgonega bjang gore motho a be le yo mongwe gomme ka nako e swanago a be yena motho yoo? Go oketša moo, ka ge go begilwe go Johane 17:3, Jesu o bontšha phapano e bonagalago magareng ga gagwe le Tatagwe wa legodimong. O bitša Tatagwe gore ke “Modimo a nnoši wa therešo.” Le gona, go ya mafelelong a Ebangedi ya gagwe, Johane o akaretša ditaba ka gore: “Tše di ngwadilwe gore le dumele gore Jesu ke Kriste Morwa wa Modimo.” (Johane 20:31) Ela hloko gore Jesu ga a bitšwe Modimo eupša o bitšwa Morwa wa Modimo. Tsebišo ye yeo e oketšegilego e hwetšwago ka Ebangeding ya Johane e bontšha kamoo Johane 1:1 e swanetšego go kwešišwa ka gona. Jesu yo e lego Lentšu ke “modimo” ka kgopolo ya gore o na le boemo bjo bo phagamego eupša ga a swane le Modimo yo Matla-ohle.

Nagana gape ka seswantšho sa morutiši wa sekolo le barutwana. A re re ba bangwe ba sa na le dipelaelo, gaešita le ka morago ga ge ba kwele tlhaloso e oketšegilego ya morutiši. Ke’ng seo ba ka se dirago? Ba ka retologela go morutiši yo mongwe bakeng sa tsebišo e oketšegilego mabapi le taba yona yeo. Ge e ba morutiši wa bobedi a tiišetša tlhaloso ya morutiši wa mathomo, dipelaelo tša  barutwana ba bantši di ka rarollwa. Ka mo go swanago, ge e ba o sa kgonthišega ka seo mongwadi wa puku ya Beibele Johane a bego a tloga a se bolela mabapi le tswalano magareng ga Jesu le Modimo yo Matla ohle, o ka retologela go mongwadi yo mongwe wa puku ya Beibele bakeng sa tsebišo e oketšegilego. Ka mohlala, ela hloko seo se ngwadilwego ke Mateo. Mabapi le bofelo bja tshepedišo ye ya dilo, o tsopola Jesu ge a re: “Ge e le mabapi le letšatši leo le iri ga go na yo a tsebago, gaešita le barongwa ba magodimo le ge e le Morwa ga ba tsebe, eupša ke Tate feela a tsebago.” (Mateo 24:36) Mantšu a a tiišetša bjang gore Jesu ga se Modimo yo Matla ohle?

Jesu o bolela gore Tate o tseba mo gontši go feta kamoo Morwa a tsebago. Lega go le bjalo, ge e ba Jesu e be e le karolo ya Modimo yo Matla ohle o be a tla tseba ditherešo tšona tšeo di tsebjago ke Tatagwe. Ka gona, Morwa le Tatagwe ba ka se lekane. Lega go le bjalo, ba bangwe ba tla re: ‘Jesu o be a kile a ba le dibopego tše pedi. Mo o bolela ka ge e le motho.’ Eupša le ge e ba seo se be se le bjalo, go thwe’ng ka moya o mokgethwa? Ge e ba moya o mokgethwa e le karolo ya Modimo o tee bjalo ka Tate, ke ka baka la’ng Jesu a sa bolele gore wona o tseba seo Tate a se tsebago?

Ge o dutše o tšwela pele go ithuta Beibele, o tla tlwaelana le ditemana tše dingwe tše dintši tša Beibele tšeo di bolelago mo go oketšegilego ka taba ye. Di tiišetša therešo ka Tate, Morwa le moya o mokgethwa.—Psalme 90:2; Ditiro 7:55; Ba-Kolose 1:15.