‘ONASOA
Aier ta Hün se Ö‘fa ta, Le‘ ta, ma ‘At Ha‘a
FAMÖR ne mā se rakȧk te ne ‘Ạit Le‘ Fol ta ‘ea, ne ma ‘on le‘ fol ‘e ‘Ạit te‘—Ö‘fa ta, Le‘ ta, ma ‘At Ha‘a. Iris fol ‘i ‘ea ne iris tatạu pau, ‘oris ne‘ne‘i ma iris kat ‘es kamatag het ra. Ta ‘on‘on rakȧk te ‘Ạit Le‘ Fol ta, iris ‘ea ne Ö‘fa ta ‘Ạitu, Le‘ ta ‘Ạitu, ma ‘At Ha‘a ‘Ạitu, ka iris ‘atakoa ‘Ạit ‘eseat ma.
Ma‘oit ne mā se ‘Ạit Le‘ Fol ta ‘ea, ne iris kat ‘inea ra la sui‘ạkia rakȧk te te‘is. Ka, kop ma iris la a‘häe ne Puk Ha‘a ‘ea te te‘is. Ka iạ nonoj la ‘is la a‘häeȧk ne fäeag ‘i “‘Ạit Le‘ Fol ta” kat puạ ra ‘e Puk Ha‘a. Tei ka muạ‘ạkiag te‘ täe ‘e Puk Ha‘a? La togia saio‘ te‘is, ‘is la ‘io se ut ne puk het ne iris ne kạu‘ạkia ‘Ạit Le‘ Fol ta a‘es‘ao‘ạki.
“KA FÄEAG TA ‘ẠITU”
Jone 1:1 ‘eag: “ ‘E ‘on kamatag pau Fäeag ta täe, ka Fäeag ta ma ‘Ạitu, ka Fäeag ta ‘Ạitu.” ‘E ạf ne tohim ‘e väe te‘, ‘apostol ta Jone kelȧk a‘taf ne “Fäeag ta” tä Jisu. (Jone 1:14) ‘E reko Fäeag ta ‘Ạitu, ma famör ‘e ‘on rerege a‘vȧh vạhia ne Le‘ ta ma ‘on Ö‘fa ta iriạ ‘Ạit ‘eseat ma.
‘Is la a‘häe‘ȧk ne Puk Ha‘ fo‘ou fȧ‘ mumuạ ‘e fäeag Kirik ta. Ma vȧh ma kotä höl‘ạkim ‘e fäeag Kirik ta se fäeag tutu ne tore. Iris ‘e ‘on rerege ne höl‘ạkia Puk Ha‘a kat a‘es‘ao‘ạkia ra “ka Fäeag ta ‘Ạitu.” Po ‘e teset? ‘E reko iris ‘inea fäeag Kirik ta ne Puk Ha‘a fạ‘i e, ma iris ne höl‘ạkia ‘ea ne fäeag ‘i “ka Fäeag ta ‘Ạitu” tạu la höl‘ȧk tu. La po tapen? Te‘is kel‘ạkiag he his: “Logos [Fäeag] ta iạ fak‘ạit.” (A New Translation of the Bible) “Ka Fäeag ta ‘ạitut.” (The New Testament in an Improved Version) “Ka Fäeag ta ma ‘Ạitu, ma ‘oria aga tatạu.” (The Translator’s New Testament) Se te ne rak‘ạkim ‘e höl‘ȧk tutu ‘i, ‘eake Fäeag ta tä ‘Ạitu.* Ka, ‘e reko ‘on fūạg heta lamlam se‘ ‘e te‘ ne tē mȧür ‘atakoa ne Jihova fup‘ạki, ma Fäeag ta iạ hün‘ȧk se “‘ạitut.” Fäeag heta ne a‘es‘ao‘ạki “‘ạitut” ‘on fuạga iạ ne “‘es ne‘ne‘i.”
AOA AIER‘ẠKIAG MA‘OI
Famör ma‘oi kat ‘inea ra fäeag Kirik ta ne Puk Ha‘ Fo‘ou fạ‘i. Ma ‘äe la po tapen la ‘inea‘ia ‘on fuạg ne tē ne ‘apostol ta Jone ‘ea? Re a‘häe se kel‘ạkiag hete‘: Le‘ rak‘ȧk te ta sui‘ạkia resonit se ‘on lȧ‘riri‘ rak ta. ‘Oris ‘inea ‘e reko te ne sui‘ȧk vạhia tutu. Tes tä lȧ‘riri‘ ta la re la po‘ia ‘amnȧk ne te ne sui‘ȧk vạhia? Iris la pola sạio‘ se le‘ rak‘ȧk te ta la na ta aier‘ạkiag hoi‘ȧk la po‘ia ‘amnȧk ne tē ne rak‘ȧk vạhia. ‘Oris la poag ne aier‘ȧkiag hoi‘ȧk la hạiasoagan iris la ‘inea a‘tafan resön ta. Ma tatạu se ma, la po a‘leleia ‘on fuạg ne tē ne ‘ea ‘e Jone 1:1 ta, ‘äe la pola ‘io se Kospel ‘on Jone la po‘ia aier‘ȧkiag ma‘oi hün se fūạg ‘on Jisu. ‘Ou rakoag ne aier‘ạkiag ma‘oi hün se te ‘i la hạiasoagan ‘äe la po‘ia muạ‘ạkiget ne nonojo.
Kel‘ạkiag hete‘, ‘is la sạkior se te hoi‘ȧk ne Jone fȧ‘ ‘e väe 1 ta, ma ut 18 ta: “Ta kat räe ra se [Iạ ne ‘Atakoa se ma ‘on Ne‘ne‘i] ‘Ạitu ‘e ta av.” Ka, famori kel vạhia se ‘on Le‘ ta, Jisu, ‘e reko Jone ‘eag: “Ma Fäeag ta [Jisu] hele‘ la famorit, ne noh karạu ‘e ‘os gasava; ma ‘is räe se ‘on kolori.” (Jone 1:14) Ma po tapen la Le‘ ta la ‘es väeag ‘e ‘Ạitut ne ‘Atakoa se ma ‘on Ne‘ne‘i? Jone ‘ea tape‘ma ne Fäeag ta “ma ‘Ạitu.” Ka po tapen la ‘e av ‘esea het ka famorit la noh ma ta le‘et ka iạ ta famör ta‘ag? La fakma ne fȧ‘ vạhia ‘e Jone 17:3, Jisu rak‘ȧk a‘taf ne iạ ma ‘on Ö‘fa fak lạgi kat tatạu ra. Iạ he‘ ‘on Ö‘fa ta “‘Ạit aier ‘esea ta.” Ma ‘eleaf se a‘vạhiag ne ‘on Kospel ta, Jone fȧ‘ a‘luạk te ‘i ma ‘eag: “Ka te ‘i fȧ‘ sio, la ‘au la pilifiomus ne Jisu, ia Karisto ta, Le‘ ‘on ‘Ạitu.” (Jone 20:31) ‘Is räe ne Jisu ‘eake ‘Ạitu ka iạ Le‘ ‘on ‘Ạitu. Aier‘ạkiag hoi‘ȧk ne Kospel ‘on Jone ne na, a‘taf se ‘isa ‘on fuạg ne Jone 1:1. Jisu, ne Fäeag heta, iạ “‘ạitut” ‘on fuạga ia ma ‘on fuạg lamlamat, ka iạ kat tatạu ra se ‘Ạitut ne ‘Atakoa se ma ‘on Ne‘ne‘i.
AIRET NE A‘FUMOU‘ȦK VẠHIA
A‘häe hoi‘ȧk se kel‘ạkiag het ne mou se le‘ rak‘ȧk te ta, ma ‘on lȧ‘riri‘ rak ta. Re a‘häe se aier‘ạkiag hoi‘ȧk ne le‘ rak‘ȧk te ta na, ma iris ‘e ‘on rerege a‘fại ka araruạ ma kikia. Tes tä iris la re? Iris pola aoa ta le‘ rak‘ȧk te hoi‘ạkit la na ta hạiasoagat ‘e reko resön ta‘ag. Kepoi ka ‘on ruạ ne le‘ rak‘ȧk tēet, a‘fumou‘ȧk vạhia ne tēet ne sui‘ȧk vạhia ta nojo ma lȧ‘riri‘ rak ta täla tokana ‘e araruạ. Tatạu se ma, kepoi ka ‘äe kat po a‘taf ra te ne Jone fȧ‘ sio ‘e Puk Ha‘ heta, hün se hạikainagagat ne täe ‘e Jisu ma ‘Ạitut ne ‘Atakoa se ma ‘on Ne‘ne‘i, ‘äe la po se ma la ‘io se ta famör hoi‘akit ne fạ‘ia Puk Ha‘a la po aier‘ạkiag hoi‘ȧk. ‘Is la sạkior se te ne Mataio fạ‘i, la a‘tatạu‘ạkiag het. ‘E reko a‘ofiạg ne rȧn raksa‘ te‘, iạ rak‘ạkim te ne Jisu ‘eag: “Ma ‘e rēko terȧn ta ma terȧn ut ta, tā kat ‘inea ra, — ‘eake ‘ager ne lạgi, ne Le‘ ta, gat se ma ke Ö‘fā ta ‘esea.” (Mataio 24:36) Ka fäeag ‘i a‘fumou‘ȧk tapen ne Jisu ‘eake ta ‘Ạitut ne ‘Atakoa se ma ‘on Ne‘ne‘i?
Jisu ‘eag ne Ö‘fa ta ‘on ‘inea ti‘ se‘ ‘e iạ Le‘ ta. Ma kepoi ka Jisu ‘es väeag ‘e ‘Ạitut ne ‘Ạtakoa se ma ‘on Ne‘ne‘i, ma ‘on ‘inea Ia tatạu se ‘on Ö‘fa ta. Ma ta ‘on‘on, Le‘ ta ma ‘on Ö‘fa ta kat pora la tatạu. Ka, famör ‘e ‘on rerege ‘ea ne: ‘Jisu ia famör fak‘atat ka fakforot. Ma iạ fäefäeag fakma se ta famorit.’ Kepoi ka ke ta‘ag ma tapen se ‘at ha‘a? Kepoi ka iạ ‘es väeag tatạu se ta ‘Ạitut la fakma se ‘on Ö‘fa ta, ma hün se teset tä iạ kat ‘ea ra ne iạ ‘inea tē ne ‘on Ö‘fa ta ‘inea?
‘E avat ne ‘äe ‘ut‘ȧk ma kikia se muạ ‘ou rakoag ne Puk Ha‘a, ‘äe täla mamnȧk‘ia se tē ne fȧ‘ ‘e laloag ne Puk Ha‘a hün se tē ne ‘äe rakrakoa. Iris a‘fumou‘ạkia te aier ne mou se Ö‘fa ta, Le‘ ta, ma ‘at ha‘a.—Salamo 90:2; Garue 7:55; Kolosa 1:15.
* La hạifäegag hoi‘ȧk hün se Jone 1:1, ‘io se rạupeap 24-25 ne The Watchtower, November 1, 2008 ne Jihova Uetnes ta fạ‘i.
