BANTFU labakholelwa kutsi Nkulunkulu Mtsatfu amunye batsi Nkulunkulu uhlanganisa bantfu labatsatfu—Babe, iNdvodzana, Nemoya Longcwele. Kutsiwa ngamunye kulabantfu labatsatfu ulingana nalomunye, ungusomandla futsi ute sicalo. Ngekusho kwemfundziso yaMtsatfu amunye, Babe nguNkulunkulu, iNdvodzana  nguNkulunkulu kanye neMoya Longcwele nawo solo nguNkulunkulu, kodvwa kuNkulunkulu munye.

Labanyenti labakholelwa kuMtsatfu amunye bayavuma kutsi bayehluleka kuyichaza lemfundziso. Nobe kunjalo, bacabanga kutsi lemfundziso iyatfolakala eBhayibhelini. Noko, kumelwe sicondze kutsi ligama lelitsi “Mtsatfu amunye” alikho nje nhlobo eBhayibhelini. Kodvwa imfundziso yaMtsatfu amunye yona iyatfolakala yini eBhayibhelini? Kute siphendvule lombuto, ase sibuke umbhalo labo labasekela lemfundziso labawusebentisako.

Johane 1:1 utsi: “Ekucaleni kungakadalwa lutfo, abevele akhona Livi. Livi abekuNkulunkulu, Livi abenguNkulunkulu.” Esehlukweni lesifanako, umphostoli Johane ukuveta ngalokucacile kutsi “Livi” nguJesu. (Johane 1:14) Njengobe Livi abitwa ngekutsi nguNkulunkulu, labanye bavele batsi kufanele kutsi iNdvodzana naBabe wayo bayincenye yaNkulunkulu munye.

Khumbula kutsi lencenye yeliBhayibheli yayibhalwe ngesiGriki ekucaleni. Kwatsi kamuva bahumushi bahumushela siGriki kuletinye tilwimi. Noko-ke, labanyenti bahumushi beliBhayibheli abazange bayibhale incenye letsi “Livi abenguNkulunkulu.” Kungani? Ngelwati lwabo lwesiGriki lesasetjentiswa ekuhumusheni liBhayibheli, labahumushi baphetsa ngekutsi inkhulumo letsi “Livi abenguNkulunkulu” kufanele ihunyushwe ngalokwehlukile. Kwakufanele ihunyushwe njani? Nati tibonelo letimbalwa: “Logos [Livi] abenesimo saNkulunkulu.” (A New Translation of the Bible) “Livi abengunkulunkulu.” (The New Testament in an Improved Version) “Livi abenaNkulunkulu futsi anesimo lesifanana nesakhe.” (The Translator’s New Testament) Ngekusho kwalamanye emahumusho, Livi akusuye Nkulunkulu. * Kunaloko, ngekutsi unesikhundla lesiphakeme kunaletinye tidalwa taJehova, Livi kutsiwa “ngunkulunkulu.” Lapha ligama lelitsi “nkulunkulu” lifane nje lisho “lonemandla.”

Bantfu labanyenti abasati siGriki lesasetjentiswa ekubhaleni liBhayibheli. Ngako ungakwati njani loko mbamba lokwakushiwo  ngumphostoli Johane? Cabanga nganasi sibonelo: Thishela uchazela bafundzi sifundvo lesitsite. Ngemuva kwesikhatsi, bafundzi bakucondza ngetindlela letingafanani loko bekuchazwa nguthishela. Labafundzi bangayicatulula njani lenkinga? Bangacela thishela abatjele kabanti ngalesifundvo. Kuyacaca kutsi nabachazelwa kabanti batasicondza kahle lesifundvo. Ngendlela lefananako, kute ucondze kahle loko lokushiwo kuJohane 1:1, ungafundza eVangelini laJohane kute utfole emaciniso lengetiwe ngesikhundla saJesu. Kufundza emaciniso ngalendzaba kutakusita kutsi ufike esiphetfweni lesikahle.

Nasi sibonelo: Cabangela loko Johane lakubhala esehlukweni 1, evesini laka-18: “Kute lowase wabona [Somandla] Nkulunkulu.” Noko-ke, bantfu bake bambona Jesu, iNdvodzana, ngobe Johane waze watsi: “Livi [Jesu] waba ngumuntfu, wahlala kanye natsi, . . . Sayibona inkhatimulo yakhe.” (Johane 1:14) Pho, iNdvodzana ingaba njani incenye yaNkulunkulu Somandla? Johane uphindze achaze kutsi Livi “abekuNkulunkulu.” Kodvwa kungenteka njani kutsi umuntfu angaba kumuntfu lotsite, ngesikhatsi lesifanako abe nguloyo muntfu? Ngetulu kwaloko, njengobe kushiwo kuJohane 17:3, Jesu wenta umehluko locacile emkhatsini wakhe naBabe wasezulwini. Wabita Babe wakhe ngekutsi ‘nguNkulunkulu longuye yedvwa weliciniso.’ Ngasekupheleni kweliVangeli lakhe, Johane watsi: “Leti tibhalelwe kutsi nitewukholwa kutsi Jesu unguKhristu, iNdvodzana yaNkulunkulu.” (Johane 20:31) Naka kutsi Jesu akabitwa ngekutsi nguNkulunkulu, kodvwa kutsiwa yiNdvodzana yaNkulunkulu. Lokwatiswa kabanti lesikutfola kuleliVangeli laJohane kusikhombisa indlela lokufanele siwucondze ngayo umbhalo waJohane 1:1. Jesu, Livi, “ngunkulunkulu” ngemcondvo wekutsi usesikhundleni lesisetulu kodvwa akasuye Nkulunkulu Somandla.

Ase uphindze ucabange ngesibonelo sathishela nebafundzi. Ase sitsi basekhona bafundzi labangametsembi thishela nobe asabatjele kwatiswa lokubanti ngalesifundvo. Yini lokufanele bayente? Bangaya kulomunye thishela kute abachazele kabanti ngalesifundvo. Nangabe lothishela wesibili avumelana nenchazelo yalothishela wekucala, labanyenti bafundzi bangase bakholelwe kuloko lokushiwo ngulabothishela. Ngendlela lefananako,  nangabe ungaciniseki ngaloko umbhali weliBhayibheli Johane abekusho ngebudlelwane emkhatsini waJesu naNkulunkulu Somandla, ungafundza lenye incwadzi yalomunye umbhali weliBhayibheli kute utfole kwatiswa kabanti. Nasi sibonelo: Cabanga ngaloko lokwabhalwa nguMatewu. Mayelana nesiphelo salelive, washo emavi aJesu, latsi: “Noko kute lowatiko kutsi lelo langa nemzuzu kuyawufika nini, ngisho netingilosi ezulwini neNdvodzana ayati, lowatiko nguBabe kuphela.” (Matewu 24:36) Lamavi akufakazela njani kutsi Jesu akasuye Nkulunkulu Somandla?

Jesu watsi Babe wati lokunyenti kuneNdvodzana. Nangabe Jesu abeyincenye yaNkulunkulu Somandla, abetawati tintfo letifanana naletatiwa nguBabe wakhe. Ngako-ke, iNdvodzana naBabe wayo, angeke baze balingane. Nobe kunjalo, labanye bangatsi: ‘Jesu abenetimo letimbili. Lapha abekhuluma njengemuntfu.’ Kodvwa nobe kwakunjalo, kutsiwani-ke ngemoya longcwele? Nangabe uyincenye yaNkulunkulu lofanako naBabe, kungani Jesu angasho kutsi nawo uyakwati loko lokwatiwa nguBabe wakhe?

Njengobe uchubeka nesifundvo sakho seliBhayibheli, utawetayelana nemavesi lamanyenti eliBhayibheli lakhuluma ngalendzaba. Afakazela liciniso ngaBabe, iNdvodzana, nemoya longcwele.—Tihlabelelo 90:2; Imisebenti 7:55; Kholose 1:15.