MIREHAKE ty ndaty mino ty Andrianagnahare telo miharo raike, fa Andrianagnahare raike avao ty Rae naho ty Anake vaho ty Fagnahy Masigne. Nao zao hoe hambagne avao iareo telo, fa sambe tompo ty hery sady sambe tsy nisy fiatomboha’e. Mirehake o fampianaragne iohoe fa Andrianagnahare ty Rae, Andrianagnahare i Anakey, sady Andrianagnahare i Fagnahy Masigney. Faie raike avao ty Andrianagnahare.

 Maro amy ty ndaty mino izay ty magneke fa tsy hai’e ty magnazava aze. Faie mihevetse iareo fa izay ty ampianare ty Baiboly. Tsy trea agnate Baiboly ao tihoe “Andrianagnahare telo miharo raike.” Misy hevetse magnamaregne izay vao ty ao? Mba hamaleagne izay, le andao tikagne hagnente ty andalan-teny andese o ndatio magnamaregne tie telo miharo raike ty Andrianagnahare.

Hoe ty Jaona 1:1: ‘Tamy i fifotoragney ty Tsara [“Saontsy”, TV ], le nindre aman’Andrianagnahare i Tsaray, vaho Andrianagnahare i Tsaray.’ (Iziliho ty Zitse Vantañe) Natoro i apositoly Jaona mazava soa, amo o toko iohoe fa i Jesosy o ‘Saontsio.’ (Jaona 1:14) Amy ty fanoagne i Saontsy tihoe i Andrianagnahare, le misy mihevetse fa ‘Andrianagnahare raike avao ty Anake naho i Rae.’

Ko haligno fa sinoratse tamy ty rehake girike hey ty boke i Jaona, vaho izay nadika amy ty rehake hafa. Faie mpandika rehake maro ty tsy nampiasa ty rehake tihoe “Andrianagnahare ty Saontsy.” Fa nagnino? Nahay ty rehake girike nanoratagne ty Baiboly iareo, le nirehake fa toko’e ho hafa ty nandikagne tihoe “Andrianagnahare ty Saontsy.” Akore ty toko’e handikagne aze? Intoagne misy ohatse tsiampe boake amy ty dikan-drehake angilé: “Manahake an’Andrianagnahare ty Logos [Saontsy].” (Dikan-drehake Vaovao ty Baiboly) “Fa andrianagnahare ty Saontsy.” (Tesitamenta Vaovao: Dikan-drehake Nihasoaegne) “Niharo taman’Andrianagnahare ty Saontsy sady nikarazan-draike tama’e.” (Tesitamenta Vaovao ty Mpandika Rehake) Naho henteagne o dikan-drehake rehoe, le tsy Andrianagnahare ty Saontsy. * Fa ty fanagna’e toeragne ambone amy ze raha namboare i Jehovah ro anoagne aze tihoe “andrianagnahare” (“a” soratse kedekede). “Mahery” ty dika tihoe “andrianagnahare” amo o andalan-tenio eo.

Tsy mahay ty rehake girike nanoratagne ty Baiboly ty maro amo o ndatio. Le akore ty ahafantaragne ty teà i apositoly Jaona horehafegne? Intoy misy ohatse: Misy ramosé raike magnavaza  lesogne. Tsy hambagne ty fahazoa i mpianatse rey i fagnazavagney. Akore ty ahafantara iareo ty maregne? Mangatake fagnazavagne aman-dramosé iareo. Hazava amy iareo i lesogney amy izay. Mba hahafantaragne ty hevetse amy Jaona 1:1 ka, le toko’e hipay fagnazavagne miomba ty toeragne tana i Jesosy, amy ty Fitaliliantsoa i Jaona ao rehe. Ho maregne ty hevetse azo’o naho manao izay rehe.

Dineho ty sinora i Jaona amy toko 1, andine’e 18: “Tsy nisy nahatrea an’Andrianagnahare [Tompo ty Hery] ndra ombia ndra ombia.” I Jesosy nisy nahatrea fa Anake. Hoe ty Jaona: “Nanjary nofotse ty Saontsy [Jesosy], sady nitoboke amantikagne etoy. Le nitrea’ay ty voninahi’e.” (Jaona 1:14) Inogne ty anto’e irehafagne tie raike avao i Andrianagnahare Tompo ty Herỳ naho i Anakey? Rehafe i Jaona fa ‘taman’Andrianagnahare ao ty Saontsy’ ndra “niharo taman’Andrianagnahare” naho amy ty Dikan-drehake Tontolo Vaovao. Akore ty hahamete ty ndaty raike miharo amy ty ndaty hafa, naho ie avao ka o ndaty hafa iharoa’e iohoe? Nambaha i Jesosy ty vatan-tegna’e naho i Rae’e amy Jaona 17:3. “Ihe Andrianagnahare maregne” ty nanognona’e an-dRae’e. Izao ty nampiboriboria i Jaona aze iaby naho fa namaragne ty Fitaliliantsoa’e reke: “Ty nanoratagne i reo le mba hinoa’areo fa i Jesosy ro Kirisity Anak’Andrianagnahare.” (Jaona 20:31). Tsy Andrianagnahare ty nanognonagne i Jesosy amy io eo fa Anak’Andrianagnahare. Magnampe antikagne hahafantatse ty Jaona 1:1 o fagnazavagne fagnampe’e boake amy ty Fitaliliantsoa i Jaona iohoe. Atao tihoe ‘andrianagnahare’ ty Jesosy ndra ty Saontsy fa managne toeragne ambone, faie tsy i Andrianagnahare Tompo ty Herỳ reke.

Iheregnantikagne indraike i ohatsey. Naho misy mpianatse mbe mahimahigne avao ndra tie fa nahazo fagnazavagne fagnampe’e, inogne ty toko’e hatao iareo? Mangatake fagnazavagne fagnampe’e amy ty ramosé raike hafa iareo. Va’e tsy ho mahimahigne sasa ty maro amy iareo naho magnamaregne ty fagnazava i ramosé voaloha’ey ty fagnazava i ramosé faharoey. Naho tsy matoky ty fagnazavagne teà i Jaona horehafegne miomba ty fifandrambesa i Jesosy naho i Andrianagnahare Tompo ty Herỳ ka rehe, le mipalià fagnazavagne fagnampe’e amy ty ndaty hafa  nanoratse Baiboly. Dineho, ohatse, ty raha sinora i Matio. Nahere’e indraike ty raha rineha i Jesosy retoagne naho fa ie ro nanoratse ty miomba ty hitapera ty tontolo toy: “Tsy misy mahafantatse i andro naho i lera zay, ndra ty anjely an-dagnitse agne ndra i Anakey, naho tsy le i Rae avao.” (Matio 24:36) Nagnino o rehake iohoe ro magnamaregne fa tsy i Andrianagnahare Tompo ty Herỳ ty Jesosy?

Nirehake ty Jesosy fa mahafanta-draha mihoatse ty Anake ty Rae. Ho nihambagne ty raha fanta i Jesosy naho i Rae’e, naho ie avao i Andrianagnahare Tompo ty Herỳ. Izay ty magnamaregne fa tsy mira ty Anake naho ty Rae. Faie misy mirehake tie: ‘A i Jesosy anio Andrianagnahare sady ndaty! Ndaty reke tamy io.’ Ndra tie atao tihoe maregne zay, akore ka ty amy i fagnahy masigney? Naho toe mira amy i Andrianagnahare Raey reke, nagnino ty Jesosy tsy nirehake tie fa fanta i fagnahỳ ka ze fanta i Rae?

Hahay andalan-teny maro mifanandrife amo o foto-kevetse iohoe rehe, naho manohy mianatse Baiboly. Magnamafe ty hamarenagne miomba ty Rae naho ty Anake sady ty fagnahy masigne ty fanoagne izay.—Salamo 90:2; Asan’ny Apostoly 7:55; Kolosianina 1:15.