TIKU kanajlanikgo Trinidad wankgo pi kgalhtutu litakgatsi Dios: xaTlat, xaKgawasa chu Espíritu Santo. Chu wankgo pi uma kgalhtutu lakxtum, putum tlan tlawakgo chu nitiku kamalakatsukilh. Wa xlakata, uma tamasiy xlakata Trinidad masiya pi xaTlat Dios, xaKgawasa Dios chu Espíritu Santo na Dios, pero uma xkgalhtutukan kaj chatum Dios litaxtukgo.

Lhuwa latamanin tiku kanajlakgo uma tamasiy nila wankgo tuku xlakata chuna tamasiya. Maski chuna, makgapitsi max lakpuwankgo pi uma tamasiy wi kxTachuwin Dios. Pero xlakaskinka liwana nakatsiyaw pi uma tachuwin Trinidad nipara makgtum talhkanit kBiblia. Pero ¿anan akgtum versículo anta kBiblia niku tamakgachakgxi o takgatekgsa pi lichuwinan xlakata Trinidad? Xlakata tlan nakgalhtinanaw uma takgalhskinin, kaʼakxilhwi akgtum texto xalak Biblia nema makgapitsi latamanin limaklakaskinkgo xlakata nalimasiyakgo pi tamasiy xlakata Trinidad wi kBiblia.

Juan 1:1 wan: «Akxni ninaj tu xʼanan, wa xwanit nTachuwin. Cha nchu yuma nTachuwin, wa xtawi Dios, cha nchu nTachuwin, watiya Dios xwanit». Watiya uma capítulo pero atanu versículo nema alistalh wilakgolh, apóstol Juan liwana masiya pi «nTachuwin» wa Jesús (Juan 1:14). Xlakata uma texto wan pi Tachuwin Dios xwanit, makgapitsi lakpuwankgo pi xaKgawasa chu xaTlat watiya chatum Dios.

Liwana kakatsiw pi uma pulaktu xalak Biblia, xapulana tatsokgli ktachuwin xagriego, chu alistalh tamatitaxtilh kʼatanu tachuwin. Lhuwa tiku matitaxtikgolh Biblia kʼatanu tachuwin ni maklakaskinkgolh: «Tachuwin watiya Dios xwanit». ¿Tuku xlakata? Xlakata akxni liwana likgalhtawakgakgolh chu akgatekgskgolh tachuwin xagriego nema litatsokgnit Biblia, akxilhkgolh pi xlakata tlakg liwana namatitaxtikgo kʼatanu tachuwin, xtalakaskin tanu natamatitaxti. Kaʼakxilhwi tuku wankgo makgapitsi: «la Dios xwanit», «tachuwin chatum dios xwanit». Chuna la masiyakgo umakgolh Biblia, Tachuwin ni watiya Dios xwanit. * Uma versículo masiya pi Tachuwin tlakg lanka xlakatsukut nixawa amakgapitsi tuku Jehová tlawanit, chu wa xlakata wan pi chatum «dios». Kʼuma texto, tukuwani «dios», xaminúscula litatsokgnit, uma wamputun pi «chatum tiku kgalhi litliwakga».

Lhuwa latamanin ni chuwinankgo griego nema litsokgka Biblia. Wa xlakata, ¿la liwana nakatsiyaw tuku xwamputun apóstol Juan? Kawiliw akgtum liʼakxilhtit, chatum makgalhtawakgena wi tuku kamasiyanima tiku kamakgalhtawakgema. Alistalh uma tiku kgalhtawakgamakgolh tanu tanu lakapastakkgo xlakata tuku xkamasiyaniputunkan. ¿La natlawakgo xlakata liwana naʼakgatekgskgo? Naskinikgo xmakgalhtawakgenakan tlakg kakawanilh xlakata tuku kamasiyanima. Chuna tlakg tlan naʼakgatekgskgo tuku xkamasiyaniputun. Nachuna, xlakata tlan nakatsiyaw  tuku wamputun texto xla Juan 1:1, tlakg tlan kaʼakxilhwi Evangelio xla Juan. Anta tlakg naputsayaw xlakata tuku litaxtu Jesús. Akxni natekgsaw, tlakg tlan nakatsiyaw tuku xwamputun apóstol Juan.

Kaʼakxilhwi tuku alistalh tsokgli Juan kcapítulo 1 versículo 18: «Wa Dios [nema kgalhi xliputum litliwakga], ti ni aʼukxilha». Pero makgapitsi latamanin akxilhkgolh xKgawasa Dios, Jesús, xlakata Juan wan: «Cha nchu wa yuma nTachuwin, [Jesús] tikgalhilh xmakni, na kintikatatawilan, na ktiukxilhwi xlikakni» (Juan 1:14). Xlakata uma tuku akxilhwi, ¿la tlan nawanaw pi xaKgawasa na watiya Dios nema kgalhi xliputum litliwakga? Nachuna, Juan masiya pi Tachuwin «xtawi Dios». ¿La tlan chatum natatawila achatum chu na watiya nawan? Anta kJuan 17:3 akxilhaw pi Jesús liwana tiwa pi tanu xla chu xTlat xala talhman, nema wani «mintastum Dios talulokgtat». Chu akxni Juan atsinu nina xtlawakgo xtatsokgni wan: «Wampi wa yuma nkatuwaj, wa litatsokgnit lakimpi nakanajlayatit mpi wa Jesús, wa nCristo xKam Dios» (Juan 20:31). Uma versículo ni wan pi Jesús wa Dios, wata Jesús xKgawasa Dios. Putum uma textos xla uma Evangelio kinkamasiyanikgoyan la naʼakgatekgsaw Juan 1:1. Tachuwin, Jesús, chatum «dios», wamputunaw pi lanka xlakatsukut, pero ni xtachuna la Dios nema kgalhi xliputum litliwakga.

Kalakapastakparaw liʼakxilhtit xla makgalhtawakgena. Kaliwiliw pi makgapitsi tiku kgalhtawakgamakgolh wi tuku ni lu liwana akgatekgskgo maski makgalhtawakgena liwana kawaninita. ¿Tuku na tlan natlawakgo? Tlan naputsakgo atanu makgalhtawakgena chu naskinikgo kakamakgtayalh xlakata tuku katsiputunkgo. Komo xlichatiy makgalhtawakgena na watiya kawani tuku kawanilh xapulana, max putum tiku kgalhtawakgamakgolh liwana naʼakgatekgskgo. Nachuna kinkaʼakgspulayan, komo ni liwana katsiyaw tuku xwamputun Juan xlakata tiku Jesús chu Dios tiku kgalhi xliputum litliwakga. Komo chuna, tlan naputsayaw atanu tiku na tsokgli Biblia xlakata nakinkamakgtayayan. Kawiliw akgtum liʼakxilhtit xla Mateo. Xla tsokgwililh uma xtachuwin Jesús: «Wa mpi akxni yama nkilhtamaku nchuna nalay, chu xatu hora nawan [akxni namin lisputni], tini katsiy,  asta ni mpala wa ángeles xala kʼakgapun, chu na ni mpala wa xaKam, wampi xman wa nkinTlat» (Mateo 24:36). ¿La liwana kinkamakgatekgsniyan uma tachuwin pi Jesús ni watiya Dios nema kgalhi xliputum litliwakga?

Jesús wan pi xaTlat tlakg katsi nixawa xaKgawasa. Pero komo Jesús na xlitaxtulh Dios nema kgalhi xliputum litliwakga, na xkatsilh tuku katsi xTlat. Chuna akxilhaw pi nila watiya nawankgo xaKgawasa chu xaTlat. Maski lhuwata tuku akxilhwi, wi tiku nawan: «Jesús pulaktiy xkgalhi xlatamat: xalak akgapun chu xla chatum lataman, chu unu chuwinalh chuna la chatum lataman». Kaliwiliw pi uma tuku wankgo xaxlikana. Chu, ¿niku kitawila espíritu santo? Komo xlikana ama tamasiy pi espíritu santo na watiya Dios, ¿tuku xlakata Jesús ni wa pi espíritu santo xkatsi uma tamakatsin? Xla lichuwinalh pi kajwatiya tiku xlakgapasa uma, wa xaTlat.

Akxni wix tlakg nalikgalhtawakgaya Biblia, tlakg nalakgapasa textos xalak Biblia nema lichuwinan uma. Putum uma textos kinkawanikgoyan tuku xaxlikana xlakata xaTlat, xaKgawasa chu espíritu santo (Salmo 90:2; Hechos 7:55; Colosenses 1:15).