AN MGA tawo nga natoo ha katutdoan han Trinidad nasiring nga an Dios ginkukompwesto hin tulo nga persona—an Amay, an Anak, ngan an Baraan nga Espiritu. Ginsisiring nga an tagsa hini nga tulo nga persona katupong ha usa kag usa, makagarahum-ha-ngatanan, ngan waray tinikangan. Salit, sumala ha doktrina han Trinidad, Dios an Amay, Dios an Anak, ngan Dios an Baraan nga Espiritu, kondi uusa la an Dios.

Damu nga tawo nga natoo ha Trinidad an nasiring nga diri nira maisaysay ini nga katutdoan. Bisan pa hito, bangin naghuhunahuna hira  nga ito an igintututdo han Biblia. Sadang tigamnan nga an pulong nga “Trinidad” diri gud makikita ha Biblia. Pero makikita ba ha Biblia an ideya han Trinidad? Basi mabaton ini nga pakiana, kitaon naton an usa nga teksto nga agsob gamiton han mga nasuporta ha Trinidad.

An Juan 1:1 nasiring: “Ha tinikangan amo an Pulong, ngan an Pulong upod han Dios, ngan an Pulong amo an Dios.” Ha urhi nga bahin hiton mismo nga kapitulo, matin-aw nga ipinapakita ni apostol Juan nga “an Pulong” amo hi Jesus. (Juan 1:14) Kondi, tungod kay an Pulong tinatawag nga Dios, an iba nasiring nga an Anak ngan an Amay bahin han uusa nga Dios.

Hinumdumi nga ini nga bahin han Biblia orihinal nga iginsurat ha Griego. Ha urhi, iginhubad han mga parahubad an Griego nga teksto ngadto ha iba nga mga yinaknan. Kondi, damu nga mga parahubad han Biblia an waray gumamit han mga termino nga “an Pulong amo an Dios.” Kay ano? Uyon ha ira hinbabaroan ha Griego nga ginamit ha pagsurat han Biblia, adto nga mga parahubad nakasiring nga an mga termino nga “an Pulong amo an Dios” sadang ighubad ha iba nga paagi. Paonan-o? Ini an pipira nga mga ehemplo: “An Logos [Pulong] dios.” (A New Translation of the Bible) “An Pulong usa nga dios.” (The New Testament in an Improved Version) “An Pulong upod han Dios ngan pariho ha iya an kinaiya.” (The Translator’s New Testament) Sumala hini nga mga hubad, an Pulong diri amo an Dios mismo. * Lugod, tungod han iya hitaas nga katungdanan ha mga linarang ni Jehova, an Pulong tinatawag nga “usa nga dios.” Dinhi an termino nga “dios” nangangahulogan nga “usa nga makagarahum.”

Kadam-an nga mga tawo an diri maaram han Griego nga ginamit ha pagsurat han Biblia. Salit paonan-o ka mahibabaro kon ano gud an karuyag ipasabot ni apostol Juan? Hunahunaa ini nga ehemplo: An usa nga maestro nagsasaysay han usa nga topiko ha iya mga estudyante. Katapos hito, an mga estudyante nagkaada iba-iba nga mga opinyon mahitungod ha kon paonan-o sasabuton an iginsaysay. Paonan-o magkakauruyon an mga estudyante mahitungod hito? Mahimo hira mangaro ha maestro hin dugang pa nga impormasyon. Sigurado nga an paghibaro hin dugang nga mga impormasyon mabulig  ha ira nga masabtan hin mas maopay an topiko. Ha sugad man nga paagi, basi masabtan an kahulogan han Juan 1:1, mahimo mo kitaon an Ebanghelyo ni Juan para ha dugang pa nga impormasyon mahitungod han katungdanan ni Jesus. An paghibaro hin dugang nga mga impormasyon mahitungod hini nga topiko mabulig ha imo nga makahimo hin husto nga konklusyon.

Pananglitan, tagda an dugang nga iginsurat ni Juan ha kapitulo 1, bersikulo 18: “Waray usa nga tawo nga nakakita han Dios [nga Makagarahum-ha-ngatanan].” Kondi, nakita han mga tawo hi Jesus, an Anak, kay hi Juan nasiring: “An Pulong [hi Jesus] nahimo nga unod, ngan nag-ukoy ha aton. Ngan aton nakita an iya himaya.” (Juan 1:14) Paonan-o, kon sugad, an Anak magigin bahin han Makagarahum-ha-ngatanan nga Dios? Hi Juan nasiring liwat nga an Pulong “upod han Dios.” Kondi paonan-o mahitatabo nga an usa nga indibiduwal makaupod han lain nga tawo ngan ha pariho nga panahon magin ito mismo nga tawo? Dugang pa, sugad han nahisurat ha Juan 17:3, iginpapatin-aw ni Jesus an kaibahan niya mismo ngan han iya langitnon nga Amay. Iya tinatawag an iya Amay nga “amo la an matuod nga Dios.” Ngan ha ikatarapos han Ebanghelyo ni Juan, ginsumaryo niya ito pinaagi han pagsiring: “Ini iginsurat, basi kamo tumoo, nga hi Jesus amo hi Kristo nga Anak han Dios.” (Juan 20:31) Tigamni nga hi Jesus tinatawag nga Anak han Dios, diri an Dios. Ipinapakita hinin iginhatag nga dugang nga impormasyon dida ha Ebanghelyo ni Juan kon paonan-o sadang sabuton an Juan 1:1. Hi Jesus, an Pulong, “usa nga dios” ha paagi nga hitaas an iya katungdanan kondi diri pariho ha Dios nga Makagarahum-ha-ngatanan.

Hunahunaa utro an ehemplo mahitungod han maestro ngan han mga estudyante. Handurawa nga an iba nagruruhaduha pa gihapon, bisan kon hinbatian na an dugang nga pagsaysay han maestro. Ano an mahimo nira buhaton? Mahimo hira magpakiana ha iba nga maestro para ha dugang nga impormasyon ha amo gihapon nga topiko. Kon umuyon an ikaduha nga maestro ha iginsaysay han siyahan nga maestro, bangin masulbad na an mga pagruhaduha han kadam-an nga mga estudyante. Ha sugad man nga paagi, kon diri ka sigurado ha ginsisiring han parasurat han Biblia nga hi Juan mahitungod han relasyon ni Jesus ngan han Dios nga Makagarahum-ha-ngatanan, mahimo ka dumaop ha lain nga parasurat han Biblia para han dugang nga impormasyon. Tagda, pananglitan, an iginsurat ni Mateo. Mahitungod han kataposan hini nga sistema han mga butang, iya ginkotar  hi Jesus nga nasiring: “Mahitungod hito nga adlaw ngan oras, waray usa nga maaram, diri bisan an mga anghel ha langit, bisan an Anak kondi an Amay la.” (Mateo 24:36) Paonan-o pinamamatud-an hini nga mga pulong nga hi Jesus diri amo an Dios nga Makagarahum-ha-ngatanan?

Hi Jesus nasiring nga an Amay mas maaram kay ha Anak. Kon hi Jesus bahin han Dios nga Makagarahum-ha-ngatanan, maaram unta hiya han mga impormasyon nga hinbabaroan han iya Amay. Salit, an Anak ngan an Amay diri puydi nga magkatupong. Kondi an iba masiring: ‘Duha an kinaiya ni Jesus. Dinhi nagyayakan hiya sugad nga tawo.’ Kondi bisan kon pananglitan totoo ito, kumusta man an baraan nga espiritu? Kon bahin ito han uusa nga Dios sugad han Amay, kay ano nga hi Jesus waray magsiring nga maaram ito han hinbabaroan han Amay?

Samtang nagpapadayon ka ha imo pag-aram ha Biblia, magigin pamilyar ka ha damu pa nga mga teksto han Biblia nga may kalabotan hini nga topiko. Pinamamatud-an hito an kamatuoran mahitungod han Amay, han Anak, ngan han baraan nga espiritu.—Salmo 90:2; Buhat 7:55; Kolosas 1:15.