BAIBULO jikusasala mwakupikanika cenene kuti pana Mlungu jumo jusyesyene. (Maliko 12:29) Nambope, ŵandu ŵane akusakulupilila cijiganyo ca Utatu kapena kuti Mlungu ali ŵatatu. Jemanjaji akusati pana Atati, Mwanace, soni Msimu weswela. Ŵanduŵa akusakulupilila kuti wosopeŵa ali ŵakulandana macili, soni kuti ŵangali ndandilo. Cijiganyoci cikusati Atati ali Mlungu, Mwanace ali Mlungu, soni Msimu weswela uli Mlungu. Nambo pana Mlungu jumope basi.

Ŵandu ŵajinji ŵakusakulupilila Utatu, akusajiticisya kuti ngaŵa mkukombola kusala yakupikanika cenene pa cijiganyoci. Nambope akusaganisya kuti Baibulo jikusajiganya kuti Mlungu ali ŵatatu. Tukusosekwa kumanyilila kuti liloŵe lyakuti “Utatu,” lyangasimanikwa m’Baibulo. Nambo ana Baibulo jikusasala cilicose cakwayana ni cijiganyo ca Utatu? Kuti tujanje ciwusyoci, kwende tulole kaje lilemba lyakusalikamulicisya masengo ŵandu ŵakusakulupilila cijiganyo ca Utatu.

Lilemba lya Yohane 1:1 likusati: “Pandanda lyapali Liloŵe, Liloŵe lyaliji ni Mlungu, Liloŵelyo lyaliji Mlungu.” Kaneko mu mtwe uwuwu, ndumetume Yohane ŵasasile mwakupikanika cenene kuti “Liloŵe” lili Yesu. (Yohane 1:14) Ligongo lyakuti Liloŵe likolanjikwa Mlungu, ŵane akusati Mwanace, soni Atati ali mbali ja Mlungu jumo.

Tukusosekwa kumanyilila kuti mbali ja Baibulo jeleji ŵajilembile mu Cigiliki pandanda. Kaneko, ŵandu ŵagopolele malemba ga Cigiliki kwawusya mu yiŵeceto yine. Nambo ŵagopolela Baibulo ŵane nganakamulicisya masengo maloŵe gakuti “Liloŵelyo lyaliji Mlungu.” Ligongo cici? Mwakamulana ni kamanyilile kawo ka Cigiliki caŵacikamulicisye masengo pakulemba Baibulo, ŵagopolelawo ŵayiweni kuti maloŵe gakuti “Liloŵelyo lyaliji Mlungu” gakusosekwa kugagopolela mwa mtundu wine. Mwatuli? Kwende tulole yisyasyo yine. Baibulo jine jagopolele kuti, “Liloŵe lyaliji mlungu.” (The New Testament in an Improved Version) Jinesoni jagopolele kuti, “Liloŵe lyaliji ni Mlungu, soni lyaliji mpela jwalakwe.” (The Translator’s New Testament)  Mwakamulana ni kagopolele keleka, Liloŵe nganiliŵa Mlungu jusyesyene. * Nambo ligongo lyakuti akwete ukumu wapenani pa yakupanganyikwa yosope ya Yehofa, Liloŵelyo likusakolanjikwaga kuti “mlungu.” (jwakola “m” jwamwana ngaŵaga “M” jwamkulungwa) Pelepa, pakusala kuti “mlungu” akugopolela kuti “jwamacili” ngaŵaga “Jwamaciligose.”

Ŵandu ŵajinji ŵangacimanyilila Cigiliki caŵakamulicisye masengo pakulemba Baibulo. Sambano, ana mpaka amanyilile catuli yaŵagopolelaga ndumetume Yohane mu lilembali? Kwende tulole cisyasyo aci: Tujile kuti mkujiganya akwiganya lijiganyo line lyakwe. Kaneko, ŵakulijiganya akulekangana nganisyo pa yalijiganyisyeyo. Ana ŵakulijiganyawo mpaka atende cici kuti ayipikanicisye? Jemanjajo mpaka am’ŵende mkujiganyajo kuti ŵakamucisye kupikanicisya. Mwangakayicila, kulijiganya yejinji mpaka kwakamucisye kujipikanicisya cenene nganijo. Mwakulandana ni yeleyi, kuti apikanicisye kagopolele ka Yohane 1:1, aŵalanje Ngani Syambone sya Yohane kuti amanyilile yejinji ya ukumu wa Yesu. Kulijiganya yejinji panganiji kucakamucisya kumanyilila yisyesyene.

Mwambone, alole yaŵalembilesoni Yohane pa mtwe 1 ndime ja 18: “Pangali atamose jumo juŵam’weni Mlungu [Jwamaciligose].” Nambope, ŵandu ŵam’weni Yesu, ni ligongo lyakwe Yohane ŵalembile kuti: “Liloŵe lyaŵele mundu, ni ŵatemi pasikati petu. Twaluweni lumbili lwakwe.” (Yohane 1:14) Sambano, mpaka yikombolece catuli kuti Mwanace aŵesoni mbali jine ja Mlungu Jwamaciligose? Yohane ŵalembilesoni kuti “Liloŵe lyaliji ni Mlungu.” Ana mpaka yikombolece catuli kuti mundu aŵe yalumo ni mundu jwine, soni pandaŵi jijojo aŵe jwinejo? Konjecesya pelepa, mu lilemba lya Yohane 17:3, Yesu akusala mwakupikanika cenene kulekangana kwakupali pasikati pa jwalakwejo ni Atatigwe ŵakwinani. Jwalakwe akusala kuti Atatigwe ali “Mlungu jikape ŵakuwona.” Cakumbesi kwa Ngani Syambone sya Yohanesi, jwalakwe ŵalembile kuti: “Nambo ayi yinduyi ayilembile kuti jemanja mkulupilile kuti Yesu ali Mklistu, Mwanace  jwa Mlungu.” (Yohane 20:31) Pa lilembali ngakusala kuti Yesu ali Mlungu, nambo ali Mwanace jwa Mlungu. Malembaga, gakutukamucisya kupikanicisya lilemba lya Yohane 1:1. Yesu jwali Liloŵe, ali “mlungu” mu litala lyakuti, akwete ukumu wapenani, nambo jwalakwe ngaŵa kuti ali Mlungu Jwamaciligose.

Aganicisyesoni cisyasyo ca Mkujiganya ni ŵakulijiganya ŵala. Tujile kuti ŵane atenda kayicilape, atamose kuti ŵajigenyesoni mwakupikanika cenene. Ana jemanjajo mpaka atende cici? Mpaka am’wusye mkujiganya jwine kuti ŵakamucisye kupikanicisya lijiganyolyo. Naga mkujiganya jwaŵiliju akwasalila kuti yaŵajiganyisye mkujiganya jwandandajo yili yisyene, nikuti ŵane mwa ŵakulijiganyawo cacipikanicisya. Mwakulandana ni yeleyi, naga wawojo ngakusimicisya yaŵalembile Yohane pakwamba ya Yesu ni Mlungu Jwamaciligose, komboleka kuŵalanga yaŵalembile ŵakulemba Baibulo ŵane kuti amanyilile yejinji. Mwambone, kwende tulole yaŵalembile Matayo. Pakwamba ya mbesi ja cilambo, jwalakwe ŵalembile yaŵaŵecete Yesu kuti: “Nambo ya lisiku kapena ndaŵi jakwe, pangali jwakujimanyilila. Atamose malayika gakwinani ngagakumanyilila. Atamose uneji Mwanace ngangumanyilila, nambo Atati jikape ni ŵakumanyilila.” (Matayo 24:36) Ana lilembali likusimicisya catuli kuti Yesu nganaŵa Mlungu Jwamaciligose?

Pa lilembali Yesu ŵaŵecete kuti Atati jikape ni ŵakumanyilila yejinji kupunda Mwanace. Yikaŵe kuti Yesu ali mbali jine ja Mlungu Jwamaciligose, akamanyililaga yosope yaŵamanyililaga Atatigwe. M’yoyo, Mwanace ngakomboleka kuŵa jwakulandana ni Atati. Nambope, ŵane mpaka asale kuti ‘Yesu ŵakombolekaga kuŵa Mlungu, soni kuŵa mundu. Pa lilembali jwalakwe ŵaŵecetaga mpela mundu.’ Nambo atamose kuti yeleyi yikaŵe yisyene, nambi wuli pakwamba ya msimu weswela? Yikaŵe kuti msimu weswela uli mbali jine ja Mlungu jwali Atati, ligongo cici Yesu nganasala kuti msimu weswela wamanyililaga yaŵamanyililaga Atati?

Pakwendelecela kulijiganya Baibulo, cacipikanicisya ngani syejinji sya m’Baibulo syasikusasala ya nganiji. Nganisi sikusasimicisya kuti pana Mlungu jumo jwali Yehofa, soni kuti Yesu ni msimu weswela nganaŵa Mlungu.—Salimo 90:2; Masengo 7:55; Akolose 1:15.