PIIN nib mich e machib ni Trinitas u wan’rad e yad ma yog ni Chitamangiy, nge Fak, nge fare Kan ni Thothup e yad ba taareb. Yad ma yog ni taareb rogorad, ma gubin ma rayog rorad, ma dar sumgad. Ere, rogon e machib ni Trinitas e En ni Chitamangiy e Got, ma En ni Fak e Got, ma fare Kan ni Thothup e Got. Machane kemus ni taareb e Got ni bay.

Boor e piin nib mich e Trinitas u wan’rad ni ka rogned ni dabiyog ni ngar weliyed fan e re machib ney. Machane yugu aram rogon ma yad ma lemnag ni bay e re machib nem u lan e Bible. Fare bugithin ni “Trinitas” e dariy u lan e Bible. Machane gur, bay e machib riy u Bible? Ngad guyed reb e thin nu Bible ni ma fanay e piin nib mich e Trinitas u wan’rad ya nge yag nda nanged e fulweg ko re deer ney.

Be gaar e John 1:1: “Dawori sunumeg Got e fayleng ma bay fare Thin; ma re Thin nem e immoy rok Got, ma fare Thin e ir Got.” (Bible ni Thothup) Boch nga tomuren e re guruy nem me yog apostal John ni “fare Thin” e aram Jesus. (John 1:14) Machane, bochan ni ka nog ni fare Thin e ir Got, ma aram fan ni ma lemnag boch e girdi’ ni En ni Chitamangiy nge Fak e yow ba taareb.

Mu tay fanam i yan riy nre thin nu Bible nem e ni yoloy ko som’on ni thin ni Greek. Me yan i boch ngaray riy min pilyeg e re thin nem nga yugu boch e thin. Machane yu ken e Bible e dan piliyeg e re thin nem riy ni “fare Thin e ir Got.” Mang fan? Bochan ni yad manang e thin ni Greek, ma ka rogned ndab ni pilyeg e re thin ney ni “fare Thin e ir Got”. Ere uw rogon ni kar pilyeged? Baaray boch i rogon: “Fare Thin e yib rok Got.” (A New Translation of the Bible) “Fare Thin e ir reb e got.” (The New Testament in an Improved Version) “Fare Thin e immoy rok Got ma bay  rarogon Got rok.” (The Translator’s New Testament) Rogon ni kan pilyeg ko pi Bible nem e fare Thin e gathi ir Got. Machane ka nog ni “ir reb e got” ni bochan e ba tolang e liw rok u fithik’ e tin ni ke sunmiy Jehovah. Ere, fan fare bugithin ni “got” e “be’ nib gel gelngin.”

Yooren e girdi’ e dar nanged e thin nu Bible ni kan yoloy ni thin ni Greek. Ere, uw rogon ma ga nang e n’en nri be yip’ apostal John fan? Am lemnag reb e sensey ni be weliy ban’en ngak e piin ni be skulnagrad. Faani tomur riy ma yugu ra bagayad fapi bitir ma rogon laniyan’ ko n’en ni ke weliy fare sensey. Ere, uw rogon me taareban’ fapi bitir? Rayog ni ngar fithed fare sensey ngki weliy bayay. Ya dabisiy nra tamilangan’rad boch ni faan yad ra fith fare sensey. Ere, ku arrogon nra ngam nang fan fare thin u John 1:1 nib fel’ rogon, ma rayog nim yaliy fare babyor ku John u Bible ya nge yag nim nang e liw rok Jesus. Ma faanra yoor ban’en nim fil u murung’agen e liw rok Jesus ma rayog ni nge tamilangan’um.

Mu lemnag e n’en ni ki yog John ko guruy ni 1 ko 18 ni gaar: “Dariy be’ ni kaa guy owchen Got [ni Gubin Ma Rayog Rok].” Machane ke guy e girdi’ Jesus ni En Fak Got ya gaar John: “Re Thin nem e yib i ngal’ nib girdi’ nge yib i par ngodad. Kad guyed fel’ngin nge feni gol nge feni yul’yul’.” (John 1:14) Ere, uw rogon me taareb rogon Got ni Gubin Ma Rayog Rok nge Fak? Ki yog John ni fare Thin e “immoy rok Got.” Machane, uw rogon ni immoy Jesus rok Got maku ir Got? Ki tamilangnag Jesus u John 17:3 e n’en nib thil u thilrow e Chitamangin nu tharmiy. I yog Jesus ngak e Chitamangin ni gaar, “kari mmus ni gur e bin riyul’ e Got.” Tungun e re babyor rok John nem e yog riy ni gaar: “Tiney e kan yoloy ni bochan e nge yog ni mich u wun’med ni Jesus e ir fare Messiah, ni faanem ni Fak Got.” (John 20:31) Mu tay fanam i yan riy ni ka nog Fak Got ngak Jesus ma gathi Jesus e Got. Pi thin ney ni bay ko re babyor rok John ney e be tamilangnag fare thin u John 1:1. Jesus ni ir fare Thin e ir “reb  e got” ni be yip’ fan ni bay e liw rok nib tolang machane gathi ir Got ni Gubin Ma Rayog Rok.

Mu lemnag bayay fare sensey nge fapi bitir. Faanra ka bay boch fapi bitir ni ka be maruwaran’rad u tomuren ni ki sul fare sensey u daken e n’en ni be weliy murung’agen, ma mang e yad ra rin’? Rayog ni ngar fithed yugu reb e sensey nge ayuwegrad. Faanra micheg fa bin migid e sensey nib puluw e n’en ni ke yog fa bin som’on e sensey, ma aram e dabki maruwaran’ fapi bitir. Ku arrogon, nfaanra dawori tamilang u wan’um e n’en ni be yog John u murung’agen e tha’ u thilin Jesus nge Got ni Gubin Ma Rayog Rok, ma rayog ni ngkum yaliy e thin rok boch e girdi’ u lan e Bible ya nge yag ni tamilangan’um riy. Mu lemnag e n’en ni yoloy Matthew. I yoloy e n’en ni yog Jesus u murung’agen tungun e re m’ag ney ni gaar: “Re rran nem nge re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matthew 24:36) Uw rogon ni be micheg e pi thin nem ni Jesus e gathi ir Got ni Gubin Ma Rayog Rok?

I yog Jesus ni ka boor ban’en ni manang e en Chitamangiy ko tin ni manang. Faanra Jesus nge Got ni Gubin Ma Rayog Rok e yow ba taareb ma ere gubin ban’en ni manang e Chitamangin e ku manang. Ere, en Chitamangiy nge en Fak e de taareb rogorow. Machane ku rayog ni nge gaar boch e girdi’: ‘Jesus e ir e kan ni ku rayog ni nge mang girdi’. Ma pi thin ney e yog u nap’an ni immoy nib girdi’.’ Faanra riyul’ ni aram rogon, ma ere uw rogon fare kan ni thothup? Faanra ku ir Got, ma mang fan nde yog Jesus ni manang e kan ni thothup e tin ni manang e en Chitamangiy?

Ra um fil e Bible ma ga ra pirieg boor e thin riy nra tamilangnagem ko re n’ey. Pi thin nem e be micheg e tin nib riyul’ u murung’agen e en Chitamangiy, nge Fak, nge fare kan ni thothup.​—Psalm 90:2; Acts 7:55; Kolose 1:15.