Gin Mumiyo Lukricitayo me Ada Pe Gitiyo ki Yatariya i Worogi

DANO milion mapol ata gimaro dok bene giworo yatariya. Buk me The Encyclopædia Britannica lwongo yatariya ni “lanyut madit me dini pa Lukricitayo.” Ento Lukricitayo me ada pe gitiyo ki yatariya i worogi. Pingo pe gitiyo kwede?

Tyen lok ma pire tek tye ni Yecu Kricito pe oto i kom yatariya. Nyig lok me leb Grik ma tye ni stau·rosʹ aye pol kare kigonyo ni “yatariya.” Nyig lok man kono gonye ni “tal nyo wir ma ocung atir.” Buk me The Companion Bible waco atir ni: “[Stau·rosʹ] pe te lokke ni bao aryo ma kiriyo i kom lawote i kit mo keken . . . Dok pe tye coc mo i leb Grik [Cik Manyen] ma loko pi bao aryo.”

I wang tyeng mapol, luco Baibul gutiyo ki nyig lok mukene ma loko i kom gin ma kitiyo kwede me neko Yecu. Nyig lok me leb Grik man aye xyʹlon. (Tic pa Lukwena 5:30; 10:39; 13:29;  Jo Galatia 3:13; 1 Petero 2:24) Nyig lok man gonye ni “bao” nyo “wir, layibi, nyo yat.”

Me tito tyen lok mumiyo i kare ca onongo kitiyo ki wir me neko nek, buk me Das Kreuz und die Kreuzigung (Yatariya Kacel ki Guru Dano i Kom Yat), ma Hermann Fulda aye ocoyo waco ni: “Yadi onongo pe maro nonge ka ma nongo kiyero me neko iye ngat moni i nyim lwak. Pi meno, onongo kicomo mere wir mo i ngom. Kingabo lubal en i kom wir meno, kiguru cinggi malo ka kiryeyo tyen-gi piny ci kitweyo nyo kiguru i kome.”

Lanyut ma loyo ducu kono ada a ki i Lok pa Lubanga. Lakwena Paulo owaco ni: “Kricito aye ma nene okokowa ki i cen ma opoto i komwa pien pe walubo cik; en obino ci olokke odoko dano ma giceno ma ka-kawa. Pien yam gicoyo ni, Cen opoto i kom dano ma gingabo malo i wi yat [King James Version bene oketo ni “yat,”]” (Jo Galatia 3:13) Ka kany Paulo owaco lok ma tye i Nwoyo Cik 21:22, 23, ma loko atir i kom yat, ento pe yatariya. Kit ma nek ma kit man onongo miyo ngat moni doko gin ma ‘kiceno-ni,’ pe bedo ber bot Lukricitayo me deyo gangigi ki cal pa Kricito ma nongo kiguru i kom yat.

Pe tye lok mo ma nyuto ni jo ma gubedo ka wacci gin gibedo Lukricitayo gutiyo ki yatariya i worogi pi mwaki 300 i nge to pa Kricito. Ento i cencwari me angwen, Laloc mo ma nyinge Constantine ma oa ki i kin lukamfiri, olokke odonyo i dini pa Lukricitayo goba ci oketo yatariya macalo lanyute. Gin ma Constantine onongo tye ka mitone wan pe wangeyo, ento yatariya gire pe tye ki kit kubbe mo ki Yecu Kricito. Yatariya i ada oa ki bot lukamfiri. Buk me The New Catholic Encyclopedia waco ni: “Jo ma gukwo ma onongo kare pa Lukricitayo pudi gutiyo ki Yatariya, dok yatariya onongo tye wa i tekwaro pa jo ma pe gubedo Lukricitayo bene.” Lucoc mukene mapol bene gikubo yatariya ki woro ginacweya ki dok kit kwer mogo ma kubbe ki tim tarwang pa lukamfiri.

Dong pingo lanyut pa lukamfiri man kitiyo kwede? Romo bedo ni onongo kimito ni wek obed yot bot lukamfiri me ye dini pa jo ma onongo gilwonge ni gin gibedo “Lukricitayo.” Kadi bed kit meno, Baibul kwero miyo woro mo keken i kom lanyut ma oa ki bot lukamfiri. (2 Jo Korint 6:14-18) Ginacoya bene kwero woro  kit cal apaya mo keken. (Nia 20:4, 5; 1 Jo Korint 10:14) Pi tyen lok magi, omiyo Lukricitayo me ada pe gitiyo ki yatariya i worogi. *

[Lok ma tye piny]