SARAGU miñonu gürigia hínsiñeti ani inebeti gurúa houn. Darí lun tarihini Enciclopedia Hispánica kei “sínbolu lani relihión kristiánu”. Lunti san hayusuruni kristiánugu gurúa?

Furumiñe, mosu gabaroun wamá aban katei méiniti: Mama luagu gurúa lounwe Hesukrístu. Dimurei güriegu staurós ligía ásügürawagüdübei kei “gurúa” ani mini lan dimurei le “wagabu o wewe suruti”. Le mini lubéi dimurei le lidan güriegu “mama biama murusun fulansu le abayaradagubei luagu le aban [...]. Lidan güriegu le lánina [Iseri Daradu] úati ni kata le adügüti lun gunfurandawa lan kei biama murusun fulansu” (The Companion Bible).

Anihein burí bérusu le ñein lubéi hayusura abürühatiña Bíbülia amu dimurei lun hadimurehan luagu fulansu le uágubei ládarawagua Hesusu. Xýlon dimurei ligía lidan güriegu, mini lan “fulansu” luma “wewe o wagabu” (Adügaü 5:30; 10:39; 13:29; Galasiana 3:13; 1 Féduru 2:24, RVA).

Aban aturiahati gíriti Hermann Fulda afuranguagüdati ka lan meha uagu layusurua aban wagabu sensiyuti lun háfarawagun gürigia:  “Mama meha sun dan anihein lan tídibu wewe lidan fulasu le anúadirubei lun háfarawagun gürigia. Ligíaha lábununbei aban wagabu sensiyuti múarugu, ani luagu hagürawagua o hádarawagua wuribatiña lau háhabu iñun ani libe-agei dan íbini giñe hagudi”. (Das Kreuz und die Kreuzigung [Gurúa luma ádarawaguni luagu gurúa]).

Gama lumoun, resun le súdinitimabei tídangiñe Lererun Bungiu liabin. Ariñagati apostolu Pábulu: “Sefu lumutiwa Kristu luéi líñaragun lúrudu aba lanügüni íñarawaguni luouguoun weweñegua, lugundun bürüwati: ‘íñarawaguati sun le adibiruti luagu aban wagabu’” (Galasiana 3:13, RVA) o kei tariñaguni Nueva Biblia Española “luagu aban wewe”. Dimurei le sagá lumuti Pábulu lídangiñe 2 Lúrudu 21:22, 23, ñein furanguti tuagu lan aban tídibu wewe ladimureha, mama luagu aban gurúa. Adügati wagabu lun aba lan “íñarawaguati” gürigia le ádarawagubei luagu. Ligía mabuidun lubéi lawendedagüdünu kristiánu luban tau burí liyawa Kristu dáwaguañu luagu aban gurúa.

Según sun le ariha wamaalibei, ka asuseredubei lárigiñe lounwen Kristu? Lidan ǘrüwa san irumu le asigirubei, gürigia ha ariñagubaña kristiánugu hamá mayusuruntiña meha gurúa lidan háhuduragun. Gama lumoun, lidan sígulu gádürü, aba lóundarun urúei Rómana le gíribei Konstantinu tuma relihión hani ha ariñagubaña kristiánugu hamá ani marufudahantiña kei kristiánu. Lúmagiñe dan ligía aba lagumeseruni layusurún gurúa kei sínbolu lidan lani relihión. Ka lan yebe lébunabei ladügüni Konstantinu katei le, úati ni kata arufuduti luagu lan gurúa lounwe Hesusu. Lídangiñe relihión mama inarüniti liabin gurúa. Ariñagatu New Catholic Encyclopedia: “Yusuwati meha gurúa lubaragiñe ñein hamá kristiánugu luma hadan ha mámabaña kristiánu”. Amu burí sásaamu ariñagatiña yusuwa lan gurúa lidan áhuduraguni lun Weyu luma lidan damusianu le ñein lubéi ladügüwa magíaguni.

Kati uagu layusurunbei sínbolu le? Genegeti ladüga lan menrenguntimabei lan meha houn ha mámabaña kristiánu lun hánharun lun “kristiánu hamá”. Gama lumoun, asíadira tumuti Bíbülia áhudurawaguni lun furumiñeguarügü sínbolu (2 Korintuna 6: 14-18). Eweridihatu giñe luéi sun luwuyeri áhuduraguni houn guáriua (Áfuriduni 20:4, 5; 1 Korintuna 10:14). Ligíati, garichati kristiánu le  inarüniti lun lamahadun layusurun gurúa lidan láhuduragun lun Bungiu. *