OTJIKROISE otjiṋa tji tja suverwa nu tji tji pewa ondengero tjinene i ovandu ovengi. Embo ndi The Encyclopædia Britannica ri tja otjikoroise “ootjisanekero otjinenenene tjongamburiro yOukriste.” Nakombanda yanao, Ovakriste vatjiri kave ungurisa otjikroise momerikotameno. Omena ratjike tji ve ha ungurisa otjikroise?

Epu enanḓengu orondi rokutja Jesus Kristus ka ṱire kotjikroise. Embo rOtjigrike nda torokwa otja “otjikroise,” embo ndi stau·rosʹ. Embo ndi ri heya “otjihenḓe (opale).” Ombeibela ndji The Companion Bible mai tja: “[Stau·rosʹ] kari hee omiti vivari mbya tuwa kumwe okurityakaṋa . . . Kape notjiṋa mOtjigrike [tjEtestamente Epe] tji tji raisa kutja ri heya omiti vivari.”

Povikando tjiva pa ungurisiwa embo rarwe okuraisa kutja Jesus  wa paperwa ku tjike. Oro embo rOtjigrike xyʹlon. (Ovagalate 3:13) Embo ndi mari hee “omuti” poo “otjihenḓe poo otjiti.”

Okukahurura kutja omena ratjike omuti wakauriri tjaau ungurisiwa okuzepera ko ovandu, embo ndi Das Kreuz und die Kreuzigung (Otjikroise nomapaperero kotjikroise), nda tjangwa i Hermann Fulda, mari tja: “Omiti kaavi munika potuveze atuhe paape rondororerwa ovandu. Okutja otjihenḓe otjaatji tuwa mehi. Komuti mbwi omukatuke woveta aa paperwa nomake ayeevari aya yererwa kombanda nu potuingi wina ozombaze zawo aaze kutwa poo aaze paperwa.”

Nungwari otjiraisiro otjisembasemba, tji ri mEmbo raMukuru. Omuapostele Paulus ma tja: “Kristus we tu randa kutja e tu kuture kosengiro ndja etwa i Omatwako, Eye tjinga a karirira eṱe osengiro. Orondu Omatjangwa maye tja: ‘Ngamwa auhe ngwa turikwa komuti nga sengwe!’” (Ovagalate 3:13) Paulus imba wa yarukira po omambo nga tjangwa mu Deuteronomium 21:22, 23, ngu maye hungire oukahu ohunga nomuti, nu katjikroise. Mena rokutja omundu ngwa zepewa momuano mbwo aa varwa otja ‘osengiro,’ okutja kamaa rire otjiṋa otjiwa kOvakriste okuhareka ozondjuwo zawo novisanekero ku kwa ṱira Kristus.

Kape na otjiraisiro kutja ozombura 300 ozondenga kombunda yonḓiro yaKristus, imba mbaave ritja Ovakriste aave ungurisa otjikroise momerikotameno wawo. Posi yokutja kombunda yozombura 300, omuhonapare Constantine ngwa ri omuhaidena, ngwe keritanaura kongamburiro yOukriste yoposyo, ongwa uta okutunduza omaungurisiro wotjikroise otjotjiṋa tji matji sokuungurisiwa mOukriste. Kainatja kutja Constantine wa ri nondando yatjike, otjikroise katjari notjiṋa na Jesus Kristus. Otjikroise tja za kozongamburiro zoposyo. Embo ndi New Catholic Encyclopedia mari tja: “Otjikroise tji munika mozombazu zovahaidena na inḓa zarukuru zokomurungu womeero waKristus.” Omambo yarwe tjiva ye tja otjikroise tji notjiṋa nokurikotamena koviutwa notuzo twovahaidena tu tu notjiṋa noruvakiro.

Nambano ongwaye otjiungurisiwa tjovanavisenginina hi tji tja ryamisiwa komurungu? Ondando ya ri oyokutjita kutja ovanavisenginina ve yenene okuyakura “Oukriste.” Nakombanda yanao, Ombeibela i tjaera okuungurisa otjiserekarera ngamwa tji tja za kovanavisenginina. (2 Ovakorinte 6:14-18) Omatjangwa wina ye tjaera omiano ngamwa avihe vyokurikotamena kovisenginina.  (Eksodus 20:4, 5; 1 Ovakorinte 10:14) Okutja Ovakriste vatjiri ve nepu esemba tjinene ndu ve ha ungurisire otjikroise momerikotameno wawo. *