SIKURUSE kwa si hara nokusifumadeka mamiliyona govantu. The Encyclopædia Britannica kutumbura sikuruse asi “silikidiso somulyo po moukereli woUkriste.” Nampili ngoso, Vakriste wousili kapi ava ruganesa sikuruse moukereli. Morwasinke?

Konda zomulyo zezi asi Jesus Kristusa kapi ga fililire kosikuruse. Nkango zoRugereka ezi za toroka “sikuruse” yizo sitaurosi.  Azo kutanta asi “sitji sokuvyukilira ndi sipirangi.” The Companion Bible kulikida asi: “[Sitaurosi] narumwe si azi tanta asi yitetwa yivali yoyipirangi yalivindakana . . . Kwato eyi va tjanga moRugereka [zEtestamende lyEpe] ayi tanta asi yitetwa yivali yoyipirangi.”

Va ruganesere hena nkango zapeke kosininke sonomfa daJesus. Azo nkango zoRugereka zailoni. (Vagarata 3:13) Nkango ezi kutanta nawa-nawa asi “sipirangi” ndi “muramu ndi mburo ndi sitji.”

Mokufaturura eyi ngava ruganesere sitetwa tupu pedipago, buke Das Kreuz und die Kreuzigung (Sikuruse ntani epamparo), ezi ga tjanga Hermann Fulda, kutanta asi: “Kapi pwa kere nkenye apa yitji komavango oku va horowere gokudipagera moyitarameho. Yipo nye ngava simine nonkambo mevhu. Oko yiko nye ngava mangerere ndi kupampara mawoko ntani pamwe nomaguru govakorokotji.”

Nampili ngoso, umbangi wene-wene kutunda moNonkango daKarunga. Mupositoli Paurusa kutanta asi: “Kristusa ga tu zowora mo mefingiliro eli azi reta Veta, pokutuzira mo mefingiliro mwene. Yeeyi kwa tjanga asi, ‘Nkenye ogu ava zenzereke kositji, kwa mu fingilira.’” (Vagarata 3:13) Apa Paurusa kuna kutemwinina Deuteronomium 21:22, 23, ezi azi ruganesa nkango sitji kapisi silivindakano. Moomu asi sitji sangoso kwa ninkisire muntu a kare ‘gefingo,’ ngano kapi ya wapa koVakriste mokuwapaika mambo gawo nomafano gepamparo lyaKristusa.

Nomvhura 300 dokuhova konyima zonomfa daKristusa, pwato elikido asi owo ngava tanta asi awo Vakriste ngava ruganesa sikuruse moukereli. Mouye woune, mupangeli Constantine gomupagani ga ya tambwire Ukriste woyimpempa ntani nokuyatulisa po sikuruse ngwendi sinongweneso sawo. Zi kare asi konda zaConstantine musinke za kere, sikuruse kapi sa hamenene Jesus Kristusa. Mousili, sikuruse kwa tundilira koupagani. Buke zoNew Catholic Encyclopedia kulikida asi: “Sikuruse aso kusigwana moukereli wovapagani nou wovantu vanare komeho zewizo lyaKristusa.” Nobuke dimwe hena dokulifana kwa kwatakanesa sikuruse kumwe noukereli wousintwe ntani noukereli wovapagani wokuhamena mo ruhonda.

 Morwasinke sinongweneso esi sosipagani va si pulisilire? Asi mokurerupikira vapagani mokutambura eyi ava tumbura asi Ukriste. Nampili ngoso, kukerera nkenye sinongweneso soupagani Bibeli kwa si silika. (2 Vakolinte 6:14-18) Matjangwa hena ga silika eruganeso lyankenye efano moukereli. (Exodus 20:4, 5; 1 Vakolinte 10:14) Yipo nye, nokonda zongwa Vakriste wousili kapi ava ruganesa sikuruse moukereli. *