KRAWS hi mi tam takte ngainat leh zah êm êm a ni a. The Encyclopædia Britannica chuan kraws chu “Kristian sakhaw chhinchhiahna ber,” tiin a ko hial a ni. Amaherawhchu, Kristian dikte chuan Pathian biaknaah kraws an hmang lo. Engvângin nge an hman loh?

A chhan pawimawh tak chu, Isua Krista hi kraws-a a thih loh vâng a ni. Grik thu mal “kraws” tia an lehlin tlângpui hi stau·rosʹ a ni a. Chu chu a nihna takah chuan “ban ngîl,” sawina mai a ni. The Companion Bible chuan heti hian a sawi: “[Stau·rosʹ] chu thing pahnih engti kawng pawha dah kawkalh sawina a ni ngai lo . . . [Thuthlung Thar] Grik ṭawnga ziakah chuan thing pahnih sawina pawh a awm lo hrim hrim,” tiin.

Bible ziaktute chuan an thuziak hmun tam takah chuan Isua  thihna hmanrua sawi nân thu mal dang an hmang a. Chu chu Grik thu mal xyʹlon hi a ni. (Tirhkohte 5:30; 10:39; 13:29; Galatia 3:13; 1 Petera 2:24) He thu mal hi “ban ngîl,” emaw, “tiang, talhtum, a nih loh leh thing kûng” emaw tihna mai a ni.

Mi tihhlum nâna ban ngîl pângngai an hman chhan chungchângah, Das Kreuz und die Kreuzigung (Kraws leh Inkhenbehna), tih lehkhabu Hermann Fulda-a ziak chuan heti hian a sawi: “Mite vântlâng hmuha an tihhlumna hmunah chuan hman mai tûr thing kûng a awm ṭhîn lo va. Chuvâng chuan, thing tlâwn ngîl pângngai chu leiah an phun ṭhîn a ni. Chu thing tlâwnah chuan dân bawhchhetute chu an lu chunga an bân phartîrin, phuar beh emaw, pereka khen beh emaw an ni ta ṭhîn a, chutiang bawk chuan an ke pawh tih a ni ṭhîn,” tiin.

Amaherawhchu, a finfiahna azawnga rin tlâk ber mai chu Pathian Thu aṭangin kan hmu a ni. Tirhkoh Paula chuan heti hian a sawi: “Krista chu kan aia ânchhe dawng lo niin, Dân ânchhe lak ata min tlan chhuak ta; (‘Thinga khaikân apiang chu ânchhe dawng an ni,’ tih ziak a ni si a),” tiin. (Galatia 3:13) Hetah hian Paula chuan kraws sawina ni lo, thing sawina Deuteronomy 21:22, 23-na thu chu a la chhuak a ni. Chutiang hmanga intihhlumna chuan mi chu “ânchhe dawng” a nihtîr avângin, Kristiante tân chuan Krista khenbeh lai lema an in cheimawi chu a inâwm lo vang.

Krista thih hnu aṭanga kum 300 thleng chuan, Kristian nia inchhâlte chuan Pathian biak nâna kraws an hman thu finfiahna a awm lo. Amaherawhchu, kum zabi linaah erawh chuan, milem betu Emperor Constantine-a chu kal pêng Kristianna dik lovah inletin, ani chuan Kristianna chhinchhiah nân kraws a rawn theh lâr chho ta a ni. Constantine-a thiltum chu eng pawh ni se, kraws chuan Isua Krista nên inkûngkaihna rêng a nei lo. Dik takin, kraws chu milem betute hnên aṭanga lo chhuak a ni. New Catholic Encyclopedia chuan heti hian a sawi: “Kraws chu Kristian hun hma leh Kristian ni lote hnam dânah a hmuh theih ve ve a ni,” tiin. Lehkhabu hrang hrangte chuan kraws chu thil siamte pathian anga biakna leh milem betute’n mipat hmeichhiatna hmanga pathian an biakna nên a thlunzawm tlat a ni.

Chuti a nih chuan, engvângin nge he milem betute chhinchhiahna hi theh lâr chhoh a nih? Milem biate’n “Kristianna” an pawm awlsam zâwk nâna tih a nih hmêl hle. Nimahsela, milem betute chhinchhiahna thil rêng rêng Pathian biak nâna lo hman chu Bible chuan a dem chiang hle a ni. (2 Korinth 6:14-18) Tin, milem biakna  chi rêng rêng pawh a khap tlat bawk. (Exodus 20:4, 5; 1 Korinth 10:14) Chuvângin, chhan ṭha tak avângin Kristian dikte chuan Pathian an biaknaah kraws an hmang lo a ni. *