MANGA di jintis gosta di krus i e rispital. The Encyclopædia Britannica fala di krus suma “simbulu prinsipal di riliẑion kriston.” Ma, sera ki i bon pa kristons usa krus na adorason?

I nteresanti nota ki Jesus Kristu ka muri na un krus. Palabra gregu ku manga di bias ta traduzidu pa “krus” i stau·rós. I signifika so “un po retu o staka.” The Companion Bible fala: “[Stau·rós] nunka signifika dus padas di madera ku kruzadu na n̈utru na kualker angulu . . . I ka ten nada na gregu di [Nobu Testamentu] ku ta da ideia di dus padas di madera.”

 Na manga di testus, skirbiduris di Biblia usa utru palabra pa fala di kusa ku Jesus muri nel. I palabra gregu xýlon. (Atus 5:30; 10:39; 13:29; Gálatas 3:13; 1 Pedru 2:24) Es signifika so “madera” o “un po, manduku, o arvuri.”

Pa da splikason di ke ku manda manga di bias un simplis staka ta usadu pa mata un algin, livru Das Kreuz und die Kreuzigung (Krus ku krusifikason), di Hermann Fulda fala: “I ka ten nin arvuris na lugaris kujidu pa mata jintis. Asin, un simplis po ta lofidu na con. Nes po, kriminosus, ta pudu mon riba, manga di bias se pe ta maradu o pregadu.”

Ma, prova ma garandi di tudu, sta na Palabra di Deus. Apostulu Paulu fala: “Kristu libertanu di un maldison di lei pa manera ki tornadu maldisuadu pabia di nos, pabia i sta skritu: ‘Maldisuadu i tudu omi ku pindradu na un staka [“madeira,” Nobo Testamento na Criol] .’” (Gálatas 3:13, NM) Li, Paulu mensiona palabras ku sta na Ripitison di Lei 21:22, 23, ku fala di staka di un manera klaru, nau di un krus. Suma es matirial ku ta usadu pa mata jintis ta torna algin “un maldison,” i ka bon pa kristons faja se kasa ku imaẑen di Kristu na krus.

I ka ten prova di kuma na purmeru 300 anus dipus ki Jesus muri, kilis ku ta afirma sedu kristons ta usa krus na adorason. Ma, na kuartu sekulu, imperador pagon, Konstantinu, konverti pa Kristianismu apostata, i promovi krus suma simbulu di Kristianismu. Kualker motivu ku Konstantinu teneba, krus ka tene nin un ligason ku Jesus Kristu. Na bardadi, krus bin di pagons. New Catholic Encyclopedia fala: “Krus ta ojadu tantu na kulturas antis di kristons suma tambi na kulturas ku ka sedu kristons.” Manga di utrus otridadis relasiona krus ku adorason di natureza i ku kustumus pagon ligadu ku seksu.

Ma, ke ku manda es simbulu pagon promovidu? I pudi sedu ki, i pa fasilita pagons seta “Kristianismu.” Ma, Biblia kondena di un manera klaru usu di kualker simbulu  pagon na adorason. (2 Koríntius 6:14-18) Biblia proibi tambi tudu tipu di idolatria. (Saida 20:4, 5; 1 Koríntius 10:14) Pa kila, kristons di bardadi tene bon motivu di ka usa krus na adorason. *