OLO maro ro tea noho manaja lakroa. Mivola ty Bokim-pahaia Britannica (anglisy) fa ty lakroa ro “mariky mampiavaky ty fivavaha kristiana.” Fe tsy mampiasa lakroa ty Kristiana marina lafa mivavaky. Ino ty antony?

Tsy nimaty tamy lakroa Jesosy, zay ty antony raiky bevata. Ty safà grika hoe staorôs matetiky ro adika hoe “lakroa.” Midika hoe “hazo mahity na tsato-kazo” safà io. Ho zao ty fanazavà hita amy Baiboly raiky: “Ty hoe [staorôs] le tsy midika mihintsy hoe vatan-kazo roe, ka ty raiky mahity ty raiky mitivala ... Tsy misy fivolana vatan-kazo roe mihintsy ty safà grika amy [Testamenta Vaovao] ao.”—The Companion Bible.

 Mampiasa safà hafa ty mpanoratsy Baiboly, mba hivolana ty fitaova namonoa Jesosy. Ty safà grika hoe ksylôn ro ampiasàny. (Asan’ny Apostoly 5:30; 10:39; 13:29; Galatianina 3:13; 1 Petera 2:24) “Vatan-kazo” na “tsora-kazo, kobay, na hazo” ty dika safà io.

Hazavà amy boky Ty Lakroa noho ty Famantsiha Tamy Lakroa Teo (alemà), nisoraty Hermann Fulda, ty antony nampiasà tsato-kazo tsotra lafa nisy olo nivonoa. Hoy ty asany: “Tsy nisy hazo mitiry matetiky ty pilasy finily hamonoa olo an-kavoria. Vatan-kazo tsotra ro natsatoky tamy tany, le nahanto teo ty mpandika lalàna. Nampiakary anabo ty tanany, le finehy na finantsiky; le natao manahaky zay koa ty tombony kindraiky.”

Fe amy Baiboly ao ro misy porofo maharesy lahatsy, fa tsy maty tamy lakroa Jesosy. Hoy ty apostoly Paoly: “Nivily noho nanafaky antsika tamy ty ozo ty lalàna Kristy, lafa nanjary voaozo hisolo antsika, satria voasoratsy hoe: ‘Voaozo ze mihanto amy tsato-kazo eo [“hazo”, Fandikan-teny Protestanta].’ ” (Galatianina 3:13) Nangalaky safà baka amy Deoteronomia 21:22, 23 ao Paoly teo, sady hazo ro volany amy andinin-teny io ao, fa tsy lakroa. Volaniny eo hoe “voaozo” ze olo nahanto tamy hazo, midika zay fa tsy tokony hatao ty Kristiana pozin-trano ty sary Kristy mifantsiky amy hazo fijalea.

Tsy misy porofo mivola fa nampiasa lakroa, azy nivola ty vatany ho Kristiana reo, tanaty ty 300 tao tafara ty nahafatesa Kristy. Fe nanjary Kristiana mpivali-pinoa, Constantin mpanjaka romanina, tamy tao 300 reo. Ty lakroa ro nampirisihiny hatao mariky famantara an-drozy. Ndre ino ndre ino ty antony nanaovany raha zay, le tsy misy ifandrambesany amy Jesosy Kristy mihintsy ty lakroa. Ty mpanompo sampy laha ty marina ro niavia lakroa io. Maneky ty Bokim-pahaia Katolika Vaovao (anglisy) hoe: “Nampiasa lakroa iaby ndre ty olo taloha ty andro Kristiana, ndre ty firenena tsy kristiana.” Boky maro ro mivola fa nampiasa lakroa ty mpivavaky tamy natiora. Volany amy raha rey koa fa nampiasa lakroa ty mpanompo sampy, lafa nanao fombafomba niharo firaisa ara-nofo.

 Ka manino ty olo ro mbo ampirisihy hampiasa mariky mampiavaky ty mpanompo sampy io? Vasa zay ro eritserety hoe hahavy ty mpanompo sampy haneky ty fivavaha volany fa kristiana. Fe rarà ty Baiboly ty fivavaha amy ty kila raha iaby mety ho mariky mampiavaky ty mpanompo sampy. (2 Korintianina 6:14-18) Mbo rarany avao koa lafa atao fanompoa sampy. (Eksodosy 20:4, 5; 1 Korintianina 10:14) Zay ty antony mahavy ty Kristiana marina tsy mampiasa lakroa, lafa mivavaky. *