MARO olo tia ndreky man̈aja lakroa. Koran̈iny boky araiky fa lakroa io “lamariky araiky ten̈a mampiavaka fivavahan̈a kristianin̈y.” (Rakipahaizan̈a Britannica, angiley) Olo ten̈a Kristianin̈y zen̈y tsy mampiasa izio koa fa mivavaka. Ino antony?

Antony voanalohany, Jesosy tsy naty tamy lakroa. Volan̈a “lakroa” io baka amy volan̈a griky stau·rosʹ. Izikoa adika “kakazo mahitsy na kakazo araiky mitsatoko.” Karaha ty fan̈azavany boky araiky momba zen̈y: “Tsy kakazo aroe misampan̈a [stau·rosʹ] zen̈y... Amy [Testamenta Vaovao] amy volan̈a griky, tsisy mivolan̈a kakazo aroe misampan̈a zen̈y foeky.”—The Companion Bible.

 Misy volan̈a griky araiky xy’ lon fampiasaindro panoratra Baiboly, izikoa fa mikoran̈a raha namonoan̈a Jesosy. (Asan’ny Apostoly 5:30; 10:39; 13:29; Galatianina 3:13; 1 Petera 2:24) Tsotra fo dikanizio: “Vatany kakazo” na “firitsiko” na “kibay na kakazo.”

Hazavainy boky Lakroa Ndreky Famantsihan̈a Tamy Lakroa (aliman), nisoratiny Hermann Fulda antony nampiasan̈a vatany kakazo io, izikoa fa misy olo nivonen̈y. Karaha ty nivolan̈iny: “Ndraikindraiky tsisy kakazo naniry tamy tany famonoan̈a olo hitanolo jiaby. Baka amy zen̈y nahavy vatany kakazo tsotra natsatoko tamy tany. Tamizio olo araiky tsy man̈araka lalàn̈a nahanton̈o, ke tan̈any ndreky vitiny nifihezin̈y na nipipen̈y kolo.”

Izikoa Baiboly zahan̈a, Jesosy ma naty tamy lakroa? Apostoly Paoly nivolan̈a karaha ty: “Kristy nividy ndreky nankafaka atsika taminy ozon̈o lalàn̈a hisolo atsika, fotony karaha ty efa voasoratra: ‘Voaozon̈o zay olo mihanton̈o amy kakazo araiky mitsatoko.’” (Galatianina 3:13) Paoly nanoratra izio nangala volan̈a baka tamy Deoteronomia 21:22, 23, ke tsy lakroa tiany koran̈iny aminany io fa kakazo araiky mitsatoko. Nivolan̈a izy io fa “voaozon̈o” zay olo nahanton̈o tamy kakazo. Dikanizen̈y, tsy raha tsara namonoandro Jesosy io. Zen̈y mahavy Kristianin̈y tsy mampiasa lakroa atao sanjiny tran̈o.

Tan̈atiny 300 taon̈o tafarany nifatesany Jesosy, tsiary nisy fivolan̈ana fa Kristianin̈y taloha tan̈y nampiasa lakroa. Fa tafaranizen̈y, Constantin Panjaka romanin̈y nandrisy olo hampiasa lakroa io hahaizan̈a Kristianin̈y, fotony izy nanjary Kristianin̈y pivadipinoan̈a. Kanefa lakroa io tsisy ifandraisany tamy Jesosy Kristy, fotony izio baka amy panompo sampy. Boky Rakipahaizan̈a Katoliky Vaovao (angiley) mivolan̈a: “Talohany andra Kristianin̈y, efa nahazatra olo nampiasa lakroa, ndray firenena tsy kristianin̈y mba nan̈ano zen̈y koa.” Boky maro mivolan̈a fa olo pivavaka tamy natiora fo nampiasa izio. Hita baka amy zen̈y fa panompo sampy fo nampiasa izio, koa fa nan̈ano fombafomba mifandray amy firaisan̈a.

 Lakroa io karaha lamarikinolo panompo sampy, ke nan̈ino fo olo hirahin̈y hampiasa izio? Nataondro raha zen̈y, baka panompo sampy aby io ho mora voantsory han̈araka fivavahan̈a miaboko kristianin̈y. Baiboly tsy man̈omba olo han̈ano lamarikinolo panompo sampy. (2 Korintianina 6:14-18) Halany Zan̈ahary aby raha momba fanompoan̈a sampy. (Eksodosy 20:4, 5; 1 Korintianina 10:14) Zen̈y nahavy ten̈a Kristianin̈y taloha tan̈y tsy nampiasa izio koa fa miva­vaka. *