STALE binni nadxii cruz ne runi respetar ni. Ne ti libru láʼ Enciclopedia Hispánica na zeeda gaca ni casi ti «seña stiʼ religión ni zinanda Cristu». Yanna yaʼ, ñee napa ca xpinni Cristu xidé iquiiñecaʼ ni la?

Nuu ti cosa ni naquiiñeʼ gánnanu primé: qué ñati diʼ Jesucristu lu ti cruz. Diidxaʼ griegu ni rutiixhicabe «cruz» nga staurós ne diidxaʼ riʼ riníʼ ni ti «yaga derechu». Diidxaʼ riʼ «qué lica riníʼ ni de ti yaga ni didilaaga stobi lu [...]. Lu diidxaʼ griegu ra gucuá [Nuevo Testamento] qué lica ruzeeteʼ de chupa yaga» (The Companion Bible).

Nuu ra biquiiñeʼ cani bicaa Biblia sti diidxaʼ para guniʼcaʼ xi lu gutiʼ Jesús. Diidxaʼ xýlon nga biquiiñecabe lu diidxaʼ griegu para guiníʼcabe «yaga» ne zacá nga cá ni lu xcaadxi Biblia diidxastiá (Hechos 5:30; 10:39; 13:29; TNM, Reina Valera ne  Biblia Latinoamericana; Gálatas 3:13, Biblia Latinoamericana; 1 Pedro 2:24, Reina Valera).

Ti hombre ni biindaʼ stale ni láʼ Hermann Fulda bisiene xiñee ti yaga si nga biquiiñecabe para ganda binni ti gatiʼ: «Ra ribícabe para guuticabe binni cadi guiráʼ biaje nuu yaga. Ngue runi, ti yaga si nga ruzuhuaacabe ne luni nga rundiibicabe o rindísacabe náʼ ca binni malu que luguiáʼ ne rucaacabe clavu nacaʼ ne stale biaje laaca rundiibicabe ñeecaʼ o rucaacabe clavu ni» (Das Kreuz und die Kreuzigung [Cruz ne modo rucaacabe binni luni]).

Stiidxaʼ Dios jma zacané laanu gánnanu de laani. Apóstol Pablu na qué iquiiñeʼ guiráʼ ni guicá lu yaga, o lu ti «palu» casi na Nueva Biblia Española (Gálatas 3:13). Lu versículo riʼ caníʼ Pablu ni na Deuteronomio 21:22, 23, ne racá rihuinni dxíchica caniʼbe de ti yaga, ne cadi de ti cruz. Ne yaga ca runi ni laacabe binni qué iquiiñeʼ. Nga runi, cadi jneza nga gucaa ca xpinni Cristu xiixa cuadru o foto ndaaniʼ lídxicaʼ ra rihuinni guti Jesús lu ti cruz.

Pur ca razón ni maʼ bidúʼyanu ca, xi bizaaca guti si Cristu yaʼ. Gudiʼdiʼ si chonna gayuaa iza, ca binni ni nacaʼ xpinni Cristu laacaʼ qué niquiiñecaʼ cruz ra runi adorarcaʼ. Peru lu siglu 4 que, Constantino, xaíque stiʼ Roma, guyuube lade cani na xpinni Cristu laacaʼ peru maʼ bidxiidéchecaʼ Dios. De raqué nga bicaabe binni guʼyaʼ cruz ca casi ti seña stiʼ religión stibe. Peru intiica razón gupa Constantino para biquiiñeʼ ni la? cruz ca gastiʼ gapa ni né Jesús. Laani zeeda ni de binni ni cadi naca xpinni Cristu. Ne ti libru stiʼ ca católicu na: «Dede ante gueeda Cristu, ca binni que maca riquiiñecaʼ cruz ne ca binni ni cadi naca xpinni Cristu laaca biquiiñecaʼ ni» (New Catholic Encyclopedia). Xcaadxi hombre ni nanna stale nacaʼ laaca biquiiñecabe ni ora runi adorárcabe Gubidxa, ne ora ratanécabe stobi para guni adorárcabe dios stícabe.

Yanna, xiñee nabé biquiiñecabe ni yaʼ. Purtiʼ nácabe zaqué si nga jma nagueenda zaca binni xpinni Cristu. Biblia na cadi jneza gannaxhiinu cani riquiiñeʼ ca binni ni cadi xpinni Cristu ora runi adorarcaʼ (2 Corintios 6:14-18). Ne laaca  cadi jneza guni adorar binni bidóʼ o intiica cosa (Éxodo 20:4, 5; 1 Corintios 10:14). Nga runi, cani dxandíʼ xpinni Cristu qué lica rinacaʼ iquiiñecaʼ cruz para guni adorarcaʼ Dios. *