OL KRISTIN oli mas mekem Memoriol blong tingbaot ded blong Kraes. Baebol i kolem taem ya se “Kakae blong Masta.” (1 Korin 11:20) ?From wanem lafet ya i impoten? ?Wetaem mo olsem wanem blong mekem lafet ya?

Jisas Kraes i stanemap lafet ya long sem naet we oli mekem Pasova blong ol man Jiu long yia 33 K.T. Pasova i wan lafet we oli mekem wan taem long wan yia, long namba 14 dei blong manis Naesan long kalenda blong ol man Jiu. Blong faenem stret dei ya, ol man Jiu oli wet long taem we ol tri oli putum flaoa. I gat wan dei long taem ya we i seraot stret long tu haf, i min se long dei ya i gat delaet blong 12 aoa stret mo tudak blong 12 aoa stret. Fas niu mun we i kamaot klosap long dei ya, i makem stat blong manis Naesan. Ale stat long dei blong niu mun ya oli kaontem 14 dei, nao oli mekem lafet blong Pasova afta we san i godaon long namba 14 dei ya.

Jisas i mekem lafet blong Pasova wetem ol aposol blong hem, nao hem i sanemaot Judas Iskariot. Biaen, hem i stanemap Kakae blong Masta wetem ol narafala aposol we oli stap. Kakae ya i tekem ples blong Pasova blong ol man Jiu, taswe i stret blong mekem lafet ya wan taem nomo long wan yia.

Gospel blong Matiu i stori se: “Jisas i tekem bred, i prea blong talem  tangkiu long God from. Nao i brekem, i givim long ol man blong hem, i talem se ‘Yufala i tekem, yufala i kakae. Hemia i bodi blong mi.’ Mo i tekem kap, i talem tangkiu long God from, nao i pasem i go long olgeta, i talem se ‘Yufala evriwan, yufala i dring long hem. From we hemia i blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.’ ”​—Matiu 26:​26-28.

Sam man oli ting se Jisas i tanem bred i kam trufala mit blong hem mo waen i kam trufala blad blong hem. Be, evri haf blong bodi blong Jisas i stap taem hem i givim bred ya. ?Ol aposol blong Jisas oli rili kakae prapa bodi mo dring prapa blad blong hem? Nogat. Fasin ya blong kakae mit blong man mo blad blong hem, hem i agensem loa blong God. (Jenesis 9:​3, 4; Levitikas 17:10) Long Luk 22:​20, Jisas i talem se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.” ?Yu ting se kap ya i kam “niufala promes” ya? Nogat, from we wan promes i olsem wan kontrak we tu grup oli agri long hem, be i no wan prapa samting olsem wan kap.

Taswe, bred mo waen, tufala i saen nomo. Bred i pija blong bodi blong Jisas Kraes we i stretgud olgeta. Bred ya we Jisas i yusum, hem i wan bred we i bin stap afta we oli mekem kakae long Pasova. Hemia wan bred we oli no putum is long hem. (Eksodas 12:8) Long Baebol, plante taem is hem i olsem wan saen blong minim sin no fasin nogud. Taswe bred ya i minim bodi blong Jisas we i stretgud olgeta, mo we hem i givim olsem sakrefaes. Bodi ya i no gat sin long hem.​—Matiu 16:​11, 12; 1 Korin 5:​6, 7; 1 Pita 2:22; 1 Jon 2:​1, 2.

Red waen i minim blad blong Jisas. Blad ya i statem niufala promes no kontrak. Jisas i talem se blad blong hem i ron blong “tekemaot sin blong man.” Taswe, ol sinman oli save kam klin long fes blong God mo oli save stap insaed long wan niufala kontrak wetem Jeova. (Hibrus 9:14; 10:​16, 17) Promes ya, we i olsem wan kontrak, i givim janis long 144,000 trufala Kristin blong go long heven. Long ples ya bambae oli mekem wok blong ol king mo pris mo bambae oli karem plante blesing i kam long ol man.​—Jenesis 22:18; Jeremaea 31:​31-33; 1 Pita 2:9; Revelesen 5:​9, 10; 14:​1-3.

?Hu i mas kakae bred mo dring waen long Memoriol ya? I stret blong talem se hemia olgeta we oli insaed long niufala kontrak ya no promes. Olgeta ya we bambae oli go stap long heven, olgeta ya nomo oli save kakae bred mo dring waen ya. Tabu spirit blong God  i mekem tingting blong ol man ya i sua se God i jusum olgeta blong oli go rul olsem ol king long heven. (Rom 8:16) Olgeta ya oli joen tu wetem Jisas long kontrak blong Kingdom.​—Luk 22:29.

?Olsem wanem long olgeta we oli gat hop blong laef olwe long Paradaes long wol? Oli obei long oda blong Jisas mo oli joen long Kakae blong Masta nating se oli no kakae bred mo dring waen, be oli soem respek long taem ya. Wan taem evri yia, afta we san i godaon long Naesan 14, ol Witnes blong Jeova oli mekem Kakae blong Masta. Nating se smol man nomo raon long wol oli gat hop ya blong go long heven, miting ya i spesel long evri Kristin. Hem i wan taem blong tingbaot bigfala lav blong Jeova God mo Jisas Kraes.​—Jon 3:16.