BANN Kretyen in ganny demande pour komemor Memoryal lanmor Kris. Sa komemorasyon i osi ganny apele “repa Senyer.” (1 Korentyen 11:20) Akoz sa komemorasyon i sitan enportan? Kan e ki mannyer nou devret obzerv li?

Zezi Kri ti entrodwir sa komemorasyon zour Lapak lannen 33 N.L. Lapak ti ganny selebre par bann Zwif zis enn fwa par an. Zot ti fer li katorzyenm zour mwan Zwif ki apel Nizan. Pour kalkil sa dat, bann Zwif ti esper lekinok prentan. Sa zour i annan preski 12 er-d-tan lizour ek 12 er-d-tan aswar. Premye nouvel lin pli pre avek lekinok prentan ti mark konmansman mwan Nizan. Lapak ti vin 14 zour plitar, apre soley kouse.

Zezi ti selebre Lapak avek son bann zapot. Apre i ti fer ale Zida Iskaryot, e i ti entrodwir Repa Senyer. Sa repa ti ranplas Lapak ki bann Zwif ti abitye fer e alors i devret ganny obzerve zis enn fwa par an.

Levanzil Matye i dir nou konman sa ti deroule: “Zezi ti pran dipen, ti beni, ti kase, e ti donn son bann disip an dizan, ‘Pran manze, sa i mon lekor.’ Apre i ti pran lakoup, apre ki i ti’n beni, i ti  donn zot, an dizan, ‘Bwar zot tou. Sa i mon disan, disan lalyans ki’n koule pour bokou, pour pardon pese.’”—Matye 26:26-28.

Serten dimoun i krwar Zezi ti vreman fer sa dipen vin son lekor e sa diven vin son disan. Me ler Zezi ti ofer sa dipen, son lekor ti ankor la an antye. Eski bann zapot Zezi ti pe vreman manz lekor Zezi e bwar son disan? Non, parski lalwa Bondye i defann manz dimoun. (Zenez 9:3, 4; Levitik 17:10) Dapre Lik 22:20, Zezi ti dir: “Sa lakoup i nouvo lalyans ki’n ganny sele par mon disan, verse pour zot.” Eski sa lakoup ti vreman sa “nouvo lalyans” li menm? Sa i pa posib, parski en lalyans i en lagreman, pa en keksoz ki ou kapab vwar e touse.

Alors sa dipen ek sa diven ti zis en senbol. Sa dipen ti reprezant lekor parfe Kris. Zezi ti servi en dipen ki ti’n reste dan repa Lapak. Sa dipen ti’n ganny fer san lelven. (Egzod 12:8) Dan Labib, lelven i souvan ganny servi pour reprezant pese oubyen koripsyon. Alors sa dipen i reprezant sa lekor parfe ki Zezi ti sakrifye pour nou. I ti napa okenn pese.—Matye 16:11, 12; 1 Korentyen 5:6, 7; 1 Pyer 2:22; 1 Zan 2:1, 2.

Sa diven rouz i reprezant disan Zezi. Sa disan i fer sa nouvo lalyans posib. Zezi ti dir son disan in ganny verse “pour pardon pese.” Sa i fer bann imen kapab vin prop devan Bondye e zot kapab antre dan sa nouvo lalyans avek Li. (Ebre 9:14; 10:16, 17) Sa lalyans, oubyen kontra, i fer li posib pour sa 144,000 Kretyen fidel al dan lesyel. Laba zot pou servi konman lerwa ek pret, ki pou anmenn benediksyon pour tou imen.—Zenez 22:18; Zeremi 31:31-33; 1 Pyer 2:9; Revelasyon 5:9, 10; 14:1-3.

Lekel ki devret manz dipen e bwar diven pandan Memoryal? I kler ki zis sa bann ki dan nouvo lalyans, setadir bann ki annan lespwar pour al dan lesyel. Lespri sen Bondye i donn sa bann Kretyen en konviksyon ki zot in ganny swazir pour vin lerwa dan lesyel. (Romen 8:16) Zezi ti osi fer en lalyans Rwayonm avek zot.—Lik 22:29.

 Me bann ki annan lespwar pour viv pour touzour dan Paradi lo later? Zot obeir lord Zezi e asiste Repa Senyer avek respe, me zot pa manz sa dipen e bwar sa diven. Tou le 14 Nizan apre soley kouse, Temwen Zeova i komemor Repa Senyer. Menm si pa bokou ki annan sa lespwar pour al dan lesyel, sa komemorasyon i tre enportan pour tou Kretyen. I en lokazyon kot tou Kretyen i kapab reflesir lo sa pli gran lanmour ki Zeova ek Zezi Kri in montre anver nou.—Zan 3:16.