CII DIRA kerecɛnw ma ko u ka Krista ka saya Hakilijigi lajɛn kɛ. O landa be weele fana ko “Matigi ka surafana.” (1 Kɔrɛntikaw 11:20, NW ). Mun na o koo kɔrɔtalen lo? A ka kan ka kɛ tuma juman ani cogo di?

Yezu Krista ye o landa sigi sen kan Yahutuw ka Tɛmɛnkan seli loon suu fɛ, saan 33 an tile la. Tɛmɛnkan seli tun be kɛ siɲɛ kelen dɔrɔn saan kɔnɔ, Yahutuw ka Nisan kalo tile 14nan loon na. Nisan kalo tun be daminɛ marisikalo ka lɔgɔkun fɔlɔ tɛmɛnen kɔ wagati dɔɔni, tuma min na kalo kura tun be se ka ye. O kɔ, Yahutuw tun be jatili kɛ walisa ka Tɛmɛnkan seli kɛ tile 14nan loon na, tile benni kɔ.

Yezu ye Tɛmɛnkan seli kɛ ni a ka cidenw ye, a ye Zuda Isikariyɔti gwɛn, o kɔ, a ye Matigi ka surafana landa sigi sen kan Yahutuw ka Tɛmɛnkan seli nɔɔ na. O kama a ka kan ka kɛ siɲɛ kelen dɔrɔn saan kɔnɔ.

A fɔra Matiyo ka Kibaru Duman kɔnɔ ko: “Yezu . . . ye buru ta ka barika la Ala ye. O kɔ, a y’a karikari k’a di a ka kalandenw ma, k’a fɔ u ye ko: ‘Aw k’a minɛ k’a dumu, nin ye ne fari ye.’ O kɔ, a ye duvɛn ta ka barika la Ala ye, k’a d’u ma k’a fɔ ko: ‘Aw bɛɛ k’a min, bari nin ye ne joli ye, joli min be Ala ka layidu  dafa, joli min bena bɔn mɔgɔ [caaman, NW ] ka hakɛw yafa kosɔn.’ ”—Matiyo 26:26-28.

Mɔgɔ dɔw b’a miiri ko Yezu ye buru yɛlɛma ka kɛ a farikolo yɛrɛ-yɛrɛ ye ani ka duvɛn kɛ a joli ye. Nka, tuma min na a tun b’o buru dira, a farikolo dafanen tun lo. Yala a ka kalandenw tun ye a farisogo yɛrɛ-yɛrɛ lo dumu ani k’a joli min wa? Ayi, n’o tun lo, a tun bena kɛ mɔgɔ sogo ɲimini ye ani Ala ka sariya tiɲɛni ye (Zɛnɛzi 9:3, 4; Levitiki 17:10). Luka 22:20 (ABM ) ka fɔta la, Yezu y’a fɔ ko: “Nin jifilen ye Ala ka layidu kura ye, o layidu tara ne joli la, o bɔnna aw kosɔn.” Yala o jifilen kɛra “layidu kura” yɛrɛ-yɛrɛ ye wa? O tun tɛ se ka kɛ sabu layidu ye labɛn lo ye, fɛɛn tɛ i be se ka maga min na.

O kama, buru wo, duvɛn wo, u bɛɛ ye tagamasiɲɛw dama lo ye. Buru ye Krista farikolo dafanen tagamasiɲɛ ye. Yezu ye Tɛmɛnkan seli buru tɔɔ dɔ lo ta. O buru tun tɛ dilan ni funufɛn ye (Ɛkizɔdi 12:8). Bibulu kɔnɔ, funufɛn ye jurumu wala toliya tagamasiɲɛ ye. O la, buru ye Yezu farikolo dafanen tagamasiɲɛ ye, a ye min saraka. Jurumu si tun t’a la.—Matiyo 16:11, 12; 1 Korɛntikaw 5:6, 7; 1 Piyɛri 2:22; 1 Zan 2:1, 2.

Duvɛn wulenman ye Yezu joli tagamasiɲɛ ye. O joli be layidu kura sɛmɛtiya. Yezu y’a fɔ ko ale joli bɔnna “hakɛw yafa kosɔn.” O la, adamadenw be se ka jati saniyalenw ye Ala ɲɛɛ kɔrɔ ani ka don layidu kura kɔnɔ ni Jehova ye (Eburuw 9:14; 10:16, 17). O layidu ye tɔɔn ye min be kɛ sababu ye kerecɛn kantigiman 144 000 ka se ka taga sankolo la. O yɔrɔ la, u bena kɛ masaw ni sarakalasebagaw ye walisa ka dugaw lase adamadenya bɛɛ ma.—Zɛnɛzi 22:18; Zeremi 31:31-33; 1 Piyɛri 2:9; Yirali 5:9, 10; 14:1-3.

Jɔn lo ka kan k’o tagamasiɲɛw ta ka dumu? Koow sira fɛ, layidu kura mɔgɔw lo, minw jigi ye ka taga sankolo la. Olu dɔrɔn lo ka kan k’o buru dumu ani k’o duvɛn min. Ala ka hakili senu be seereya kɛ o mɔgɔw ye ko u sugandira ka kɛ masaw ye sankolo la (Ɔrɔmukaw 8:16). U fana be masaya layidu la ni Yezu ye.—Luka 22:29.

 Minw jigi ye ka ɲɛnamaya kɛ kudayi dugukolo kan alijɛnɛ kɔnɔ, olu koo be di do? U be Yezu ka cikan bato ani u be taga Matigi ka Surafana na ka filɛri kɛ ni bonya ye, nka u tɛ tagamasiɲɛw dumu. Siɲɛ kelen saan kɔnɔ, Nisan kalo tile 14nan na, Jehova Seerew be Matigi ka Surafana hakilijigi lajɛn kɛ tileben kɔ. Duniɲa kuru bɛɛ kɔnɔ, hali ni mɔgɔ waa damanin dɔrɔn lo b’a fɔ ko u be ni jigiya ye ka taga sankolo la, nin lajɛn ye kooba ye kerecɛnw bɛɛ fɛ. A be sababu di u bɛɛ ma u ka miiri Jehova Ala ni Yezu Krista ka kanuyaba koo la.—Zan 3:16.