IKURI
Na iVakayakavi ni Turaga
ERA vakaroti na lotu vaKarisito mera dau vakananuma na mate i Karisito. Na ivakananumi qo e dau vakatokai tale ga me “iVakayakavi ni Turaga.” (1 Korinica 11:20) Na cava e bibi kina na ivakananumi? E dodonu me vakayacori vakacava? Ena gauna cava?
A tauyavutaka na ivakananumi qo o Jisu Karisito ena 33 G.V. ena bogi vata ga era dau vakananuma kina na Lakosivia na Jiu. Nodra soqo qo na Jiu era dau vakayacora ga vakadua e veiyabaki ena vula o Naisani, ena ika14 ni siga. Era cakacakataka na tikinisiga qo na Jiu ena nodra dau waraka e veiyabaki e dua na siga ena loma ni vulaitubutubu e tautauvata vinaka kina na balavu ni bogi kei na balavu ni siga, me rau ya12 na aua. Na vulavou e volekata duadua na siga qo era dau okata me itekitekivu ni vula na Naisani. Oti tale e 14 na siga era sa qai dau vakayacora na Kanavata ni Lakosivia ni sa dromu na matanisiga.
Oti nodratou vakananuma na Lakosivia o Jisu kei ratou na yapositolo, a vakatalai Jutasa Isikarioti o Jisu, qai tauyavutaka na iVakayakavi ni Turaga. Sa mai sosomitaka na Kanavata ni Lakosivia na iVakayakavi ni Turaga, dodonu gona me vakananumi ga vakadua e veiyabaki.
E tukuni ena Kosipeli i Maciu: “E taura e dua na madrai o Jisu, ni masulaka oti, e tikica, solia vei ratou na tisaipeli qai kaya: ‘Dou taura, dou kania. Qo e vakaibalebaletaka na yagoqu.’ E taura na bilo, e vakavinavinakataka qai solia vei ratou, e kaya: ‘Dou gunu kece kina, qo e vakaibalebaletaka na noqu “dra ni veiyalayalati,” ena vakadavei ena vukudra e levu, me vosoti kina na ivalavala ca.’”
Eso era vakabauta ni a vukica o Jisu na madrai me yagona kei na waini me nona dra. Ia a se tu vinaka sara tu ga na yago i Jisu ena gauna a solia kina na madrai vei ratou na yapositolo. Vakacava eratou a kania dina na lewena qai gunuva nona dra? Sega, baleta ni sa na wiliki qori me veikanikani qai beci tale ga kina na lawa ni Kalou. (Vakatekivu 9:3, 4; Vunau ni Soro 17:10) Me vaka e volai tu ena Luke 22:20, a kaya o Jisu: “Na bilo qo e vakaibalebaletaka na veiyalayalati vou e vakadeitaki ena noqu dra, ena vakadavei ena vukumudou.” Kena ibalebale ya ni sa vuki dina na bilo me “veiyalayalati vou”? E sega ni rawa, baleta na veiyalayalati e dua na ka e sega ni rawa nida raica se tara.
O koya gona, erau ivakatakarakara ga na madrai kei na waini. Na madrai e vakatakarakarataka na yago uasivi i Karisito. A vakayagataka o Jisu na madrai a vo mai na Kanavata ni Lakosivia. A sega ni vakaleveni se vakaisi na madrai. (Lako Yani 12:8) E cavuti vakalevu ena iVolatabu na leveni me vakatakarakarataka na ivalavala ca. O koya gona, na madrai e sega ni vakaleveni e vakatakarakarataka na yago uasivi i Jisu a solia me isoro. A uasivi na yagona baleta ni sega ni takavi koya na ivalavala ca.
Na waini damudamu e vakatakarakarataka na dra i Jisu. Na dra qori e ivakadei ni veiyalayalati vou. E kaya o Jisu ni a vakadavei na nona dra “me vosoti kina na ivalavala ca.” E rawa kina vua na Kalou me wiliki ira eso mera yalododonu, ra qai okati ena veiyalayalati vou. (Iperiu 9:14; 10:16, 17) Ena vuku ni veiyalayalati qo e rawa kina mera lai bula i lomalagi e 144,000 na lotu vaKarisito yalodina. Era na veiqaravi vakatui e kea, era na veiqaravi tale ga vakabete me vakalougatataki kina na kawatamata kece.
O cei e dodonu me vakayagataka na madrai kei na waini ena iVakananumi? O ira ga era okati ena veiyalayalati vou, oya o ira era nuitaka na bula i lomalagi. E vakadeitaka vei ira na yalo tabu ni Kalou nira sa digitaki mera lai tui vata kei Karisito mai lomalagi. (Roma 8:16) Era okati tale ga ena veiyalayalati ni Matanitu kei Jisu.
Vakacava o ira e nodra inuinui na bula tawamudu ena Parataisi e vuravura? Era muria tale ga na ivakaro i Jisu ra qai dau vakananuma na iVakayakavi ni Turaga, ia era tiko ena veidokai ni veisoliyaki na madrai kei na waini, era sega ni vakayagataka. E dau nodra ivalavala na iVakadinadina i Jiova mera vakananuma na iVakayakavi ni Turaga e veiyabaki, ena ika14 ni Naisani ni sa dromu na siga. Ena gauna qo era le vica ga na udolu era nuitaka na bula i lomalagi, ia na iVakananumi e soqo bibi vei ira na lotu vaKarisito kece. Na vuna, baleta ni gauna vinaka mera vakananuma kina nodrau loloma levu na Kalou o Jiova kei na Luvena o Jisu Karisito.
Rawa ni o Wilika Tale ga
IVAKANANUMI
Vakananuma na Mate i Jisu
Keimami sureti kemuni moni tomani keimami ena soqo bibi qo. O na vulica kina na yaga ni bula i Jisu kei na nona mate ena vukumu.
TARO E TAROGI WASOMA
Cava e Duidui Kina Nodra Vakananuma na iVakayakavi ni Turaga na iVakadinadina i Jiova kei na so Tale na Lotu?
Qo e dua na nodra soqo bibi na iVakadinadina i Jiova e kilai tale ga me iOtioti ni Vakayakavi se iVakananumi. Dikeva na ka e kaya na iVolatabu me baleta na soqo qo.
