ORANG Kristian diasuh Ngingatka Hari Pemati Jesus. Nama kebuah pengawa tu beguna bendar? Kemaya, lalu baka ni iya patut diintu?

Jesus Kristus ngepunka pengawa tu ba malam Gawai Paska orang Judah kena taun 33 M. Gawai Paska semina diintu setaun sekali, kena 14 haribulan Nisan kelinda orang Judah. Bulan Nisan berengkah maya anak bulan baru ulih dipeda, kira-kira seminggu udah bulan 3. Lalu 14 hari udah nya, orang Judah ngintu Gawai Paska, udah mata hari padam.

Jesus ngintu Gawai Paska enggau bala rasul iya. Udah Judas Iskariot ninggalka sida, Jesus ngepunka pengawa Ngingatka Hari Pemati iya. Pengawa tu nganti Gawai Paska orang Judah, nya alai iya patut diintu setaun sekali.

 Injil Matthew madah: “Jesus ngambi roti, merekat lalu mechahka roti nya, nyuaka roti nya ngagai sida murid iya, lalu bejaku, ‘Ambi, empa; tu tubuh aku.’ Udah nya iya ngambi mangkuk, lalu lebuh iya udah meri terima kasih, iya nyuaka mangkuk nya ngagai sida murid, ku iya, ‘Irup tu, semua kita, laban tu darah aku kena nanggam sempekat baru Petara, ti dituang ke orang mayuh ke pengampun dosa.’”—Matthew 26:26-28.

Sekeda orang ngumbai Jesus nukar roti nyadi dagin iya, lalu wain nyadi darah iya. Tang, tubuh Jesus agi sempurna maya iya meri roti nya. Kati bala rasul Jesus amat makai dagin sereta ngirup darah iya? Enda, laban pengawa mensia ke makai dagin mensia ngelanggar ukum Petara. (Pemungkal 9:3, 4; Adat Lewi 17:10) Nitihka 1 Korint 11:25, Jesus madah: ‘Mangkuk tu sempekat baru ti ditanggam ngena darah aku. Kereja tu genap kali kita ngirup iya, kena ngingatka aku.’ Kati mangkuk nya amat nyadi “sempekat baru”? Enda, sempekat nya janji, iya ukai utai ti dipeda.

Nyadi, roti enggau wain semina tanda. Roti ngambarka tubuh Kristus ti sempurna. Jesus ngena roti ti enda beragi. (Pemansut 12:8) Bup Kudus ngena ragi ngambarka dosa tauka pengerusak. Nya alai, roti ti enda beragi ngambarka genselan tubuh Jesus ti sempurna. Iya nadai dosa.—Matthew 16:11, 12; 1 Korint 5:6, 7; 1 Peter 2:22; 1 John 2:1, 2.

Wain mirah ngambarka darah Jesus. Darah nya nanggam sempekat baru. Jesus madah darah iya dikena nyadi “ke pengampun dosa.” Nya alai, mensia ulih tuchi ba mata Petara, lalu ulih enggau ba sempekat baru ari Jehovah. (Hebrew 9:14; 10:16, 17) Sempekat baru tu meri peluang ngagai 144,000 orang Kristian ti tetap ati ke serega. Sida deka nyadi raja enggau imam, lalu ngenataika berekat ngagai semua mensia.—Pemungkal 22:18; Jeremiah 31:31-33; 1 Peter 2:9; Pemandang 5:9, 10; 14:1-3.

 Sapa patut makai roti enggau ngirup wain nya? Semina sida ke ulih enggau ba sempekat baru—ke bisi peluang ke serega. Roh kudus Petara nentuka sida udah dipilih nyadi raja ba serega. (Rome 8:16) Sida iya mega enggau Jesus merintah ba Perintah ti disemayaka ba sempekat baru nya.—Luke 22:29.

Baka ni enggau orang ke bisi peluang idup belama ba dunya Paradais? Sida ngasika pesan Jesus, lalu datai ngintu Ngingatka Hari Pemati Jesus. Tang, enggau bebasa sida datai ngemataka aja, enda enggau makai roti sereta ngirup wain. Setaun sekali pengudah mata hari padam kena 14 haribulan Nisan, Saksi-Saksi Jehovah ngintu Ngingatka Hari Pemati Jesus. Taja pan semina beribu iku aja orang ke bisi peluang ke serega, tang, pengawa tu beguna bendar ba semua orang Kristian. Tu meh maya semua orang ulih meratika enggau dalam pengerindu ti pemadu besai ari Petara Jehovah enggau Jesus Kristus.—John 3:16.