IŢWAMEṚ-​ED i imasiḥiyen ad ţɛeggiden Asmekti n lmut n Lmasiḥ, iwumi i neqqar daɣen “imensi n Ssid.” (1 Ikurintiyen 11:20) Acuɣer i gesɛa lqima “imensi n Ssid”? Melmi yerna amek i glaq a t-​nɛegged?

Ɛisa Lmasiḥ yesbedd aɛegged-​agi deg yiḍ n Lɛid n Usuref n Iyahudiyen deg useggas 33 mbeɛd Ɛisa. Lɛid-​agi n Usuref teţţili yiwet n tikkelt kan deg useggas, yeɛni ass wis 14 n waggur n Iyahudiyen iţţusemman Nisan. Bac a d-​afen ass wis 14 seg waggur-​agi, Iyahudiyen ţṛaǧun ahat nnhaṛ n tefsut (ṛṛbiɛ) ideg ass akk-​d yiḍ sɛan azal n 12 n sswayeɛ mkul yiwen. Ass amezwaru n ccheṛ n Nisan ibeddu m’ara d-​iḍher waggur amezwaru i gqerben nnhaṛ-​agi. Lɛid n Usuref tbeddu 13 n wussan umbeɛd.

Ɛisa iɛegged Lɛid n Usuref akk-​d yemceggɛen-​is, yessufeɣ-​ed Yahuda n Qiryut, ssyin yesbedd Imensi n Ssid. Imi yuɣal imensi-​yagi deg wemkan n Lɛid n Usuref n Iyahudiyen, ilaq-​aɣ a t-​neţɛeggid yiwen webrid kan deg useggas.

Linǧil n Matta yeqqar-​ed: “Yasuɛ iddem-​d aɣrum, iburek dɣa ibḍa-​t. Ifka-​t i inelmaden-​is dɣa yenna-​yasen:  ‘Ddmet teččem: wagi, d lǧeţţa-​w.’ Iddem-​ed taqbuct, iḥmed, ifka-​yasen-​ţ dɣa yenna: ‘Swet akw seg-​s: wigi, d idammen-​iw, d idammen n lemɛahda, yuzzlen ɣef waṭas, i leɛfu n ddnubat.’”—Matta 26:26-28.

Kra nwan-​as belli Ɛisa yerra s ṣṣeḥ aɣrum-​nni d aksum-​is, ccṛab-​nni d idammen-​is. Lameɛna, lǧeţţa-​s ur ţ-​yuɣ wacemma mi gefreq aɣrum-​nni. Dɣa ţ-​ţideţ ččan yemceggɛen-​is aksum-​is yerna swan idammen-​is? Xaṭi, wagi d ayen ibanen. Lemmer xdimen aya, tili qqlen am wid iteţţen tacriḥt n lɛibad; ayagi iḥeṛṛem-​it lqanun n Ṛebbi. (Laṣel n ddunit 9:3, 4; At Lewwi 17:10) Ɛlaḥsab n Luqa 22:20, Ɛisa yenna-​d: “Taqbuct agi, d lemɛahda tajdiṭ s idammen-​iw yuzzlen fell-​awen.” Eɛni d ṣṣeḥ tuɣal teqbuct-​agi d “lemɛahda tajdiṭ”? D lmuḥal, axaṭer lemɛahda mačči d lḥaǧa i nezmer a neṭṭef ger ifassen-​nneɣ.

Ihi, ama d aɣrum-​nni ama d ccṛab-​nni, i sin d lemtul kan. Aɣrum-​nni iţmettil-​ed lǧeţţa ikemlen n Lmasiḥ. Ɛisa yessexdem aɣrum i d-​yegran seg imensi n Lɛid n Usuref. Aɣrum-​agi ur yesɛi ara iɣes n temtunt. (Tuffɣa 12:8) Deg Wedlis Iqedsen, iɣes n temtunt iţmettil-​ed tikwal ddnub neɣ lefsad. Ihi, aɣrum i gessexdem Ɛisa iţmettil-​ed lǧeţţa-​s ikemlen i gefka d asfel, yeɛni lǧeţţa-​s ur nesɛi ara ddnub.—Matta 16:11, 12; 1 Ikurintiyen 5:6, 7; 1 Buṭrus 2:22; 1 Yuḥenna 2:1, 2.

Ccṛab-​nni azeggaɣ iţmettil-​ed idammen n Ɛisa. Idammen-​agi d lsas n lemɛahda tajdiṭ (leɛqed ajdid). Ɛisa issefhem-​ed belli idammen-​is ad azzlen “i leɛfu n ddnubat.” Ihi, lɛibad zemren ad ilin ṣfan zdat n Ṛebbi w’ad ţekkin yid-​es di leɛqed ajdid. (Iɛebṛaniyen 9:14; 10:16, 17) Leɛqed-​agi, neɣ lemɛahda-​yagi, isemmeḥ i 144 000 n imasiḥiyen unṣiḥen ad alin s igenni, anda ara uɣalen d igelliden yerna d lmuqeddmin i lmend n yemdanen irkelli.—Laṣel n ddunit 22:18; Irmiya 31:31-33; 1 Buṭrus 2:9; Aweḥḥi 5:9, 10; 14:1-3.

Menhu ara yeččen seg weɣrum, ara yeswen si ccṛab deg Wesmekti n lmut n Ɛisa? D wid kan icerken di leɛqed ajdid, yeɛni wid yesɛan asirem ad alin s igenni. Ṛṛuḥ iqedsen n Ṛebbi yeţţak-​asen ţţeḥqiq belli ţwaxtaṛen ad qqlen d igelliden  deg igenni. (Iṛumaniyen 8:16) Cerken daɣen di leɛqed n Tgelda akk-​d Ɛisa.—Luqa 22:29.

Acu ara d-​nini ɣef wid yesɛan asirem ad ɛicen i lebda di Lǧennet ɣef lqaɛa? Imi ţţaɣen awal i Ɛisa, ţţasen-​d ad ḥedṛen s leqder i Imensi n Ssid, meɛna ur teţţen aɣrum-​nni ur tessen si ccṛab-​nni. Yiwen webrid i useggas, mbeɛd mi geɣli yiṭij, ass wis 14 n waggur n Nisan, Inagan n Yahwa ţɛeggiden Imensi n Ssid. Ɣas akken kra n luluf kan n lɛibad di ddunit i d-​iţbegginen belli sɛan asirem ad alin s igenni, aɛegged-​agi yesɛa lqima tameqrant ɣur imasiḥiyen meṛṛa. Yeţţak-​asen tagniţ ad meyyzen ɣef leḥmala yetɛeddan n Yahwa Ṛebbi akk-​d Ɛisa Lmasiḥ.—Yuḥenna 3:16.