EBʼ LI nekeʼloqʼonink re li Yos tenebʼanbʼil saʼ xbʼeenebʼ Xnimankil li Xkamik li Jesus. Kʼaʼut aajel ru xbʼaanunkil aʼin? Joqʼe ut chanru Xnimankil li Xkamik li Jesus?

Li Jesus kixkʼojobʼ jun li waʼak re xnimankil li xkamik. Ut aʼan kixbʼaanu saʼ li qʼoqyink naq ebʼ laj Judio keʼxnima li Paswa, saʼ li chihabʼ 33. Li Paswa aʼan jun rehebʼ li ninqʼe li keʼxnima chaq ebʼ laj Judio. Saʼ li 14 xbʼe li po Nisan keʼxbʼaanu li ninqʼe aʼin jun sut ajwiʼ chiru li chihabʼ. Li xbʼeen kutan re Nisan natiklaak chaq naq nayoʼlaak li Po, aʼin nakʼulmank naq nanumeʼk li  xbʼeen xamaan re li po Marzo. Chalen chaq saʼ xyoʼlajik li Po naʼajlamank 13 kutan re xnimankil li Paswa.

Saʼ li qʼoqyink re li 14 xbʼe li po Nisan, li Jesus kixnima ajwiʼ li Paswa rochbʼeenebʼ li xtzolom. Chirix chik aʼan kixkʼojobʼ jun li waʼak re xnimankil li xkamik, abʼan xbʼeenwa kirisi laj Judas Iscariote saʼ xyanqebʼ. Li waʼak aʼin kikanaak choʼq reeqaj li Paswa, li keʼxnima chaq ebʼ laj Judio. Joʼkan naq jun sut ajwiʼ chiru li chihabʼ naqanima xkamik li Jesus.

Li Santil Hu naxye: «Li Jesus kixchap li wa, kiyoxink saʼ xbʼeen, kixjachi, kixkʼe rehebʼ li xtzolom». Tojaʼ naq kixye rehebʼ naq teʼxkʼul ut teʼxwaʼ xbʼaan naq aʼan reetalil li xtibʼel. «Chirix chik aʼan kixchap jun li ukʼlebʼ sekʼ, kiyoxink, kixkʼe rehebʼ». Ut kixye ajwiʼ rehebʼ naq teʼxkʼul ut teʼrukʼ xbʼaan naq aʼan reetalil li xkikʼel re li sumwank, «hoybʼil saʼ xkʼabʼaʼ chixjunilebʼ re xkuybʼal xsachbʼal li xmaakebʼ» (Mateo 26:26-28).

Wankebʼ nekeʼxkʼoxla naq li Jesus kixsuqʼisi li kaxlan wa choʼq xtibʼel ut li bʼiin choʼq xkikʼel. Abʼan, naq li Jesus kixnima li waʼak aʼin toj wank saʼ xyanqebʼ li xtzolom. Joʼkan naq, ebʼ li Apostol moko keʼxwaʼ ta li xtibʼel li Jesus chi moko keʼrukʼ ta li xkikʼel; wi keʼxbʼaanu raj aʼin keʼxqʼet raj li xchaqʼrabʼ li Yos (Génesis 9:3, 4; Levítico 17:10). Li Jesus kixye saʼ Lucas 22:20 naq li sekʼ aʼan reetalil li akʼ sumwank saʼ xkʼabʼaʼ li xkikʼel, li hoybʼil saʼ qakʼabʼaʼ. Ma kikanaak li sekʼ aʼin choʼq «Akʼ Sumwank»? Inkʼaʼ. Li sumwank nakʼanjelak re keʼok ibʼ saʼ aatin ut moko naʼilmank ta ru joʼ naʼilmank ru li sekʼ.

Li kaxlan wa ut li bʼiin yal jun eetalil. Li kaxlan wa reetalil li xtibʼel li Jesus. Li kaxlan wa li keʼroksi naq keʼxnima li Paswa sup ut maakʼaʼ xbʼanol ut li kirelaʼink aʼan kiroksi li Jesus rikʼinebʼ li xtzolom (Éxodo 12:8). Wank naq li xbʼanol li kaxlan wa reetalil li maak. Joʼkan naq li kaxlan wa li maakʼaʼ xbʼanol, reetalil li xtibʼel li Jesus li kixqʼaxtesi saʼ qakʼabʼaʼ (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Li kaqi bʼiin reetalil li xkikʼel li Jesus, li kikʼehok re xwankil li akʼ sumwank. Li Jesus kixye naq tixhoy li xkikʼel «re xkuybʼal xsachbʼal» li maak. Saʼ xkʼabʼaʼ li xkikʼel li Jesus, wankebʼ keʼchʼajobʼresiik chiru li Yos ut wankebʼ saʼ li akʼ sumwank  (Hebreos 9:14; 10:16, 17). Saʼ xkʼabʼaʼ li sumwank aʼin, ebʼ li 144.000 teʼxik saʼ choxa joʼ aj tij ut teʼawabʼejinq saʼ xbʼeen li ruuchichʼochʼ (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

Kaʼajwiʼ li wankebʼ saʼ li akʼ sumwank malaj li teʼxik saʼ choxa nekeʼxtzaka li kaxlan wa ut nekeʼrukʼ li bʼiin, li naʼoksimank re Xnimankil li Xkamik li Jesus. Li santil musiqʼej naxchʼolobʼ chiruhebʼ naq sikʼbʼilebʼ ru, re naq teʼawabʼejinq saʼ choxa (Romanos 8:16). Li Jesus kixbʼaanu ajwiʼ jun li sumwank rikʼinebʼ li sikʼbʼilebʼ ru, re naq teʼawabʼejinq rikʼin saʼ li Xnimajwal Awabʼejilal li Yos (Lucas 22:29).

Abʼan, kʼaru nekeʼxbʼaanu li teʼwanq chi junelik saʼ li akʼ ruuchichʼochʼ? Nekeʼxnima li Xkamik li Jesus, usta inkʼaʼ nekeʼxtzaka li kaxlan wa ut inkʼaʼ nekeʼrukʼ li bʼiin. Saʼ chixjunil li Ruuchichʼochʼ ebʼ laj Testiiw re li Jehobʼa, jun sut ajwiʼ chiru li chihabʼ nekeʼxnima li Xkamik li Jesus ut nekeʼxbʼaanu saʼ li 14 xbʼe li po Nisan naq ak xʼok li Saqʼe. Usta moko kʼihebʼ ta teʼxik saʼ choxa; aajel ru naq chixjunilebʼ laj paabʼanel teʼxnima li Xkamik li Jesus. Naq naqanima li xkamik li Jesus najultikoʼk qe naq li Jehobʼa ut li Jesus jwal nokooʼeʼxra (Juan 3:16).